بالانىڭ ءتىلى نەگە كەش شىعادى؟ لوگوپەد كوپتى تولعاندىرعان سۇراققا جاۋاپ بەردى

استانا. قازاقپارات - قازىر بالا ءتىلىنىڭ كەش شىعۋى ءجيى كەزدەسەدى. بۇل كوپشىلىك اتا-انانى مازالايتىن جانە ۋايىمداتاتىن سۇراق.

ءبىرى ونى بالالاردىڭ گادجەتتەردە كوپ وتىرۋىنان دەسە، باسقالارى ەكولوگيانى كىنالاپ جاتادى. ءبىز بۇل سۇراق بويىنشا لوگوپەد مامانىنىڭ پىكىرىن ءبىلۋدى ۇيعاردىق.

«مارقابات» قوعامدىق قورىنىڭ ديرەكتورى جانە لوگوپەد المات تاسىبەكوۆ بالا ءتىلىنىڭ كەش شىعۋىنىڭ بىرنەشە نەگىزگى سەبەبىن اتاپ ءوتتى:

جۇكتىلىك كەزىندە انا كوڭىل كۇيىنىڭ دۇرىس بولماۋى، كۇيزەلىستە بولۋى؛

تۇقىمقۋالاۋشىلىق فاكتور؛

تاڭدايدا نە ەرىندە جىرىقتاردىڭ بولۋى؛

دىبىس شىعارۋ جۇيەسىنىڭ جۇمىس ىستەمەۋى؛

اۋىز قۋىسى بۇلشىق ەتتەرىنىڭ دۇرىس جۇمىس ىستەمەۋى؛

بالامەن سويلەسپەۋ (اتا-انانىڭ بالامەن اڭگىمەلەسپەۋىنەن، قارىم- قاتىناستان وقشاۋلانۋىنان بالانىڭ تۇيىقتالۋى)؛

قاتتى قورقىپ قالۋدان بولعان تۇتىعۋ؛

وزگە اۋرۋلاردىڭ، قولدانعان ءدارى-دارمەكتەردىڭ اسەرى؛

لوگوپەد بالا ءتىلىنىڭ كەش شىعۋىنا مۋلتفيلمدەردى كوپ كورۋ دە اسەر بەرەتىنىن ەسكەرتتى.

«مۋلتفيلم كوپ قاراۋدىڭ ءتىلدىڭ كەش شىعۋىنا اسەرى بار، ويتكەنى كورۋ، تىڭدالىم بار دا جاۋاپ بەرۋ، سويلەۋ ءتىلى جوق. ياعني، ديالوگ جوق»، - دەيدى المات تاسىبەكوۆ.

ەگەر بالا ءتىلىنىڭ كەش شىعۋىنىڭ سەبەبى انىقتالماسا، ول ەم كۋرسىن قيىنداتادى. سوندىقتان مۇنداي كەزدە كەشەندى تەكسەرىس كەرەك. ول ءۇشىن نيەۆروپاتولوگ، لوگوپەد، پسيحياتر، بالالار پسيحولوگى سەكىلدى ماماندارعا قارالۋ كەرەك. كوپ جاعدايدا باس مي جۇمىسىنا اناليز قاجەت بولادى: ە ك گ، م ر ت، ە ح و- ە گ جانە ت. ب.

مامان اتا- انالاردى بالامەن بارىنشا كوپ اڭگىمەلەسۋگە شاقىردى.

«بالا ومىرگە بىرنەشە اپتا بۇرىن كەلسە دە جانە ءسىزدى مۇلدەم تۇسىنبەسە دە، ونىمەن بارىنشا كوپ سويلەسۋگە تىرىسىڭىز. وعان ولەڭ ايتىپ بەرىڭىز. بالاعا 6 ايدان باستاپ كىتاپ وقىڭىز. بالاعا ءسوزدى انىق ايتىپ، سۋرەتتەر كورسەتىڭىز. ەگەر ول قانداي دا ءبىر دىبىسپەن ءسىزدى بولسە، ءۇزىلىس جاساپ، ونى تىڭداڭىز. بالانىڭ جەتىستىكتەرىن ماقتاڭىز. بالا كىشكەنتاي كەزىنەن باستاپ، اتا- اناسىنىڭ داۋىس ىرعاعىنان ونى ماقتاعانىن ايىرا الادى جانە تۇسىنەدى»، - دەدى المات تاسىبەكوۆ.