پارادان باس تارتقان الماتىلىق ەكولوگتىڭ قىزمەتى وسەتىن بولدى
بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە ق ر ەكولوگيا، گەولوگيا جانە تابيعي رەسۋرستار مينيسترلىگى ەكولوگيالىق رەتتەۋ جانە باقىلاۋ كوميتەتىنىڭ ءتوراعاسى زۇلفۋحار جولداسوۆ ءمالىم ەتتى، دەپ حابارلايدى قازاقپارات ءتىلشىسى.
كوميتەت ءتوراعاسى 75 ميلليون تەڭگە پارادان باس تارتقان الماتى قالاسى بويىنشا ەكولوگيا دەپارتامەنتىنىڭ قىزمەتكەرىن كوتەرمەلەۋ تۋرالى سۇراققا جاۋاپ بەردى.
ونىڭ ايتۋىنشا، بۇل ەكولوگيا قىزمەتكەرىنىڭ سىبايلاس جەمقورلىققا قارسى كوزقاراسىن كورسەتۋدىڭ ايرىقشا فاكتىسى بولدى، اتاپ ايتقاندا، مەتاللۋرگيا كومپانياسى قىزمەتىندەگى بۇزۋشىلىقتار ءۇشىن ميللياردتاعان ايىپپۇلدى الىپ تاستاۋعا 75 ميلليون تەڭگە كولەمىندە پارا ۇسىنعان.
«وتكەن جىلى ءبىز ف ب ش باعدارلاماسى بويىنشا جالاقىنى ەكى ەسەگە ارتتىردىق (فاكتورلىق- بالدىق جالاقى شكالاسى - «قازاقپارات»). سىيلىق اقىلاردى ۇنەمى جوسپارلايمىز. بولاشاقتا جالاقى ءالى دە كوتەرىلەدى دەپ ويلايمىن. ارينە، باسقا دا ىنتالاندىرۋ تەتىكتەرى بار، مامانداردى وقىتۋ كەرەك، سىبايلاس جەمقورلىق كورىنىستەرى مەن فاكتىلەردى بولدىرماۋ ءۇشىن تەكسەرۋلەردى اۆتوماتتاندىرۋ بويىنشا جاقسى ادىستەر قاجەت»، - دەدى زۇلفۋحار جولداسوۆ.
كوميتەت ءتوراعاسى سونداي-اق پارادان باس تارتقان قىزمەتكەرگە سىيلىقاقى بەرىلگەنىن جانە لاۋازىمى جوعارىلاۋى مۇمكىن ەكەنىن ايتتى. ونىڭ باسشىلىق لاۋازىمعا تاعايىندالۋى باسقا ايماقتاردا قاراستىرىلۋى مۇمكىن.
سونداي-اق زۇلفۋحار جولداسوۆ باسقارمادا مەريتوكراتيا قاعيداتى بويىنشا باسشىلىق قىزمەتكە تاعايىنداۋ تاجىريبەسى جۇرگىزىلەتىنىن اتاپ ءوتتى. سوڭعى ءۇش جىلدا باسقارما باسشىلارى مەن ولاردىڭ ورىنباسارلارى لاۋازىمدارىنا تومەنگى لاۋازىمداردان 25 ادام تاعايىندالدى.
جۋىردا قازاقستاندىق ب ا ق- تا حابارلانعانداي، «قازفەرروستال» كومپانياسىنىڭ قىزمەتكەرلەرى الماتى قالالىق ەكولوگيا دەپارتامەنتىنىڭ قىزمەتكەرىنە 75 ميلليون تەڭگە كولەمىندە پارا بەرمەك بولعان.