ۇكىمەت «ارسەلورميتتال تەمىرتاۋ» بويىنشا بەلسەندى كەلىسسوزدەر باستاپ كەتتى - پرەمەر- مينيستر

قاراعاندى. قازاقپارات - ءوڭىر اكتيۆىمەن كەزدەسۋدە پرەمەر- مينيستر ءاليحان سمايىلوۆ وبلىس باسشىلىعى ەكونوميكانى، ينفراقۇرىلىمدى، كاسىپكەرلىكتى جانە الەۋمەتتىك سالانى دامىتۋ جونىندەگى شارالاردى ىسكە اسىرۋدى جالعاستىرۋى ءتيىس ەكەنىن اتاپ ءوتتى.

بۇل تۋرالى قازاقپارات ۇكىمەتتىڭ تەلەگرام كانالىنا سىلتەمە جاساپ حابارلايدى.

ۇكىمەت باسشىسى الەۋمەتتىك ماڭىزى بار ازىق- تۇلىك تاۋارلارى باعاسىنىڭ كۇرت جانە نەگىزسىز وسۋىنە جول بەرمەۋدى باستى باسىمدىقتاردىڭ ءبىرى دەپ اتادى.

«نارىقتى وتاندىق ءوندىرىستىڭ ساپالى ونىمدەرىمەن قامتاماسىز ەتۋ بويىنشا جۇمىس جۇرگىزۋ قاجەت. ونىڭ كەڭ اسسورتيمەنتى مەن جەتكىلىكتى بولۋى باعانىڭ ءوسۋىن تەجەيدى. بۇل باعىتتا اكىمدىك جۇمىس ىستەۋى كەرەك»، - دەدى ءاليحان سمايىلوۆ.

سونىمەن قاتار، پرەمەر- مينيستر مودەرنيزاتسيا قارقىنى تومەن جانە تەحنولوگيالىق جاعدايى ناشار «ارسەلورميتتال تەمىرتاۋداعى» جاعدايعا توقتالدى. ونەركاسىپتىك قاۋىپسىزدىككە نەمقۇرايلى قاراۋدىڭ سالدارىنان ءولىم- ءجىتىم كوبەيىپ بارادى. بۇگىن كاسىپورىننىڭ تاعى ءبىر قىزمەتكەرى قازا تاپتى.

«مۇنىڭ ءبارى - كومپانيا باسشىلىعىنىڭ تىكەلەي جاۋاپكەرشىلىگى. وسىعان بايلانىستى ولارعا كاسىپورىننىڭ ەشقانداي سىن كوتەرمەيتىن بارلىق باعىتتارى بويىنشا نارازىلىق ءبىلدىرىلدى. قازىر ۇكىمەت بۇل ماسەلەلەردى رەتتەۋ بويىنشا بەلسەندى كەلىسسوزدەر باستاپ كەتتى»، - دەدى ءاليحان سمايىلوۆ.

سونداي- اق، ول ونەركاسىپتىك وندىرىستەردىڭ ەكولوگيالىق جاعدايعا تيگىزەتىن زاردابىن ازايتۋ، «ساران» يندۋستريالىق ايماعىن دامىتۋ، بىلىكتى مامانداردى دايارلاۋ، جالاقىنى ۋاقتىلى تولەۋ جانە وندىرىستەگى جازاتايىم وقيعالاردىڭ الدىن الۋ ماسەلەلەرىن باقىلاۋدا ۇستاۋ قاجەتتىگىن اتاپ ءوتتى.

بۇعان دەيىن حابارلانعانىنداي، مەملەكەت باسشىسىنىڭ جارلىعىمەن قاراعاندى وبلىسىنىڭ اكىمى بولىپ ەرماعانبەت بولەكپايەۆ تاعايىندالدى.

سونداي- اق، «ارسەلورميتتال تەمىرتاۋ» ا ق مەتاللۋرگيالىق زاۋىتىنىڭ كوكسحيميالىق وندىرىسىندە اپات بولىپ، ءبىر ادام كوز جۇمدى.

«ارسەلورميتتال تەمىرتاۋ» كومپانياسىنىڭ جۇمىسى توقتاۋى مۇمكىن ەكەنى حابارلاندى.

فوتو: t.me/KZgovernment