ازيا ويىندارىندا باق سىناعىم كەلەدى - تەننيسشى قازاق قىزى

استانا. قازاقپارات - تەننيستەن قازاقستان ۇلتتىق قۇراماسىنىڭ مۇشەسى جىبەك قۇلامبايەۆا جىلدى قورىتىندىلاپ، الداعى وي-جوسپارى جونىندە قازاقپارات ءتىلشىسىنىڭ ساۋالدارىنا جاۋاپ بەردى.

ول كەلەسى جىلى ازيا ويىندارىندا باق سىناپ، ەل نامىسىن قورعاعىسى كەلەتىنىن دە مالىمدەدى.

- جىبەك، دۇنيەجۇزىلىك رەيتينگتە جەكەلەي سىندا 441-ورىندا تۇرسىڭ. جۇپتىق سىن سەنىڭ وڭ جامباسىڭا كەلەتىن سەكىلدى، ءقازىر 201-ساتىداسىڭ. الدىمەن وتكەن ماۋسىم نەسىمەن ەستە قالدى، سوعان توقتالساڭ؟

- جالپى، ماۋسىم ويداعىداي ءوتتى دەۋگە بولادى. جەكەلەي جانە جۇپتىق سىندا رەيتينگىلىك كورسەتكىشىمدى جاقسارتتىم. جۇپتىق سىندا بىرنەشە رەت جارىس جەڭىمپازى اتاندىم. ITF25 جانە ITF15 تۋرنيرلەرىندە ەكى رەت فينالعا دەيىن جەتتىم. دەگەنمەن، ماۋسىم سوڭىندا جاراقات الىپ، اياعىنا دەيىن ويناي المادىم.

- ول نە جاراقات؟ قاتتى مازالاپ ءجۇر ما؟

- توبىعىمنان جاراقات الىپ ەدىم. قازىر ەمدەلىپ جاتىرمىن.

- ەمدەلۋ قانشا ۋاقىتقا سوزىلماق؟

- ەكى اي. ونىڭ ۇستىنە ءقازىر ماۋسىمنىڭ اياعى بولعاندىقتان، ءۇش اي بويى جارىسقا قاتىسا المايمىن.

- سوندا قاڭتار ايىندا جاتتىعىپ، تۋرنيرلەرگە دايىندالا باستايسىڭ با؟

- ءيا.

- بيىل بەلگىلى قازاقستاندىق تەننيسشى ياروسلاۆا شۆەدوۆا تىزگىنىن ۇستاعان ۇلتتىق قۇراما العاش رەت كوماندالىق الەم چەمپيوناتى - بيللي دجين كينگ كۋبوگىنىڭ فينالدىق كەزەڭىندە ونەر كورسەتتى. شوتلانديانىڭ گلازگو قالاسىندا ويناي الماساڭ دا، كوماندامەن بىرگە بولدىڭ. قانداي اسەر الدىڭ؟

- بيىل ۇلتتىق قۇراما ساپىندا ەكى رەت بولدىم. اۋەلى بيللي دجين كينگ كۋبوگىنىڭ ىرىكتەۋ ساتىسىندا استاناداعى ۇلتتىق تەننيس ورتالىعىندا گەرمانيامەن وينادىق. وندا جۇپتىق سىندا ەلىمىزدىڭ ءبىرىنشى راكەتكاسى اننا دانيلينامەن بىرگە ونەر كورسەتتىم. سودان كەيىن گلازگوعا جول ءتۇستى. ارينە، قىزدارمەن ءبىر كوماندادا بولىپ، بىرگە جۇرگەن، بىرگە جاتتىققان وتە پايدالى. ويتكەنى، ولاردىڭ ءبارى دە - كاسىبي سپورتشىلار. ءبارى دە جىلدى جاقسى قورىتىندىلادى. اسىرەسە، ەلەنا رىباكينانىڭ «ۇلكەن دۋلىعا» تۋرنيرى - ۋيمبلدون جارىسىنىڭ چەمپيونى اتانعانى ءبارىمىزدىڭ مەرەيىمىزدى ءوسىردى. سوندىقتان ولاردان كوپ نارسەنى ۇيرەنۋگە بولادى. ءوز شەبەرلىگىڭدى جەتىلدىرە تۇسەسىڭ.

- قازىرگى تاڭدا ءوز دەڭگەيىڭدى قالاي باعالايسىڭ؟ WTA 125 دەڭگەيىندەگى تۋرنيرلەرگە قاتىسا الاسىڭ با؟

- جۇپتىق دەڭگەيدە باق سىناۋعا دايىنمىن دەپ ويلايمىن. جەكەلەي سىندا رەيتينگتەگى ورنىم ازىرگە مۇمكىندىك بەرمەيتىن بولار. سونداي-اق تاجىريبەسى مول، رەيتينگى جوعارى تەننيسشىلەرمەن ويناپ كورگەن جوقپىن. نەگىزىنەن ITF 25, 60 دودالارىندا ونەر كورسەتىپ ءجۇرمىن. وندا دەڭگەي تومەندەۋ.

- وتكەن جىلى استانادا WTA 250 تۋرنيرىنە قاتىسىپ كوردىڭ عوي. قالاي ويلايسىڭ، ITF جارىستارىنىڭ دەڭگەيى كوپ تومەن بە؟

- مەن سول ماتچتا بولاشاق چەمپيون، بەلگيالىق اليسون ۆان ەيتۆانككە جول بەرگەنىممەن، بارىنشا قارسىلىق كورسەتتىم. ويىن 4:6، 3:6 ەسەبىمەن اياقتالدى. تىم ءتاۋىر وينادىم، دەگەنمەن مۇنداي جارىستاعى دەڭگەيدىڭ وزگەشە ەكەندىگى بايقالىپ تۇردى. ول كەز كەلگەن ۋاقىتتا شەبەرلىگىن كورسەتە الدى، ال مەندە ولاي بولعان جوق.

- الداعى ماۋسىمدا قانداي ماقسات- مىندەت قويىپ وتىرسىڭ وزىڭە؟

- جاڭا جىلدا رەيتينگىدە نەعۇرلىم جوعارىلاپ، ءوز ويىنىمدى بارىنشا جاقسارتسام دەيمىن. ەڭ باستىسى، ماۋسىم الدىندا جەمىستى ەڭبەكتەنىپ، دۇرىستاپ دايىندالۋ كەرەك. سوسىن ماۋسىم بويى تابىستى ونەر كورسەتكىم كەلەدى.

- الداعى جىلى كۇزدە قازاقستان سپورتشىلارى ءۇشىن باستى جارىستاردىڭ ءبىرى - ازيا ويىندارى وتەتىنى بەلگىلى. وعان قاتىسۋ ويىڭدا بار ما؟

- ارينە! ۇلتتىق قۇراماعا الىنسام، ويناۋعا دايىنمىن. ەل نامىسىن ابىرويمەن قورعاۋدان ارتىق نە بار!

- اڭگىمەڭە راحمەت. الداعى جىلى شەبەرلىگىڭدى جەتىلدىرىپ، تابىستارعا قول جەتكىزۋىڭە تىلەكتەسپىز.

جىبەك قۇلامبايەۆا 22 جاستا، الماتى قالاسىنىڭ تۋماسى. سپورتتىق جولىندا ITF ساناتىنداعى تۋرنيرلەردە ەكى رەت جەكەلەي سىندا جەڭىمپاز اتانعان. وعان قوسا جۇپتىق سىندا 19 تيتۋلعا قول جەتكىزگەن.