تۇركيادا قامالعان قازاقستاندىق مۇناي تانكەرلەرىنىڭ ماسەلەسى قاشان شەشىلەدى

None
استانا. قازاقپارات - «قازمۇنايگازدىڭ» كومپانياسىنىڭ باسقارما ءتوراعاسى ماعزۇم مىرزاعاليەۆ مۇناي تيەگەن تانكەرلەردىڭ تۇركيا جاعالاۋىندا كەشىگۋى قازاقستان ەكونوميكاسىنا قالاي اسەر ەتەتىنىن ايتتى، دەپ حابارلايدى قازاقپارات ءتىلشىسى.

«بۇكىل ساقتاندىرۋ پروتسەدۋرالارى وتكىزىلگەن بولاتىن. اتالعان 6 تانكەردەگى مۇنايدىڭ قازاقستاننان شىققانى تۋرالى سەرتيفيكاتتاردى تۇركيا تاراپىنا بەرىلدى. قازىر ديالوگ جالعاسىپ جاتىر. مەن كەشە كەشكە ءبىزدىڭ سىرتقى ىستەر مينيسترىمەن دە، انكاراداعى ەلشىمەن دە سويلەستىم. ءبىزدىڭ ديپلوماتتار بىزگە ءتيىستى، قاجەتتى كومەك كورسەتىپ جاتىر. ماسەلە 1-2 كۇندە شەشىلەدى دەگەن ءۇمىتىمىز بار. ساقتاندىرۋ تۋرالى ايتساق، ونىڭ باسىم بولىگى بريتانيالىق، ەۋروپالىق كومپانيالار. ساقتاندىرۋ پروتسەدۋرالاى تياناقتى تىندىرىلعان»، - دەدى «قازمۇنايگاز» باسشىسى.

ونىڭ ايتۋىنشا، ماسەلە جۋىقتا شەشىمىن تاپسا، بۇل جاعداي قازاقستان مۇنايىنىڭ باعاسىنا كەرى اسەر ەتپەۋى كەرەك.

«بۇل ءبىزدىڭ ەكونوميكامىزعا ەشقانداي شىعىن اكەلمەيتىنىن ايتتىم. ويتكەنى جىل سايىن جەلتوقسان ايىندا بوسفوردان تانكەرلەردىڭ ءوتۋ ۋاقىتى 14 كۇنگە دەيىن بارادى. ەكونوميكاعا شىعىن ءبىز مۇناي ءوندىرۋ كولەمىن قىسقارتىپ جاتساق كەلەر ەدى. ياعني، بۇعان دەيىن قانشا قارقىنمەن مۇناي شايقاساق، قازىر دە سول كولەمدە شايقاپ جاتىرمىز. تەك تانكەرلەرگە تيەلىپ، بوسفور ارقىلى اقىرىنداپ جىلجىپ جاتىر»، - دەدى ماعزۇم مىرزاعاليەۆ.

سونداي- اق ول قازاقستان مۇحيتقا بوسفور ارقىلى عانا ەمەس، قارا تەڭىز ارقىلى دا شىعا الاتىنىن ەسكە سالدى.

«رۋمىنيا جانە بولگاريا باعىتتارى بار. قازىر جاعداي شەتىن دەۋگە كەلمەيدى. ءبىراق قازىر ءبىز ونى شەشۋمەن قىزۋ اينالىسىپ جاتىرمىز.

بۇل ماسەلە جۋىق ارادا شەشىلەدى دەپ ويلايمىز. سوندىقتان ءبىزدىڭ باعالاۋىمىزعا مۇناي باعاسىندا كورىنىس تاپپاۋى كەرەك. قازىرگى تاۋەكەل شەكتەن تىس ءبىر مەجەدەن اسىپ كەتكەن جوق»، - دەدى «قازمۇنايگاز» باسشىسى.

«كەشەگى اقپارات بويىنشا بوسفور بۇعازىندا 21-گە جۋىق تانكەر تۇرعان. ونىڭ التاۋى - «تەڭىزشيەۆرويلدىڭ» مۇنايىن تاسىمالدايتىن تانكەرلەر»، - دەدى ماعزۇم مىرزاعاليەۆ.

ونىڭ پايىمىنشا، بۇدان قازاقستان ەكونوميكاسىنا ونداي ۇلكەن قاۋىپ جوق.

«دەگەنمەن 5- جەلتوقساننان بەرى رەسەيدەن شىققان مۇنايعا شەكتەۋلەر قويىلىپ جاتقانىن ءبارىڭىز بىلەسىزدەر. ءبىزدىڭ مۇنايعا ەشقانداي شەكتەۋلەر جوق. ياعني، ەشقانداي سانكسيا دا جوق»، - دەدى ماعزۇم مىرزاعاليەۆ.

سوڭعى جاڭالىقتار