وليمپياداعا قاتىسقان تۇڭعىش قازاق قىزى موڭعوليادا ماراپاتتالدى

استانا. قازاقپارات - قازاق قىزدارىنىڭ اراسىنان وليمپيادا ويىندارىنا قاتىسقان تۇڭعىش سپورتشى الدانىش رامازان قىزى موڭعوليادا «ەڭبەك سىڭىرگەن سپورتشى» اتاعىمەن ماراپاتتالدى، دەپ حابارلايدى قازاقپارات.

«Kaznews» سايتىنىڭ جازۋىنشا، الدانىش رامازان قىزى 1964 -جىلعى توكيو قالاسىندا وتكەن وليمپيادا ويىندارىنا موڭعول ەلىنىڭ اتىنان قاتىسقان.

«ءارى موڭعوليا سپورتى تاريحىندا تۇڭعىش رەت وليمپياداعا قاتىسقان ايەل رەتىندە اتى التىن ارىپپەن جازىلعان. ول قازاق دياسپوراسىنان شىققان تۇڭعىش سپورت شەبەرى ەكەنىن اتاپ وتكەنىمىز ءجون بولار. موڭعول ەلىنىڭ رەكوردىن بىرنەشە رەت جاڭارتقان. ون ەكى دۇركىن ەلىمىزدىڭ چەمپيوندىق تۇعىرىنا كوتەرىلگەن، شاشاسىنا شاڭ جۇقپاعان جەلاياق»، - دەلىنگەن سايتتىڭ اقپاراتىندا.

ايتا كەتەيىك، الدانىش رامازان قىزى 1945 -جىلى باي- ولكە ايماعىنىڭ ورتالىعى ولگەي قالاسىندا دۇنيەگە كەلگەن. قازاق تاريحىندا جەڭىل اتلەتيكادان شىققان تۇڭعىش سپورت شەبەرى، موڭعوليانىڭ تۇڭعىش وليمپياداشىسى، شيرەك عاسىرعا جۋىق رەكوردى بۇزىلماعان سپورتشى، حالىقارالىق جارىستان تۇڭعىش مەدال اكەلگەن جەڭىل اتلەت، جەلاياق جۇيرىك، وزات باپكەر- ۇستاز الدانىش رامازان قىزى قازىر ۇلانباتىر قالاسىندا ءومىر ءسۇرىپ جاتىر.

ۇلانباتىرداعى ورتا مەكتەپتە وقىپ جۇرگەنىندە- اق جۇگىرۋدەن شەبەرلىگىن بايقاعان سول كەزدەگى مەملەكەتتىك سپورت كوميتەتى جەڭىل اتلەتيكا ءبولىمىنىڭ جاتتىقتىرۋشىسى مەن كەڭەس ەلىنەن كەلگەن سپورت مامانى 5-سىنىپتىڭ وقۋشىسىن جەڭىل اتلەتيكا سەكسياسىنا قابىلداعان. كەشىكپەي تالانتتى قىز ۇلتتىق قۇرامانىڭ ساپىنا قوسىلىپ، 1961 -جىلدان 1969 -جىلعا دەيىن ۇلتتىق قۇرامادا ونەر كورسەتتى.

اشىق دەرەككوزدەردىڭ مالىمەتىنشە، 1962 -جىلى موڭعول ەلىنىڭ تاريحىندا العاش رەت بۇكىلحالىقتىق سپارتاكيادا وتكەن بولاتىن. وسىعان 16 جاسىندا قاتىسقان الدانىش 200، 400، 800 مەترلىك جارىستاردان ەل رەكوردىن جاڭارتقان. بۇل ءوز ۋاقىتىندا بۇرىن- سوڭدى بولماعان ەلەۋلى جەتىستىك ەدى. الدانىش رامازان قىزىنىڭ 200 مەتر قاشىقتىققا جاساعان رەكوردى ءۇش جىلدان كەيىن جاڭاردى. ال، 400 جانە 800 مەتر قاشىقتىقتاعى رەكوردىن 22 جىل بويى ەشكىم بۇزا الماعان. ءبىر قىزىعى سول - الدانىش رامازان قىزىنىڭ 800 مەتر قاشىقتىققا توقتاتقان رەكوردىن 1984 -جىلى تاعى ءبىر قازاق قىزى، موڭعوليا مەملەكەتتىك ۋنيۆەرستەتتىڭ تۇلەگى كۇشاي قۇلىبەك قىزى جاڭارتىپتى.

سونداي- اق، 1966 -جىلى تاۋلى التاي ولكەسىندە وتكەن موڭعول- كەڭەس ەلدەرىنىڭ ستۋدەنت- جاستار فەستيۆالىنا قاتىسىپ، جۇگىرۋدەن التىن مەدال يەگەرى اتانعان. رەسپۋبليكالىق قۇرامادا جۇرگەن جىلدارى باكۋدە وتكەن حالىقارالىق تۋرنيردە العان كۇمىس مەدالى - موڭعوليانىڭ جەڭىل اتلەتيكا تاريحىندا حالىقارالىق جارىستان اكەلگەن العاشقى مەدالى رەتىندە تىركەلگەن.

اۆتور

بەيسەن سۇلتان