پارلامەنتتە ايەلدەردىڭ زەينەت جاسىنا بايلانىستى زاڭ قابىلداندى

استانا. قازاقپارات - بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك جاستار ساياساتى جانە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكى وقىلىمدا قارالىپ، قابىلداندى، دەپ حابارلايدى قازاقپارات ءتىلشىسى

.

«زاڭ جوباسىندا مىناداي ۇعىمداردى زاڭنامالىق تۇرعىدا بەكىتۋ ۇسىنىلادى: جاستاردىڭ دامۋ يندەكسى، ۋاقىتشا جۇمىسقا ورنالاسپاعان جاستار (NEET ساناتىنداعى جاستار)، جاستارمەن جۇمىس جونىندەگى مامان، جاستاردىڭ ەڭبەك جاساقتارى. سونداي-اق، قۇجات اياسىندا «جاستار» ۇعىمىنىڭ جاس شەگىن 29 دان 35 جاسقا دەيىن ۇلعايتۋ جونىندە تۇزەتۋ ەنگىزىلدى، بۇل جاستاردىڭ الەۋمەتتىك بەلسەندىلىگىن ارتتىرۋعا اسەر بەرەدى. ەكىنشىدەن، جاستارعا تۇرعىن ءۇيدى جەڭىلدىكپەن جالعا بەرۋ جونىندەگى باعدارلامانى ازىرلەۋ جانە ىسكە اسىرۋ بويىنشا جەرگىلىكتى اتقارۋشى ورگانداردىڭ قۇزىرەتىن كەڭەيتۋگە باعىتتالعان تۇزەتۋلەر كوزدەلگەن.

ايتا كەتۋ كەرەك، مەملەكەتتىك ورگانداردىڭ مەملەكەتتىك ستراتەگيالىق جوسپارلاۋ قۇجاتتارىنا، ونىڭ ىشىندە ايماقتاردى دامىتۋ باعدارلامالارىنا جاستارمەن جۇمىس بويىنشا ناقتى ينديكاتورلار، باعالاۋ كريتەرييلەرى جانە كۇتىلەتىن ناتيجەلەر ەنگىزىلەدى»، - دەدى اقپارات جانە قوعامدىق دامۋ ءمينيسترى دارحان قىدىرالى.

بۇدان باسقا، مەملەكەت باسشىسىنىڭ بيىلعى 1-قىركۇيەكتەگى قازاقستان حالقىنا ارناعان جولداۋىن ىسكە اسىرۋ ءۇشىن زاڭ جوباسى اياسىندا الەۋمەتتىك بلوكتى شەشەتىن مىناداي تۇزەتۋلەر ەنگىزىلدى:

1) بالا كۇتىمىنە بايلانىستى جاردەماقىنى بالا 1,5 جاسقا دەيىن جەتكەنشە تولەۋ؛

2) ەڭ تومەن بازالىق زەينەتاقى مولشەرىن ەڭ تومەن كۇنكورىس دەڭگەيىنەن - 70 پايىزعا دەيىن، ەڭ جوعارى بازالىق زەينەتاقى مولشەرىن 120 پايىزعا دەيىن جەتكىزۋ.

3) ايەلدەردىڭ زەينەتكە شىعۋ جاسىن 2028 -جىلعا دەيىن 61 جاس دەپ بەكىتۋ؛

4) جاسىنا بايلانىستى زەينەتاقى تولەمدەرىن ەسەپتەۋ ءۇشىن تابىس شەگىن 46 ەسەلەنگەن ايلىق ەسەپتىك كورسەتكىشتەن 55 ەسەلەنگەن ايلىق ەسەپتىك كورسەتكىشكە دەيىن ۇلعايتۋ.

«جاستارىمىزدىڭ ءبىلىم الۋى، جۇمىسقا ورنالاسۋى، دەنساۋلىعى، ءوزىن-ءوزى دامىتۋى، ەلىمىزدىڭ الەۋمەتتىك- ەكونوميكالىق جانە قوعامدىق- ساياسي ومىرىنە تولىققاندى قاتىسۋى ءۇشىن تەڭ مۇمكىندىك پەن قولايلى جاعداي جاساۋ - كەزەك كۇتتىرمەيتىن كوكەيكەستى ماسەلە ەكەنى بەلگىلى. زاڭ جوباسى ساراپشىلار مەن قوعام بەلسەندىلەرى تاراپىنان تالقىلاندى. اتالعان زاڭ جوباسىن قابىلداۋ جاستار ساياساتىن ىسكە اسىرۋ بويىنشا مەملەكەتتىك ورگاندار قىزمەتىنىڭ تيىمدىلىگىن ارتتىرۋعا مۇمكىندىك بەرەدى دەپ سانايمىز»، - دەدى مينيستر.