وقۋشىلار «قازاق» دەگەن اتپەن گازەت شىعارا باستادى

None
اقتاۋ. قازاقپارات - اقتاۋ قالاسىنداعى حيميا- بيولوگيا باعىتىنداعى نازاربايەۆ زياتكەرلىك مەكتەبىنىڭ وقۋشىلارى «قازاق» دەگەن اتپەن گازەت شىعارا باستادى، دەپ حابارلايدى قازاقپارات ءتىلشىسى.

يدەيانى مەكتەپتىڭ وقۋشىلارى نارگيز جالعاس پەن نۇرعاسىر تورەبايەۆ جانە اعىلشىن ءتىلى ءپانى مۇعالىمى التىن كەلىمبەرديەۆا مەن قازاق ءتىلى جانە ادەبيەت ءپانىنىڭ مۇعالىمى ايگۇل ايتان ىسكە اسىرىپ جاتىر. گازەتتىڭ نەگىزگى ماقساتى - قازاقتى الەمگە تانىتۋ. «قازاق» گازەتى قازاق جانە اعىلشىن تىلدەرىندە شىعادى.

«10-سىنىپقا احمەت بايتۇرسىن ۇلىنىڭ «ۇلتتى تاۋەلسىزدىككە ۇندەگەن «قازاق» گازەتى» دەگەن ساباقتى وتكىزىپ تۇردىم. سول كەزدە «وسى «قازاق گازەتى» نەگە جوق؟ احمەت اڭساعان، ماعجان اڭساعان جاستار بىلىمگە قول جەتكىزدى. اقپارات كەڭىستىگى مول. بالالار بىلگەنىن باسقا ەلگە تانىتا قويۋعا مۇمكىندىگى بار. سول مۇمكىندىكتەردى نەگە قولدانباسقا؟» دەگەن وي كەلدى. سول ويدى ارىپتەسىممەن، وقۋشىلارمەن جۇزەگە اسىرۋدى ءجون كوردىك»، - دەدى قازاق ءتىلى مەن ادەبيەتى ءپانىنىڭ مۇعالىمى ايگۇل ايتان.

«قازاق» گازەتى بەس ايداردان تۇرادى: مادەنيەت، ادەبيەت، ءبىلىم-عىلىم، ەڭبەك- كاسىپ، تابيعات- ەكولوگيا جانە گازەتتىڭ ەكىنشى سانىنان باستاپ «حالىق ءۇنى» ايدارى قوسىلدى.

«گازەتتى وقىعان وقىرمان وقي وتىرىپ الەۋمەتتىك، قۇقىقتىق، مادەني، ادەبي جانە ساياسي تىڭ دەرەكتەرگە قانىق بولۋى كەرەك. وسىنى ەسەپكە الا وتىرىپ، ءبىز «قازاق» گازەتىن تەك قازاق تىلىندە عانا ەمەس، باسقا ەلدەردە تۇرىپ جاتقان قانداستارىمىز ءۇشىن جانە ورتا ازيانى، ونىڭ ىشىندە قازاقستاندى تانىپ، بىلگىسى كەلەتىن شەتەلدىكتەر ءۇشىن وسى گازەتتەگى قازاق تىلىندەگى اقپاراتتى اعىلشىن تىلىندەگى اۋدارماسىمەن بەرۋدى ءجون كوردىك» دەدى اعىلشىن ءتىلىنىڭ مۇعالىمى التىن كەلىمبەرديەۆا.

«قازاق» گازەتىنىڭ ەرەكشەلىگى احمەت بايتۇرسىن ۇلىنىڭ شىعارمالارىنان ءۇزىندى جانە افوريزمدەرىن قولدانادى.

«قازاق ءتىلى - باي جانە ورالىمدى ءتىل. كەيبىر پوەزيالاردى اۋدارعان كەزدە وتە قيىن. سەبەبى اۆتوردىڭ ستيلىن جانە ۇيقاسىن كەلتىرۋ وڭايعا شىقپايدى. دەگەنمەن تاۋەكەل ەتىپ، جوبامىزدى باستادىق» دەيدى نۇرعاسىر تورەباي.

سوڭعى جاڭالىقتار