قازاقستاندا جەكەمەنشىك مەكتەپتەر كانيكۋل ۋاقىتىن وزدىگىمەن بەلگىلەۋى مۇمكىن

استانا. قازاقپارات - قازاقستاندا حالىقارالىق جانە پيلوتتىق مەكتەپتەر وقۋ جىلىنىڭ باستالۋ جانە اياقتالۋ ۋاقىتىن وزدىگىمەن بەلگىلەۋدى سۇراپ وتىر، دەپ حابارلايدى قازاقپارات وقۋ- اعارتۋ مينيسترلىگىنىڭ باسپا ءسوز قىزمەتىنە سىلتەمە جاساپ.

«بۇل مەكتەپتەردىڭ باسشىلارى بۇعان دەيىن وقۋ- اعارتۋ مينيسترلىگىنە وسىنداي وتىنىشپەن جۇگىنگەن بولاتىن. بۇل جالپى ءبىلىم بەرەتىن مەكتەپتەرگە قاتىسى جوق ەكەنىن ەسكە سالا كەتەيىك. سەبەبى وندا وقۋ مەرزىمى وزگەرىسسىز قالادى»، - دەپ ءتۇسىندىردى مينيسترلىكتەن.

ۇسىنىستا حالىقارالىق جانە ءبىرقاتار پيلوتتىق جەكەمەنشىك مەكتەپتىڭ وكىلدەرى قىسقى كانيكۋل مەرزىمىن، سونداي- اق وقۋ جىلىنىڭ باستالۋ جانە اياقتالۋ مەرزىمىن دەربەس رەتتەۋگە مۇمكىندىك بەرۋدى سۇراعان. ماسەلەن، ج ر ۆ ي (ءجىتى رەسپيراتورلىق ۆيرۋستى ينفەكسيالار) اۋرۋى ءورشىپ، ايازدار كۇشەيەتىن قىسقى مەزگىلدە وقۋشىلار كوبىرەك دەمالىپ، ونىڭ ورنىنا جازدا ۇزاعىراق وقيدى. ياعني وقۋ جىلىن 1-قىركۇيەكتە ەمەس، 20-تامىزدا باستاۋ ۇسىنىلادى.

ق ر وقۋ- اعارتۋ مينيسترلىگى ورتا ءبىلىم كوميتەتىنىڭ ءتوراعاسى گۇلميرا كارىموۆانىڭ ايتۋىنشا، حالىقارالىق مەكتەپتەرگە قويىلاتىن جەكە تالاپتار مەن نورمالار قازىردىڭ وزىندە بار.

«سول سەبەپتى اكادەميالىق ەركىندىك شەڭبەرىندە شەشىم قابىلداۋ - بۇل بۇرىننان بار تاجىريبە. كەيبىر حالىقارالىق جانە پيلوتتىق جەكەمەنشىك مەكتەپتەر وقۋ جىلىن ءوز بەتىنشە 20-تامىزدا باستايتىنىن بىلەمىز. ءبىراق ولار ونى جازعى مەكتەپ نەمەسە دايىندىق كەزەڭى دەپ اتايدى، الايدا ولار سول كەزدەن باستاپ باعدارلاما بويىنشا وقيدى. وسى كۇندەر ەسەبىنەن ولار قىستا بالالارعا ەكى اپتاعا ۇزاعىراق دەمالىس بەرەدى.

36 اپتالىق وقۋ جىلى قانداي بولماسىن، مىندەتتى دەمالىس كۇندەرىنىڭ سانى جانە وقۋ جىلىنىڭ باستالۋى مەن اياقتالۋىنىڭ جالپى مەرزىمدەرى ءالى دە حالىقارالىق مەكتەپتەر ءۇشىن ارەكەت ەتەدى. ال جالپى تاسىلدەر شەڭبەرىندە جەكەمەنشىك جانە حالىقارالىق مەكتەپتەردىڭ وزدەرى مەرزىمدەردى رەتتەۋ مۇمكىندىگىن قاراستىرۋعا بولادى. بۇل ۇسىنىس قوعامدىق تالقىلاۋعا شىعارىلدى. قالعان مەكتەپتىڭ بارلىعى ءۇشىن وقۋ جىلىنىڭ باستالۋ جانە اياقتالۋ مەرزىمى وزگەرىسسىز قالادى»، - دەدى گۇلميرا كارىموۆا.