ءاليحان سمايىلوۆ ەكىباستۇزداعى جاعداي بويىنشا پرەزيدەنتكە ەسەپ بەردى

استانا. قازاقپارات - پرەزيدەنت قاسىم-جومارت توقايەۆ ەكىباستۇزداعى جوندەۋ جۇمىستارىنىڭ بارىسى تۋرالى پرەمەر-ءمينيستردىڭ بايانداماسىن تىڭدادى، دەپ حابارلايدى قازاقپارات اقورداعا سىلتەمە جاساپ.

«قابىلدانعان شارالار قالانى قيىن جاعدايدان شىعارۋعا سەپتىگىن تيگىزدى. ەكىباستۇزعا كەلگەن پرەمەر-ءمينيستردىڭ ءبىرىنشى ورىنباسارى رومان سكليارعا تۇرعىن ۇيلەردى جىلۋمەن قامتاماسىز ەتۋدى قالپىنا كەلتىرۋ جونىندەگى جۇمىستارعا جەدەل باسشىلىق جاساۋ تاپسىرىلدى. بۇل باعىتتاعى جۇمىستار اياقتالۋعا جاقىن.

مەملەكەت باسشىسى ۇكىمەتكە قالالاردى قىسقى جىلىتۋ ماۋسىمىنا دايىنداۋ كەزىندە جىبەرىلگەن قاتەلىكتەرگە مۇقيات تالداۋ جۇرگىزۋ مىندەتىن جۇكتەدى.

سونداي- اق ۇكىمەتكە ەكىباستۇزدا جانە باسقا دا ەلدى مەكەندەردە قالىپتاسقان كۇردەلى جاعدايدى تۇبەگەيلى وزگەرتۋ ءۇشىن ناقتى شەشىمدەر قابىلداۋ تاپسىرىلدى.

بۇدان بولەك، جەكەشەلەندىرىلگەن ەنەرگەتيكالىق اكتيۆتەرگە جانە ولاردىڭ يەلەرىنىڭ جاۋاپكەرشىلىگىنە قاتىستى ماسەلەلەردى شەشۋ قاجەت. پرەزيدەنت ۇكىمەت پەن قۇقىق قورعاۋ ورگاندارىنىڭ بارلىق جۇمىسى ءوزىنىڭ جەكە باقىلاۋىندا ەكەنىن اتاپ ءوتتى»، - دەلىنگەن حابارلامادا.

ەسكە سالايىق، ەكىباستۇزداعى اپات سالدارىن جويۋ جونىندەگى جەدەل شتاب بۇگىن تاڭەرتەڭ قالاداعى بارلىق ءۇي جىلۋعا قوسىلعانىن ءمالىم ەتكەن بولاتىن.

27-قاراشادا ەكىباستۇز جىلۋ ەلەكتر ورتالىعىندا اپات بولىپ، قالا تۇرعىندارى جىلۋسىز قالعان ەدى. قالا وقۋشىلارى ونلاين وقۋعا كوشىرىلدى.

28-قاراشا كۇنى تاڭەرتەڭ قالادا جەرگىلىكتى اۋقىمداعى توتەنشە جاعداي جاريالاندى.

30-قاراشادا ەكىباستۇزعا پرەمەر- مينيستر ءاليحان سمايىلوۆ بارىپ، كىنالىلەر جاۋاپقا تارتىلاتىنىن ايتتى.

اپات سەبەبى رەتىندە جىلۋ جەلىلەرىنىڭ توزۋى، جىلۋ ورتالىعى باسشىلىعىنىڭ نەمقۇرايلىلىعى مەن ينۆەستيتسيالاردىڭ جەتكىلىكسىزدىگى اتالدى.

مەملەكەت باسشىسىنىڭ تاپسىرماسى بويىنشا پرەمەر-ءمينيستردىڭ ءبىرىنشى ورىنباسارى رومان سكليار اپات سالدارىن جويۋ جۇمىستارى اياقتالعانشا ەكىباستۇزدا بولاتىنى حابارلاندى.