قاراعاندى وبلىسىندا ەلەكتر ەنەرگياسىن جەتكىزۋشىلەر باعانى نەگىزسىز كوتەرمەك بولعان

استانا. قازاقپارات - قاراعاندى وبلىسىندا ەلەكتر ەنەرگياسىن جەتكىزۋشىلەر باعانى نەگىزسىز كوتەرمەك بولعان.

بۇل تۋرالى ق ر سىبايلاس جەمقورلىققا قارسى ءىس- قيمىل اگەنتتىگى پريەۆەنتسيا قىزمەتىنىڭ باسشىسى سايان احمەتجانوۆ ءمالىم ەتتى، دەپ حابارلايدى قازاقپارات ءتىلشىسى.

«قاراعاندى وبلىسىندا ەلەكترمەن جابدىقتاۋ قىزمەتتەرىنە باعا بەلگىلەۋگە مونيتورينگ جۇرگىزىلدى. ەلەكتر ەنەرگياسىن جەتكىزۋشى ۇيىمدا باعانىڭ وسكەندىگىن راستايتىن شوت- فاكتۋرا بولماعان. وكىلەتتى ورگاندارمەن بىرگە قابىلدانعان ءىس- شارالاردىڭ ناتيجەسىندە باعا ءوسىرۋ جوسپارى تومەندەتىلدى. وسىلايشا، ءوڭىر تۇرعىندارى 2022 -جىلدىڭ قازانىنان 2023 -جىلدىڭ قازانىنا دەيىنگى ارالىقتا 2,5 ميلليارد تەڭگەگە ەلەكتر ەنەرگياسىنا ارتىق تولەم جاساۋدان قورعالدى. بالقاش قالاسى تۇرعىندارى ءۇشىن 133 ميلليون تەڭگەگە جىلۋمەن جابدىقتاۋ، 92 ميلليون تەڭگەگە سۋمەن جابدىقتاۋ جانە سۋ بۇرۋ قىزمەتتەرىنە ارنالعان تومەندەتىلگەن وتەلەتىن تاريف ەنگىزىلدى»، - دەدى سايان احمەتجانوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ دەرەگىنشە، 2022 -جىلدىڭ 11 ايىندا سىبايلاس جەمقورلىققا قارسى 228 مونيتورينگ جۇرگىزىلدى. ونىڭ بارىسىندا 66 مەملەكەتتىك ورگاننىڭ جانە كۆازيمەملەكەتتىك سەكتور ۇيىمدارىنىڭ قىزمەتىنە سىرتقى ساراپتاما جۇرگىزىلدى. جەمقورلىق تاۋەكەلدەر مەن جاعدايلاردى جويۋ، بيزنەس- پروتسەستەردى جاقسارتۋ، اكىمشىلىك كەدەرگىلەردى تومەندەتۋ، زاڭنامانى جەتىلدىرۋ بويىنشا 2 مىڭنان استام ۇسىنىس پەن ۇسىنىم بەرىلدى. بۇگىندە ولاردىڭ 70 پايىزعا جۋىعى جۇزەگە اسىرىلدى.