ورالدا ءتارتىپ ساقشىلارى اسىلىپ قالعان ەر ادامدى قۇتقاردى
8 جەلتوقسان, 21:43

ورالدا ءتارتىپ ساقشىلارى اسىلىپ قالعان ەر ادامدى قۇتقاردى

ورال. قازاقپارات - ورالدا ءتارتىپ ساقشىلارى اسىلىپ قالعان ەر ادامدى قۇتقاردى، دەپ حابارلايدى قازاقپارات ءتىلشىسى.

ب ق و پوليتسيا دەپارتامەنتى باسپا ءسوز قىزمەتىنەن تۇسكەن مالىمەتكە قاراعاندا، وقيعا 5- جەلتوقسان كۇنى ساعات 02.00 دە بولدى.

«كىشكەنتاي قىز ورال قالاسى پوليتسيا باسقارماسىنىڭ كەزەكشى بولىمىنە وتباسىندا جانجال بولىپ جاتقانىن حابارلاپ، كومەك سۇراعان. وقيعا ورنىنا ۋچاسكەلىك پوليتسيا ينسپەكتورى، پوليتسيا كاپيتانى ميراس يساتايەۆ، پاترۋلدىك پوليتسيا باتالونىنىڭ قىزمەتكەرى، پوليتسيا لەيتەنانتى جانارىس مەدەلحان، جەدەل قيمىلدايتىن ارنايى جاساقتىڭ ينسپەكتورى، پوليتسيا كاپيتانى عادىلبەك نۇرمۇحانوۆ شۇعىل جەتكەن. اۋلانىڭ سىرتقى ەسىگى جابىق تۇرعاندىقتان، ءتارتىپ ساقشىلارى قاقپادان سەكىرىپ كىرەدى. ءۇيدىڭ ءىشى-سىرتىن تەكسەرگەنمەن، ەر ازاماتتى تاپپايدى. تەك ەسكى سارايدى قاراعاندا، اسۋلى تۇرعان ەر ادامدى بايقاپ، جىپتەن شەشىپ الىپ، العاشقى كومەك كورسەتەدى. سالدەن سوڭ ەسىن جيعان سوڭ ونىڭ دەنساۋلىعىن تولىق تەكسەرتۋ ءۇشىن دارىگەرلەردى شاقىرادى.

مامانداردىڭ پايىمداۋىنشا، ەندى 3 مينۋتقا كەشىككەندە، ەر ادامدى امان الىپ قالۋ ەكىتالاي ەدى. ونىڭ وتباسىلىق جانجال سالدارىنان وزىنە-ءوزى قول جۇمساماق بولعانى انىقتالدى»، دەپ حابارلادى ۆەدومستۆودان.

بۇل - سوڭعى كۇندەرى ورال قالاسىندا بولعان ەكىنشى وقيعا. بۇدان بۇرىن ءتارتىپ ساقشىلارى ماس كۇيىندە اسىلىپ قالعان ەر ادامدى قۇتقارعان بولاتىن.

جاڭالىقتار