مەكتەپتەردەگى قاۋىپسىزدىككە نازار اۋدارماعاندار جۇمىستان شىعادى - اسحات ايماعامبەتوۆ
«ءبىلىم بەرۋ مەكەمەلەرىندەگى قاۋىپسىزدىكتى قامتاماسىز ەتۋگە قاتىستى نىسانداردى بەينە باقىلاۋ جۇيەسىمەن، ليسەنزيالانعان كۇزەتپەن، دابىل جۇيەسىمەن جانە تۋرنيكەتتەرمەن جابدىقتاۋ ەسكەرىلگەن. ءىرى قالالارداعى ورتا ءبىلىم بەرۋ ۇيىمدارى بويىنشا رەسپۋبليكا اۋماعىندا 1351 نىسان قامتىلعان. مامانداندىرىلعان كۇزەت قىزمەتتەرىمەن 83 پايىزى شارت جاساسقان. بۇل تۇرعىدا ەڭ تومەن كورسەتكىش قوستاناي، سولتۇستىك قازاقستان جانە تۇركىستان وبلىستارىندا بايقالىپ وتىر. سونىمەن قاتار، تۋرنيكەتتەردىڭ ورناتىلۋى 63 پايىز دەڭگەيىندە. وسى باعىتتا ەڭ تومەن كورسەتكىش الماتى قالاسى، تۇركىستان، باتىس قازاقستان، جامبىل، اقتوبە، سولتۇستىك قازاقستان، شىعىس قازاقستان وبلىستارىندا تىركەلدى»، - دەدى وقۋ- اعارتۋ ۆيتسە- ءمينيسترى عاني بەيسەمبايەۆ.
ونىڭ ايتۋىنشا، ەل اۋماعىنداعى ورتا ءبىلىم بەرۋ ۇيىمدارىنىڭ 97 پايىزىندا دابىل تۇيمەلەرى ورناتىلعان.
«جالپى، ءبىلىم بەرۋ مەكەمەلەرىندە بەينە باقىلاۋ جۇيەسى 100 پايىز ورناتىلعان. دەگەنمەن ولاردىڭ ىشكى ىستەر ورگاندارىنىڭ جەدەل باسقارۋ ورتالىعىنا قوسىلۋىن قامتاماسىز ەتۋ دەڭگەيى ەلىمىز اۋماعىندا 51 پايىزدى قۇرادى. بۇل باعىتتا ەڭ تومەن كورسەتكىش باتىس قازاقستان، اقتوبە، جامبىل، اقمولا، الماتى، قاراعاندى وبلىستارىندا بايقالىپ وتىر. وسى ورايدا ءبىلىم بەرۋ ۇيىمدارىنداعى وسى جاعدايعا نازار اۋدارۋ كەرەك»، - دەدى ۆيتسە- مينيستر.
ونىڭ سوزىنە قاراعاندا، جىل سوڭىنا دەيىن اتالعان ماسەلەنى شەشۋ كەرەك. بۇل جۇمىستار كامەلەكەتكە تولماعانداردىڭ قۇقىقتارىن قورعاۋعا، قاۋىپسىزدىگىن قامتاماسىز ەتۋگە مۇمكىندىك بەرەدى.
ءوز كەزەگىندە ق ر وقۋ- اعارتۋ ءمينيسترى اسحات ايماعامبەتوۆ كەيبىر وڭىرلەردىڭ اكىمدىكتەرى، ءبىلىم باسقارمالارى بۇل ماسەلەنى ءتيىستى دەڭگەيدە باقىلاماي وتىرعانىن ايتتى.
«سوندىقتان بۇل جۇمىسقا جاۋاپتى ادامداردى جاۋاپكەرشىلىككە تارتۋ بويىنشا ۇسىنىس جاسايمىز. ۇكىمەتتىڭ دەڭگەيىندە وسى ماسەلەنى كوتەرەمىز. جىلدىڭ سوڭىنا دەيىن اتالعان مىندەتتەر ورىندالماسا، جاۋاپتى قىزمەتكەرلەردى جۇمىستان شىعارۋدى تالاپ ەتەمىز. بالالاردىڭ قاۋىپسىزدىگىنە باسا نازار اۋدارۋ كەرەك»، - دەدى مينيستر.