سەناتور ساپاسىز ينتەرنەتكە ايىپپۇل سوماسىن ءوسىرۋدى ۇسىندى

استانا. قازاقپارات - سەناتور عالياسقار سارىبايەۆ ەلىمىزدىڭ پرەمەر- ءمينيسترى ءاليحان سمايىلوۆتىڭ اتىنا جولداعان دەپۋتاتتىق ساۋالىندا سيفرلاندىرۋ سالاسىنداعى پروبلەمالار تۋرالى ايتتى، دەپ حابارلايدى قازاقپارات ءتىلشىسى.

«داتا ورتالىقتار (دەرەكتەر وڭدەۋ ورتالىعى) مەن سەرۆەرلەر حالىقارالىق ستاندارتقا سايكەس ەمەس نەمەسە مۇلدە جوق. ءبىلىم جانە عىلىم، دەنساۋلىق، الەۋمەتتىك، ەكونوميكا سالالارىندا كەشەندى قاشىقتان وقىتۋدىڭ LMS، ERP پلاتفورمالارى تولىققاندى جۇمىس ىستەمەيدى»، - دەدى دەپۋتات سەناتتىڭ جالپى وتىرىسىندا.

سەناتور قالالىق جانە اۋىلدىق ەلدى مەكەندەردەگى ساپالى ينتەرنەتكە قاتىستى الشاقتىق تۋرالى دا ايتتى. ەلىمىزدە 100 ادامنىڭ 15 ءى تۇراقتى ينتەرنەتكە تىركەلسە، اۋىلدىق جەرلەردە 100 ادامنىڭ تەك 8 ءى عانا جەلىمەن قامتاماسىز ەتىلگەن. سەناتور سيفرلاندىرۋ سالاسىنىڭ جاي- كۇيىن ودان ءارى جاقسارتۋ ءۇشىن ءبىرقاتار ۇسىنىس ايتتى.

«رەتتەۋشى تاراپىنان ينتەرنەت ساپاسى بويىنشا تالاپتاردى قاتاڭداتۋ جانە ايىپپۇل سوماسىن ۇلعايتۋ جونىندە قولدانىستاعى زاڭنامالارعا ۇسىنىستار بەرۋلەرىڭىزدى سۇرايمىز. ءىرى سيفرلىق حابتار سالۋ، جوعارى دارەجەلى IT كادرلاردى دايارلاۋ بويىنشا قاجەتتى شارالار اتقارۋدى ۇسىنامىز»، - دەدى سەناتور.