جۇبايلاردىڭ ءتۇسىنىسۋ تەورەماسى

استانا. قازاقپارات - بىرىنشىدەن، ايەل ادامنىڭ وزىنەن نە قالايتىنىن ەر كىسىلەر جاقسى ءبىلۋى ءتيىس.

ەرلەر كوبىنە «اقشا تاۋىپ جاتىرمىن، اپتا سوڭى ۇيدەمىن، ءۇي ىستەرىنە دە كومەكتەسەم، بۇعان ودان ارتىق نە كەرەك؟» دەپ ويلايدى بۇنداي جايتتاردىڭ ايەل ءۇشىن ءبىرىنشى ورىندا ەمەس ەكەنىن ولار ەسكەرە بەرمەيدى.

جىگىتتەر ايەلدەر ءۇشىن ءبىرىنشى جايتتىڭ ماحاببات ەكەنىن ۇعىنبايدى. ءبىراق، بۇل جايداق ماحاببات ەمەس، قات-قابات تىرشىلىكتىڭ اراسىندا قۇنىن جويمايتىن وتە نازىك تە كىرشىكسىز ماحاببات.

شىنايى ءىس-ارەكەت پەن جىلى سوزدەر ايەل كوڭىلىن كوتەرىپ، وعان قۋانىش سىيلايدى، ءوزىن باقىتتى سەزدىرەدى. مىنە، ايەلگە كەرەگى وسى.

ەكىنشىدەن، ەر كىسىلەرگە دە كەرەگى وسى ەكەنىن ايەلدەر ۇمىتپاۋى كەرەك. ەر ازاماتتار ءۇشىن دە ايەلدەرىنىڭ وزدەرىنە كورسەتەتىن ماحابباتى، بابىن تاۋىپ، قۇرمەت كورسەتۋى، قولداۋى ءبىرىنشى ورىندا تۇرادى. ايەلىنەن اسىپ ەشكىم دە ەر كىسىگە ىقپال ەتە المايدى. ەر كىسىنى باقىتتى، تابىستى، وزىنە سەنىمدى ەتەتىن دە ونىڭ ايەلى.

ايەل مەن ەركەك وسى سەكىلدى ەرەكشەلىكتەرىن تۇسىنبەگەندىكتەن ولاردىڭ اراسىندا كەلىسپەۋشىلىكتەر تۋرادى. بۇنداي وتباسىندا ىرىڭ-جىرىڭ، ۇرىس-كەرىس ۇزىلمەيدى.

بۇنىڭ بىردەن-ءبىر سەبەبى - وزىمشىلدىك. ءوزىمشىل ادامنىڭ وزگەنى ماحابباتقا مالىندىرۋى قيىن. ايەلىنەن سىي-قۇرمەت كورمەگەن ەر كىسى ايەلىنە قاتتىلىق كورسەتە باستايدى. ال كۇيەۋىنەن جىلىلىق كورمەسە، ايەل ونىسىن قىرسىعۋ، قارسىلاسۋ، قىرشاڭقى سوزدەرمەن ءتيىسۋ، نە بولسا سودان ۇرىس شىعارۋ ارقىلى بىلدىرەدى.

ەر كىسى «ايەلىم مەنى قاشان قۇرمەتتەسە، مەن سول كەزدە ونى جاقسى كورەم، ەركەلەتەم» دەپ ويلايدى. ال ايەلى «مەنى جاقسى كورمەگەن ادامدى مەن قالاي قۇرمەتتەمەكپىن؟!» دەگەن ويدا بولادى. مىنە، بۇنداي ويداعى جۇپتار ەشقاشان دا ءبىر-بىرىمەن جاراسا المايدى. ولار اجىراسۋدىڭ ار جاق، بەر جاعىندا جۇرەدى.

الايدا، اجىراسۋ - ەشقانداي دا شەشىم ەمەس، ول پروبلەمادان قاشۋ. ءالسىز ادامدار عانا قاشادى، مىقتى ادامدار سول پروبلەمانى شەشۋدىڭ جولدارىن قاراستىرادى. شىنداپ كەلگەندە ەرلى-زايىپتىلار اراسىنداعى ماحاببات وشپەيدى، ول تەك ءتۇرلى سەبەپتەرمەن كومەسكى تارتادى. جۇرەك تۇكپىرىندە ولاردىڭ ءبىر-بىرىنە دەگەن ماحابباتتارى ساقتالادى. ولار سول سەبەپتەردى شەشەمىز دەپ باس قاتىرعاننان گورى ماحابباتتىڭ ءوزىن قۇرباندىق قىپ شالىپ جىبەرەدى.

بۇل ەشقانداي جاقسىلىق ەمەس، ەكى ارادا بالالار شۋلاپ قالادى، ەرلى-زايىپتىلاردىڭ وزدەرىنە دە جامان اتاق كەلەدى، ءبىر شاڭىراق ءوز-وزىنەن كۇيرەيدى.

ال، ماحاببات جولىندا جەڭىسكە جەتەتىندەر - ءوزىمشىل ەمەس ەر كوڭىلدىلەر. ونداي ادامدار ءبىر-بىرىنە سۇيسپەنشىلىك كورسەتە الادى. وزدەرىنە ماحاببات كۇتپەيدى دە. ولار ءبارىن وڭ وزگەرتۋگە بەيىل. ولاي بولسا، بۇنداي ادامدار جەڭىمپاز كەلەتىندىكتەن جەكە ومىردە جولدارى بولادى.

سۇيىسپەنشىلىكتى قالاي قايتا قالىپقا كەلتىرۋگە بولادى؟

ءبىر-بىرىڭىزدەن نە كۇتەسىزدەر، سونى اشىق تالقىلاۋعا سالىپ سىرلاسىڭىزدار.

ءوز قاتەلىكتەرىڭىز ءۇشىن كەشىرىم سۇراي ءبىلىڭىز. جۇبايىڭىزدى ەشقاشان كىنالاماڭىز.

ءوزىڭىزدى جانە بار جاقسى قاسيەتىڭىزدى جۇبايىڭىزعا ارناي ءبىلىڭىز.

وزىمشىلدىكتەن ارىلۋعا تىرىسىڭىز.

الايدا مىنانى ەسىڭىزدە ۇستاڭىز: جۇبايىڭىزدى باقىتتى ەتۋ ءۇشىن ءوزىڭىز دە باقىتتى بولۋىڭىز كەرەك.

ونىڭ اداستىرماس جولى يماندىلىققا جەتۋ ەكەنىن ۇمىتپاڭىز.

دەرەككوزى: muftyat.kz