گەرمانيادا مەملەكەتتىك توڭكەرىس جاساماق بولعانداردىڭ ماقساتى نە
ال 50 دەن استام ادام كۇدىككە ىلىنگەن.
جالپى گەرمانيادا مەملەكەتتىك توڭكەرىس جاساماق بولعان كىمدەر جانە ولار قانداي جولمەن بيلىكتى باسىپ العىسى كەلگەنى جايلى قازاقپارات ساراپشىسىنىڭ ماتەريالىندا.
گەرمانيا پوليتسياسى مەملەكەتتىك توڭكەرىس جاساماق بولىپ بۋندەستاگقا (گەرمانيا پارلامەنتى) باسىپ كىرۋدى جوسپارلاعان «رەيحسبۋرگەر» اتتى وڭشىل ەكسترەميستەر توبىنا قارسى وپەراتسيا جۇرگىزىپ جاتىر. بۇل تۋرالى نەمىستىڭ Zeit گازەتى حابارلادى.
اتالعان گازەتتىڭ جازۋىنشا، گەرمانيادا سارسەنبى كۇنى تاڭەرتەڭ توڭكەرىس جاساۋعا دايىندالدى دەگەن كۇدىكپەن ونداعان ادام ۇستالدى. تاڭەرتەڭنەن بەرى ەل بويىنشا 3000 پوليتسيا قىزمەتكەرى 130 دان استام ءۇي مەن پاتەردە ءتىنتۋ جۇمىستارىن جۇرگىزىپ جاتىر.
توڭكەرىس جاساماق بولعانداردىڭ ارتىندا كىم تۇر؟
قازىرگى كەزدە مەملەكەتتىك توڭكەرىس جاساۋعا قاتىسى بار دەگەن ايىپپەن 52 ادام كۇدىككە ىلىنگەن. وڭشىل تەرروريستىك ۇيىمعا مۇشە بولعان نەمەسە ونى قولداعان 25 ادام قازىردىڭ وزىندە ۇستالىپ، قاماۋعا الىندى. باس پروكۋراتۋرانىڭ دەرەگىنشە، ولار ەلدىڭ ءار ايماعىندا، اتاپ ايتساق، بادەن-ۆيۋرتەمبەرگ، باۆاريا، بەرلين، گەسسەن، ساكسونيا، تومەنگى ساكسونيا، تيۋرينگيا، سونداي-اق اۋستريانىڭ كيتتسبيۋەل جانە يتاليانىڭ پەرۋدجا قالالارىندا تۇتقىندالعان.
سونىمەن قوسا قۇقىق قورعاۋ ورگاندارى كۇدىكتىلەر قاتارىندا تيۋرينگيا حانزاداسى گەنريح XIII پەن گەرمانيا پارلامەنتىنىڭ بۇرىنعى مۇشەسى بيرگيت مالزاك- ۆينكەمان بار ەكەنىن ءمالىم ەتىپ وتىر. اتى اتالعان نەمىستىڭ جوعارى لاۋازىمدى تۇلعالارى قازىر قاماۋدا.
ياعني بۇگىن ءتىنتۋ جۇرگىزىلگەن نىسانداردىڭ ىشىندە «گەرمانيا ءۇشىن بالاما» وڭشىل پارتياسىنان بۋندەستاگتىڭ بۇرىنعى دەپۋتاتى بيرگيت مالزاك-ۆينكەماننىڭ ءۇيى دە بار. جۋرناليستەر تاڭعى ساعات 6 شاماسىندا ارنايى جاساق بەرليندەگى ۆانزي تۇرعىن اۋدانىنداعى تاۋنحاۋسقا بارىپ، ەسىكتى بۇزىپ كىرگەنىن جازعان.
بۋندەستاگتان كەتكەننەن كەيىن بيرگيت مالساك-ۆينكەمان بەرلين اۋداندىق سوتىنا سۋديا بولىپ ورنالاسقان. بەرليننىڭ ادىلەت سەناتورى بيىلعى ماۋسىم ايىندا مالساك-ۆينكەماننىڭ كونستيتۋتسياعا ادالدىعىنا كۇمان كەلتىرىپ، ونى ۋاقىتشا قىزمەتىنەن بوساتۋ تۋرالى ءوتىنىش بەرگەن. الايدا اكىمشىلىك سوت بۇل ءوتىنىشتى قابىلدامادى. دەگەنمەن ونىڭ اتالعان توپتا قانداي ءرول اتقارعانى تۋرالى اقپارات ءالى بەلگىسىز.
ال حانزادا گەنري XIII 1918-جىلعى قاراشا ريەۆوليۋتسياسىنا دەيىن قازىرگى تيۋرينگيا اۋماعىن باسقارعان ەسكى دۆوريان وتباسىنان شىققان. اتالعان وتباسى مۇشەلەرىنىڭ گەرمانيا جەرىندە بىرنەشە سارايى بار ەكەنى بەلگىلى.
توڭكەرىس جاساماق بولعانداردىڭ ماقساتى نە؟
سوتقا دەيىنگى تەرگەپ-تەكسەرۋ دەرەكتەرى بويىنشا، توڭكەرىس جاساماق بولعاندار ەكى قاناتقا بولىنگەن، ولار - «كەڭەس» دەپ اتالاتىن ساياسي قانات جانە قارۋدىڭ كومەگىمەن گ ف ر ۇكىمەتىن قۇلاتۋدى ماقسات ەتكەن اسكەري قانات. ولاردىڭ كەيبىرەۋى بۋندەستاگقا شابۋىل جاساپ، نەمىس دەپۋتاتتارىن كەپىلگە الۋدى دا جوسپارلاعان.
ال حالىقتى وزدەرىنىڭ سوڭىنان ەرتۋ ءۇشىن ەلدەگى ەلەكتر جارىعىن ءوشىرۋدى كوزدەگەن.
سونىمەن قوسا ولار بولاشاق ۇكىمەتتە كىمنىڭ قانداي قىزمەت اتقاراتىنىنا دەيىن بەلگىلەپ قويعان. دەرەككوزگە سايكەس، «جاڭارعان» مەملەكەتتى حانزادا گەنري باسقارادى دەپ كەلىسىلگەن. 2013-2021-جىلدار ارالىعىندا پارلامەنت دەپۋتاتى بولعان 58 جاستاعى مالزاك-ۆينكەماندى ادىلەت ءمينيسترى ەتىپ تاعايىنداعان. جوعارىدا بۇگىن تاڭەرتەڭ ەكەۋى دە ۇستالعانىن اتاپ وتتىك.
اقپارات بويىنشا، توڭكەرىس جاساۋعا تالپىنعاندار وزدەرىنىڭ جوسپارىن ناقتى قاي ۋاقىتتا ىسكە اسىراتىنىن ءالى بەلگىلەمەگەن. كەيبىرەۋلەر مۇنى بريتان پاتشايىمى قايتىس بولعان كۇنى جاساعىسى كەلگەن بولسا، ال باسقالارى توڭكەرىستى قانداي دا ءبىر تابيعي اپاتپەن بايلانىستىرۋدى ۇسىنعان.
Bild گازەتى اتالعان توپتىڭ ارەكەتىنە قاتىستى تەرگەۋ تامىز ايىندا باستالعانىن جازدى. باسىلىمنىڭ حابارلاۋىنشا، وڭشىل راديكالدار گەرمانيادا بيلىكتى باسىپ الۋدى جانە مونارحيالىق پرينتسيپتەرگە نەگىزدەلگەن جاڭا مەملەكەتتىك اپپارات قۇرۋدى جوسپارلاعان.
«بۇل - سوڭعى جىلدارداعى تەرروريزمگە قارسى ەڭ ءىرى وپەراتسيالاردىڭ ءبىرى»، - دەپ جازدى نەمىس گازەتتەرى.
ال Zeit باسىلىمىنىڭ جازۋىنشا، كۇدىكتىلەردىڭ جوسپارى «بۋندەستاگقا قارۋلى شابۋىل جاساۋ جانە ساياساتكەرلەردى ۇستاۋ» بولعان. ولار كۇش قۇرىلىمدارىنىڭ كەيبىر قىزمەتكەرلەرى لاڭكەستىك توپقا قوسىلىپ كەتىپ، سوڭى «توڭكەرىسكە» ۇلاسادى دەپ جوسپارلاعان.
ايتا كەتەيىك، بۇعان دەيىن نەمىس پوليتسياسى مونارحيالىق رەجيمدى قالپىنا كەلتىرۋ ءۇشىن مەملەكەتتىك توڭكەرىس جاساۋعا دايىندالىپ جاتقان «رەيحسبۋرگەر» لاڭكەستىك ۇيىمىن باسقاردى دەگەن كۇدىكپەن 75 جاستاعى زەينەتكەردى تۇتقىنداعانى جايلى حابارلانعان ەدى. ايەل باسقارعان توپ ەنەرگەتيكالىق ينفراقۇرىلىم نىساندارىنا ديۆەرسيا جاساۋ ارقىلى گەرمانيادا ازاماتتىق سوعىس اشۋدى كوزدەگەن.