قازاقستاندا جاڭا كولىكتەر باسقا ەلدەرمەن سالىستىرعاندا ارزانىراق بولىپ شىقتى

استانا. قازاقپارت - كولىك ونەركاسىبى بيىل ميكروچيپ تاپشىلىعىنا، كوروناۆيرۋس شەكتەۋلەرىنە جانە ەۋروپاداعى گەوساياسي داعدارىستان ناشارلاعان لوگيستيكاعا بايلانىستى تۋىنداعان پروبلەمالاردان زارداپ شەكتى.

كەيبىر ەلدەردە جەڭىل كولىك پەن جەڭىل كوممەرتسيالىق تەحنيكا ءوندىرىسى ءالى كۇنگە دەيىن 2021 -جىلدىڭ كورسەتكىشتەرىنە جەتە الماي وتىر، - دەپ حابارلايدى Energyprom.kz.

ماسەلەن، 2022 -جىلعى ءۇش توقساندا ا ق ش-تا جەڭىل كولىكتەر مەن جەڭىل كوممەرتسيالىق تەحنيكا ءوندىرىسى شامامەن 7,4 ميلليون بولعان، بۇل بىلتىرمەن سالىستىرعاندا، 11,4 پايىزعا ارتىق. گەرمانيا مەن وڭتۇستىك كورەيادا دا وسىنداي جاعداي بايقالعان: بىلتىرمەن سالىستىرعاندا ءوندىرىس سايكەسىنشە 8,8 پايىزعا جانە 4,6 پايىزعا وسكەن. ءبىراق 2019 -جىلمەن سالىستىرعاندا كورسەتكىش 29,6 پايىزعا جانە 7,5 پايىزعا تومەن.

بىلتىرمەن سالىستىرعاندا تومەن كورسەتكىش بايقالعان ەلدەر قاتارىندا فرانسيا (11,7 پايىز)، ۇلى بريتانيا (8 پايىز) جانە جاپونيا (2,2 پايىز) بار. سونىمەن قاتار، 2019 -جىلمەن سالىستىرعاندا بۇل ەلدەردەگى ءوندىرىس بىردەن سايكەسىنشە 45,4 پايىز، 37,5 پايىز جانە 22,7 پايىزعا تومەندەگەن. كورشىلەس رەسەيدە توعىز ايدىڭ قورىتىندىسى بويىنشا كولىك ءوندىرىسى بىلتىرعىعا قاراعاندا 75,1 پايىزعا جانە 2019 -جىلعا قاراعاندا 68,3 پايىزعا تومەندەگەن.

قازاقستاندا جەڭىل كولىك پەن جەڭىل كوممەرتسيالىق تەحنيكا ءوندىرىسى ارتىپ كەلە جاتىر. 2021 -جىلدىڭ توعىز ايىمەن سالىستىرعاندا ءوندىرىس 29,8 پايىزعا وسكەن.

الەمدە جاڭا جەڭىل اۆتوموبيلدەر مەن جەڭىل كوممەرتسيالىق تەحنيكا ساتىلىمى بىلتىرعىمەن سالىستىرعاندا شامامەن بىردەي. 2022 -جىلعى قاڭتار مەن قىركۇيەك ارالىعىندا 59,5 ميلليون بولعان، ياعني تەك 2 پايىزعا از. بۇل رەتتە 2019 -جىلعىمەن سالىستىرعاندا ساتىلىم ءالى دە 11,1 پايىزعا تومەن.

قازاقستاندا ساتىلىم 2019 -جىلعى كورسەتكىشتەرگە قاراعاندا بىردەن 67,6 پايىزعا وسكەن. ءبىرىنشى كەزەكتە وتاندىق كولىكتەردىڭ ءوندىرىسى مەن ساتىلىمداعى ۇلەسى ارتقان.

Energyprom.kz ساراپشىلارى زەرتتەۋ جۇرگىزىپ، قازاقستان مەن باسقا ەلدەردە جاڭا اۆتوموبيلدەر مەن جيىنتىقتىڭ قۇنىن سالىستىرعان. قازاقستاندا تانىمال ماركالى اۆتوموبيلدەر ارزانىراق ەكەنى انىقتالعان. ماسەلەن، 4.4 قوزعالتقىشى بار جاڭا BMW X5 M50i قۇنى قازاقستاندا 110,5 مىڭ ا ق ش دوللارى، رەسەيدە 138,8 مىڭ دوللارىنا باعالانعان.

قازاقستاندىقتار اراسىندا تانىمال Toyota Corolla-نى قازاقستاندا باسقا ەلدەرگە قاراعاندا ساتىپ الۋ تيىمدىرەك ەكەنى بەلگىلى بولدى. ماسەلەن، قازاقستاندا 1.6 CVT قوزعالتقىشىنىڭ كولەمى بار Comfort جيىنتىعى 26,4 مىڭ ا ق ش دوللارى بولادى. كورشى رەسەيدە 35,7 مىڭ دوللار تۇرادى. ارمەنيادا 46,6 مىڭ ا ق ش دوللارىنا باعالانعان.

Hyundai Tucson-نىڭ اتاۋلارى ءار ەلدە ءارتۇرلى. ايتالىق، قازاقستاندا Hyundai Tucson Travel (2.5 GDI) 31,6 مىڭ دوللار تۇرادى. ال رەسەيدە Hyundai Tucson Family (مودەل ازداپ ەرەكشەلەنەدى) 47,9 مىڭ دوللار تۇرادى. بەلارۋس پەن وزبەكستاندا اۆتوموبيل Style جانە Luxe جيىنتىقتامالارىندا 53,9 مىڭ جانە 46,6 مىڭ ا ق ش دوللارىمەن ۇسىنىلعان.

Haval Jolion Elite (1.5 2WD) ق ر ديلەرلەرىندە 26,4 مىڭ دوللار تۇرادى. بەلارۋستە 32,1 مىڭ دوللار. رەسەيدە 36,8 مىڭ دوللار. Chery Tiggo 7 PRO (1.5 Turbo) قازاقستاندا Premium جيىنتىعىندا 26,4 مىڭ دوللارعا باعالانادى. رەسەيدە Elite جيىنتىعى 43,8 مىڭ دوللار بولادى. بۇل رەتتە وزبەكستاندا Chery Tiggo 7 PRO Luxury جيىنتىعىنىڭ قۇنى 26,9 مىڭ دوللار.