پرەزيدەنت: ەۋرازيالىق ينتەگراتسيانىڭ تيىمدىلىگى «ءتورت ەركىندىك» قاعيداتىن ساقتاۋعا تىكەلەي بايلانىستى
«ءبىزدىڭ ينتەگراتسيالىق سەرىكتەستىگىمىزدىڭ تيىمدىلىگى «ءتورت ەركىندىك» قاعيداتىن ساقتاۋعا تىكەلەي بايلانىستى. سولاردىڭ ءبىرى - تاۋار وتكىزۋ ەركىندىگى. ءبىزدىڭ ورتاق كەدەندىك اۋماعىمىز ارقىلى ترانزيتپەن وتەتىن قازاقستاندىق جانە قازاقستاندىق ەمەس جۇكتەردىڭ دە تاسىمالى شەكتەۋدىڭ، كۆوتالاۋ مەن كەشىكتىرۋدىڭ بۇكىل فاكتىلەرىن جويۋ قاجەت دەپ سانايمىن.
مۇنداي شەكتەۋلەر ەۋرازيالىق ەكونوميكالىق وداق شەڭبەرىندەگى ەكونوميكالىق ىنتىماقتاستىقتىڭ ماقساتى مەن رۋحىنا سايكەس كەلمەيدى. ەڭ باستىسى، ولار ءبىزدىڭ ەكونوميكالىق ينتەگراتسيامىزدىڭ الەۋەتىن ىسكە اسىرۋدى شەكتەيدى»، - دەدى مەملەكەت باسشىسى بىشكەكتە ءوتىپ جاتقان جوعارى ەۋرازيالىق ەكونوميكالىق كەڭەستىڭ وتىرىسىندا.
سونداي- اق، پرەزيدەنت تاسىمالداۋدى قاداعالاۋ ءۇشىن جۇك قوزعالىسىن قاداعالايتىن پلومبا قولدانۋ تۋرالى كەلىسىمنىڭ كۇشىنە ەنۋىن جەدەلدەتۋ قاجەت دەپ ەسەپتەيدى.
«مۇنداي شارا تسيفرلاندىرۋدىڭ ينتەگراتسيالىق پروتسەستەرگە وڭ ىقپالىنا جاقسى ۇلگى بولار ەدى. بۇل كەلىسىمدى جەدەل راتيفيكاتسيالاپ، كەلىسىم اياسىندا مەملەكەتتىك باقىلاۋ شارالارىن قىسقارتۋ ەكونوميكالىق وداقتىڭ كولىك- ترانزيتتىك، كاسىپكەرلىك الەۋەتىن ايتارلىقتاي كەڭەيتەدى دەپ توپشىلايمىن.
كەلىسىمدى جەدەل راتيفيكاتسيالاۋ اتالعان ماسەلەلەردى شەشۋگە ىقپال ەتەدى دەپ ويلايمىن»، - دەدى قاسىم- جومارت توقايەۆ.
بۇعان دەيىن پرەزيدەنت قاسىم- جومارت توقايەۆتىڭ جوعارى ەۋرازيالىق ەكونوميكالىق كەڭەسىنىڭ وتىرىسىنا قاتىسۋ ءۇشىن بىشكەك قالاسىنا جۇمىس ساپارىمەن بارعانى حابارلانعان ەدى.