شىعىنعا باتقان «شىنايى» فيلمدەر
8 جەلتوقسان, 09:03

شىعىنعا باتقان «شىنايى» فيلمدەر

استانا. قازاقپارات - كينو ونەرى ارقىلى مول تابىسقا كەنەلگەندەرمەن قاتار، زور شىعىنعا ۇشىراعاندار دا جەتەرلىك. ءبىر تۋىندىنى ەكرانعا شىعارۋ ءۇشىن قانشاما ادام ماڭداي تەرىن توگىپ، قارىم- قابىلەتىن جۇمساپ ەڭبەك ەتەدى.

جوسپارلانعان جوبانى جۇزەگە اسىرۋ جولىندا قىرۋار قارجى جۇمسالىپ، ءتۇسىرۋشى توپ سول شىعىننىڭ ورنى تولارىنا سەنىپ، ەڭبەك ەتەدى. ءيا، كوبىنەسە مول قارجى قۇيىلعان فيلمدەر ەكرانعا شىعىپ، كورەرمەنگە جول تارتقاننان باستاپ- اق كەتكەن شىعىننىڭ ورنىن ەسەلەپ جاۋىپ جاتادى.

ءبىراق سالىنعان قارجىنى قايتارا الماي قالاتىن تۋىندىلار دا باستان اسادى. ارينە، بۇگىندە كينو ءوندىرىسى جونىنەن ا ق ش- تىڭ الدىن ورايتىن ەل تابىلمايدى. بۇل ەلدە جىل سايىن ەكراننىڭ جۇزدەگەن جاڭا جۇلدىزدارى جانىپ، ەسكىلەرى ءسونىپ جاتاتىنى كوپكە ءمالىم. امەريكالىق كينوستۋديالار ءارتۇرلى جانرداعى فيلمدەردى كۇن سايىن تولاسسىز شىعاراتىن الىپ فابريكا سياقتى. وسى ا ق ش- تا تۇسىرىلگەن فيلمدەردىڭ ىشىندەگى ەڭ ءساتسىزى قايسى؟

كينو ماماندارىنىڭ زەرتتەۋىنشە، 1997 - جىلى ەكرانعا شىققان «بەتمەن جانە روبين» اتالعان ەلدىڭ كينەماتوگرافياسىنداعى ەڭ ناشار تۋىندى ەكەن. رەجيسسەر دجوەل شۋماحەر تۇسىرگەن بۇل فيلمدە دجوردج كلۋني، ارنولد شۆارسەنەگگەر، كريس ودوننەلل جانە اليسيا سيلۆەرستوۋن سىندى ەسىمدەرى الەمگە ايگىلى اكتەرلار ويناعان بولاتىن. الايدا ولارعا تولەنگەن قىرۋار قالاماقى قۇر بوسقا جەلگە ۇشتى. ءساتسىز فيلمدەردىڭ ەكىنشىسى رەتىندە ماماندار «سوعىستان كەيىن - جەر» اتتى فانتاستيكالىق ەپوپەياسىن اتاعان كورىنەدى. بۇل - بەلگىلى اكتەر دجون تراۆولتانىڭ پروديۋسەر رەتىندەگى تىرناقالدى تۋىندىسى سانالادى. فيلم 2000 - جىلى سايەنتولوگيا شىركەۋىنىڭ نەگىزىن قالاۋشى، فانتاست- جازۋشى رونن حابباردتىڭ شىعارماسىنىڭ نەگىزىندە تۇسىرىلگەن.

1980 - جىلى ءتۇسىرىلىپ، قالىڭ جۇرتشىلىقتىڭ نازارىنا ۇسىنىلعان «تيتانيكتى كوتەرۋ» فيلمى دە ءساتسىز لەنتالار قاتارىنان ورىن تەپتى. شىتىرمان وقيعالى دراما رەتىندە جارىققا شىققان تۋىندىنىڭ رەجيسسەرى - دجەرري دجەيمسون بولاتىن. سونداي- اق مامانداردىڭ پىكىرىنشە، ءۇمىتتى اقتاماعان فيلمدەردىڭ قاتارىندا «جۇماق قاقپاسى» (1980 ج. ) ، «كارتوپ ساتۋشىلاردىڭ جەكە ءومىرى» (2004 ج.)، «قۇبىلىس» (2008 ج.) جانە «بولمە» (2003 ج.) بار.

ەندى ناقتى سانداردى سويلەتىپ كورەلىك. ياعني قاي كينوفيلمنىڭ تۇسىرىلۋىنە قانشا قارجى سالىنىپ، ونىڭ قانشالىقتى شىعىنعا باتقانىنا كوز جۇگىرتەيىك. بۇل تىزىمدە 1-ورىندى «باسكەسەرلەر ارالى» فيلمى يەلەنەدى. 1995 - جىلى ا ق ش، گەرمانيا، فرانسيا جانە يتاليا كينوگەرلەرى بىرلەسىپ تۇسىرگەن تۋىندى شىعىنعا بەلشەدەن باتقان ەكەن. رەجيسسەر رەنني حارليننىڭ جەتەكشىلىگىمەن جۇزەگە اسقان جوباعا 115 ميلليون ا ق ش دوللارى جۇمسالىپتى. ال بۇل فيلمنىڭ كاسسالىق كىرىسى بار بولعانى 10 ميلليون دوللار. سوندا باقانداي 105 ميلليون دوللار سۋعا كەتكەن ەكەن. ەگەر ينفلياسيانى ەسەپكە الىپ ساناساق، فيلمنىڭ 147 ميلليون دوللار كولەمىندە شىعىنعا باتقانىنا كوز جەتكىزەمىز.

«باسكەسەرلەر ارالىندا» باستى رولدەردى تانىمال اكتەرلەر دجينا دەۆيس پەن مەتتيۋ موداين سومداعان جانە رەجيسسەردىڭ ءوزى دە وسالدار ساناتىنان ەمەس- تىن. ول - كورەرمەندەر كوڭىلىنەن شىققان «كرەپكي ورەشەك - 2»، «سكالولاز» فيلمدەرىن تۇسىرگەن مامان. 2-ورىندا «الامو فورتى» فيلمى. رەجيسسەرى - دجون لي حەنكوك. جانرى - تاريحي دراما. بۇل شىعارمادا 1836- جىلدىڭ اقپان- ناۋرىز ايلارىندا ورىن العان تەحاس كوتەرىلىسى كەزىندەگى الامو فورتىنداعى شايقاس سۋرەتتەلەدى.

ءدال وسى تاقىرىپتا 1960 - جىلى دا فيلم ءتۇسىرىلىپ، كورەرمەن قاۋىم دجون ۋەيننىڭ ەڭبەگىنە كۋا بولعان ەدى. ول كەزدەگىمەن سالىستىرعاندا، دجون لي حەنكوك سەناريدى بارىنشا وزگەرتىپ، كورەرمەنگە وقيعانىڭ ساياسي استارىن اشىپ كورسەتتى. الايدا بۇل فيلم دە نەگە ەكەنى بەلگىسىز ءوز- ءوزىن اقتاي المادى. باستى رولدەردە دەنيس كۋەيد پەن بيللي بوب تورنتون ويناعان تۋىندىعا 145 ميلليون دوللار جۇمسالعان بولسا، كورسەتىلىمدەر بارىسىندا كينولەنتا نەبارى 26 ميلليوننىڭ باسىن قۇرادى. ينفلياسيانى ەسكەرەر بولساق، فيلمنىڭ شىعىنى 135 ميلليون ا ق ش دوللارىنا تەڭ. 2002 - جىلى جارىققا شىققان «پلۋتو نەشتىڭ باستان كەشكەندەرى» كارتيناسىنا دا ا ق ش پەن اۆستراليا ەلدەرىنىڭ وكىلدەرى ورتاقتاسا تەر توكتى. ءبىراق فانتاستيكالىق كومەديا جانرىن نەگىزگە العان فيلم جۇمىسشى توپتىڭ ءۇمىتىن اقتامادى. رەجيسسەر رون اندەرۆۋدتىڭ وتكەن عاسىردىڭ 50-جىلدارىنداعى فانتاستيكالىق فيلمدەرگە پاروديا جاساماق بولعان ارەكەتى جەمىسسىز قالدى. بۇندا دا باستى رولدەرگە تانىمال اكتەرلار شاقىرىلدى: ەددي مەرفي، رەندي كۋەيد جانە روزاريو دوۋسون. فيلمدى ءتۇسىرۋ ءۇشىن 120 ميلليون دوللار سارپ ەتىلدى. ايتكەنمەن، ونىڭ كاسسالىق كىرىسى 7 ميلليوننان اسپاي قالدى. ينفلياسيانىڭ اسەرىن قاپەرگە الساق، «پلۋتو نەشتىڭ باستان كەشكەندەرى» 134 ميلليون دوللاردى جۇتىپ قويدى.

شىعىنعا باتقان فيلمدەر ءتىزىمىنىڭ 4-ساتىسىندا «ساحارا» تۇر. ونى گەرمانيا، ۇلى بريتانيا جانە يسپانيا ەلدەرىنىڭ ماماندارى 2005 - جىلى تۇسىرگەن بولاتىن. شىتىرمان وقيعالار جەلىسىنە قۇرىلعان كينولەنتاعا ءتۇسۋ مارتەبەسى بۇرىمدىلاردىڭ سۇيىكتىسى مەتتيۋ ماككوناحي مەن بىلەكتىلەردىڭ كوڭىلىن جاۋلاعان پەنەلوپا كرۋزعا بۇيىردى. ولار، ارينە، وزدەرىنە تيەسىلى گونوراردى ساناپ الدى، ءبىراق فيلمدى تۇسىرۋشىلەر مول شىعىنعا باتتى. رەجيسسەر برەك ەيسنەر «ساحاراعا» جۇمسالعان 241 ميلليون دوللاردىڭ تەڭ جارىمىنا جۋىعىن عانا قايتارا الدى. ينفلياسيانى العا تارتا ەسەپتەگەندە، ول 133 ميلليون دوللار شىعىن اكەلدى.

1999 - جىلى ەكرانعا جول تارتقان «13- جاۋىنگەر» تاريحي فيلمى دە ساتسىزدىككە ۇشىرادى. دجون ماك تيرناننىڭ رەجيسسەرلىعىمەن تۇسىرىلگەن بۇل تۋىندىدا باستى رولدەردى انتونيو باندەراس پەن ومار شارىپ وينادى. 160 ميلليون دوللاردى شىعىن ەتكەن فيلم كورسەتىلىمدەر بارىسىندا 62 اق ميلليون دوللار كىرىس اكەلدى. «13- جاۋىنگەردىڭ» ينفلياسيانى ەسەپكە العانداعى شىعىنى - 126 ميلليون ا ق ش دوللارى.

رەجيسسەر پيتەر چەلسومنىڭ اتى ەستىگەن قۇلاقتى ەلەڭ ەتكىزەر «قالا جانە اۋىل» فيلمى دە ءۇمىتتى اقتاماعاندار قاتارىن تولىقتىردى. 2001- جىلى ا ق ش- تا تاسپاعا تۇسكەن تۋىندىنىڭ جەلىسى كومەدياعا قۇرىلعان. ونداعى كەيىپكەرلەر وبرازىن سومداۋ ۋوررەن بيتتي، دايان كيتون، ەندي ماك داۋەلل، گولدي حوۋون سياقتى اكتەرلارعا جۇكتەلدى. ورتا جاستاعى توقىراۋ كەزەڭىن باستان وتكەرىپ، سۇيگەنىنىڭ كوزىنە ءشوپ سالاتىن ادامنىڭ ومىرىندەگى قىزىقتى وقيعالاردى بايانداۋدى نيەت ەتكەن مامان سول جاعدايعا ءتان كورىنىستەردى دىتتەگەن جەرىنە جەتكىزە سۋرەتتەپ بەرە الماعان. ءبىر- بىرىمەن ۇيلەسپەيتىن وقيعالار جەلىسى ءسوز جوق رەجيسسەر باستاعان شىعارماشىل توپتىڭ قاتەلىكتەرىن تايعا تاڭبا باسقانداي ەتىپ كورسەتەدى. سوندىقتان دا بولار، فيلمدى ءتۇسىرۋ بارىسىندا جۇمسالعان 105 ميلليون دوللاردىڭ تەك 10 پايىزدايى عانا كەرى قايتتى. ينفلياسيانى ەسكەرسەك، «قالا مەن اۋىل» 115 ميلليونعا شىعىندالعان ەكەن.

جوعارىداعى كينو ماماندارىنىڭ «قارا تىزىمىنە» ىلىككەن «جۇماق قاقپاسى» فيلمىنە دە قوماقتى قارجى (44 ميلليون اقش دوللارى) ءبولىنىپتى. ال ول نەبارى 3 ميلليوندىق كىرىس بەرىپتى. 1980 - جىلى شىققان فيلمنىڭ رەجيسسەرى مايكل چيمينو، باستى رولدەردەگى اكتەرلارى - كريس كريستوفەرسون، كريستوفەر ۋوكەن، دجەفف بريدجەس. بۇدان ارى قاراي ««شتەگى رۋحتار» (2001 ج. ا ق ش، جاپونيا) ، «ينچحون» (1981 ج. وڭتۇستىك كورەيا، ا ق ش) ، «قازىنالار پلانەتاسى» (2002 ج. ا ق ش)، «پوشتا تاسۋشى» (1997 ا ق ش)، «قىزىل پلانەتا» (2000 ج. ا ق ش، اۆستراليا)، «سارباز» (1998 ج. ا ق ش، ۇلى بريتانيا) ت. ب فيلمدەر بار. وسىلاردىڭ قاي قايسىسىنا دا ميلليونداعان دوللار قارجى قۇيىلدى. ءبىراق قايتارىمى تىم ماردىمسىز بولدى.

شالقار ەستەن

دەرەككوزى: «ايقىن» گازەتى. 2011

جاڭالىقتار