تۇركىستان وبلىسىنىڭ بارلىق اۋدانىندا «جاڭا بۋىن ورتالىقتارى» سالىنادى
اۋقىمدى قۇرىلىس كەلەر جىلدىڭ باسىندا وڭتۇستىك اۋماقتاردان باستالماق. العاشقى ورتالىقتار جەتىساي، ماقتاارال، سارىاعاش پەن كەلەس اۋداندارىندا بوي كوتەرەدى. الەۋمەتتىك نىساندى اۋدان ورتالىقتارىندا، ساياباقتارعا جاقىن اۋماقتا سالۋ جوسپارلانعان.
ەكى قاباتتى عيماراتتا سالتاناتتى جيىندار وتكىزۋگە ارنالعان ءماجىلىس زالى بولادى. سونىمەن بىرگە عىلىمدى دامىتۋعا باعىتتالعان كيبەرنەتيكا، روبوتوتەحنيكا مەن fab-lab steam ورتالىقتارى اشىلادى. ونەر، شىعارماشىلىق پەن سپورت سالالارى بويىنشا ۇيىرمەلەر جۇمىس ىستەيدى. شاحمات، توعىزقۇمالاق جانە ۇستەل تەننيسى ۇيىرمەلەرى اشىلادى. امفيتەاتر مەن ويىن الاڭدارى بولادى. بىرەگەي جوبانىڭ تۇجىرىمداماسىن بەكىتكەن وبلىس اكىمى دارحان ساتىبالدى ءاربىر عيماراتتى تالاپقا ساي ەتىپ، جاناشىرلىقپەن سالۋدى تاپسىردى.
«اۋدانداردا حالىقپەن كەزدەسۋدە مادەنيەت ءۇيىن اشۋ تۋرالى ۇسىنىستار كوپ ايتىلادى. ويلانا كەلە، اۋىل بالالارىنىڭ ءبىلىمىن ارتتىرىپ، بوس ۋاقىتىن ءتيىمدى پايدالانۋ ءۇشىن كوپسالالى ەرەكشە ورتالىقتار اشۋ تۋرالى شەشىمگە كەلدىك. وندا كەلگەن ەرەسەكتەر دە، بالالار دا ءوزىن وتە جايلى سەزىنۋى كەرەك. بالانى عىلىمعا جەتەلەپ، مادەنيەت پەن سپورتقا باۋليتىن، ۇلتتىق قۇندىلىعىمىزدى ۇيرەتەتىن ورتالىقتى بارلىق اۋداندا اشۋدى كوزدەپ وتىرمىز. ءبىزدىڭ وسكەلەڭ ۇرپاق ءبىلىمدى، زيالى، مادەنيەتتى، دەنى ساۋ ءارى ونەرلى بولىپ ءوسۋى ءتيىس»، - دەدى وبلىس اكىمى.
