قىرعىزستاندا قازاقستاندىق ۋنيۆەرسيتەتتىڭ فيليالى اشىلدى
وندا ە ۇ ۋ مامانداردىڭ ساپالى دايارلىعىن قامتاماسىز ەتىپ، حالىقارالىق عىلىمي جانە ءبىلىم بەرۋ سالاسىنداعى ىنتىماقتاستىقتى بەلسەندى دامىتادى. ۇلتتىق ۋنيۆەرسيتەت 2024-جىلدىڭ سوڭىنا دەيىن شەتەلدە تاعى ءبىر فيليال اشۋدى جوسپارلاپ وتىر.
رەسمي اشىلۋ راسىمىنە ە ۇ ۋ- ءنىڭ عىلىم، كوممەرتسيالاندىرۋ جانە ينتەرناتسيونالداندىرۋ جونىندەگى پرورەكتورى جاننا قۇرمانعاليەۆا، وش مەملەكەتتىك ۋنيۆەرسيتەتىنىڭ رەكتورى قۇدايبەردى قوجوبەكوۆ، قازاقستان رەسپۋبليكاسىنىڭ وش قالاسىنداعى كونسۋلى مۇحتار كارىباي، وقىتۋشىلار مەن ستۋدەنتتەر قاتىستى.
«ە ۇ ۋ فيليالىنىڭ اشىلۋى ءبىزدىڭ ەلدەر اراسىنداعى دوستىق پەن تاتۋ كورشىلىكتىڭ، ءبىلىم جانە عىلىممەن قاتار بارلىق سالادا ىنتىماقتاستىقتى ارتتىرۋعا ءوزارا ۇمتىلىستىڭ ارقاسىندا مۇمكىن بولىپ وتىر. كادرلاردى دوعارى ساپادا دايارلاۋ، ناتيجەلى عىلىم، باسەكەگە قابىلەتتى پاتريوت جاستار باۋىرلاس حالىقتارىمىزدىڭ، جالپى ءوڭىردىڭ بولاشاعى ءۇشىن ۋنيۆەرسيتەتتەردىڭ ەلەۋلى ۇلەسى اينالا الادى. فيليال قازاقستان مەن قىرعىزستاننىڭ ەڭ دارىندى ستۋدەنتتەرى مەن عالىمدارىن تارتادى دەپ ۇمىتتەنەمىن»، - دەپ اتاپ ءوتتى ە ۇ ۋ پرورەكتورى جاننا قۇرمانعاليەۆا.
بۇگىندە ەۇۋ فيليالىندا 30 عا جۋىق ستۋدەنت ءبىلىم الۋدا. ولار اعاشقى ەكى كۋرستى وش قالاسىندا، كەيىنگى ەكى جىلدا قازاقستاندا تاڭداعان كاسىپتەرىن مەڭگەرەدى. وقۋ باعدارلاماسى اياسىندا قىرعىز جاستارى قازاق ءتىلىن مەڭگەرۋدە.
ە ۇ ۋ عىلىمي-ءبىلىم بەرۋ جوبالار، اكادەميالىق ۇتقىرلىق باعدارلامالار، بىرلەسكەن ءبىلىم بەرۋ باعدارلامالارى، شەتەلدىك مامانداردى تارتۋ بويىنشا قىرعىز ارىپتەستەرىمەن بىرلەسە بەلسەندى جۇمىس جۇرگىزەدى.
بيىلعى وقۋ جىلىندا ۋنيۆەرسيتەتتىڭ «Welcome to ENU» اكادەميالىق ۇتقىرلىق باعدارلاماسى اياسىندا قىرعىزستاننان 46 ستۋدەنت ءبىلىم الۋدا.
ايتا كەتۋ كەرەك، بۇگىندە ل. ن. گۋميليەۆ اتىنداعى ە ۇ ۋ- دىڭ الەم بويىنشا 12 ورتالىعى مەن وكىلدىگى بار. سونداي-اق ۇلتتىق ۋنيۆەرسيتەت 450 دەن استام جەتەكشى شەتەلدىك ۋنيۆەرسيتەتتەرمەن حالىقارالىق ىنتىماقتاستىق ورناتقان.