رەسپۋبليكالىق «شەرتپە كۇي» ءداستۇرلى بايقاۋىنىڭ جەڭىمپازدارى ماراپاتتالدى - فوتو

استانا. قازاقپارات - الماتىدا «شەرتپە كۇي» رەسپۋبليكالىق ءداستۇرلى مۋزىكا بايقاۋىنىڭ جەڭىمپازدارى ماراپاتتالدى، دەپ حابارلايدى قازاقپارات مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.

جارىستىڭ باستى ماقساتى - دارىندى جاس دومبىراشىلاردى انىقتاۋ، ولاردىڭ كاسىبي شەبەرلىگىن ارتتىرۋ، سونداي- اق ۇلتتىق مادەنيەتتى دامىتۋ. بىرنەشە كۇنگە سوزىلعان فەستيۆالدە 16 مەن 35 جاس ارالىعىنداعى 45 كۇيشى باق سىنادى.

«قازاقتىڭ شەرتپە كۇيى - ۇلتتىق مۋزىكامىزدىڭ ەڭ قۇنارلى قازىناسى. ونىڭ تاريحى، ءداستۇرى سوناۋ كونە زامانداردان باستاۋ الادى. جالپى، قازىر ءداستۇرلى كۇي مەن دومبىرانىڭ ناسيحاتى، وعان دەگەن قىزىعۋشىلىق جىل ساناپ ارتىپ كەلەدى. مىسالى، بۇگىنگى تاڭدا تەك «Artsport» باعدارلاماسى شەڭبەرىندە 643 دومبىرا ۇيىرمەسى جۇمىس ىستەيدى، وعان 26 مىڭنان استام بالا قاتىسىپ جاتىر. بۇل كۇي ونەرىنە دەگەن ەرەكشە ىقىلاستى كورسەتسە كەرەك. سول سياقتى ارنايى مۋزىكالىق مەكتەپتەردە، ورتا جانە جوعارى وقۋ ورىندارىندا دومبىرا ۇيرەنۋشىلەر جىلدان-جىلعا كوبەيىپ كەلەدى. ءبىز ءارى قاراي دا قازاقتىڭ ۇلتتىق ءداستۇرلى مۋزىكا ونەرىن دامىتۋعا باعىتتالعان يگى ءىس-شارالاردى جالعاستىرا بەرەمىز»، - دەپ اتاپ ءوتتى داۋرەن ابايەۆ ماراپاتتاۋ سالتاناتىندا.

سونىمەن، بايقاۋ ناتيجەسى بويىنشا ماديار سۇلەيمەنوۆ باس جۇلدە يەگەرى اتانىپ، 1 ميلليون تەڭگە كولەمىندەگى سىياقىمەن ماراپاتتالدى.

ال، فەستيۆالدىڭ ءبىرىنشى ورىن يەگەرلەرى - نۇرعالي تولەبي مەن دارىن قۇدايبەرگەنوۆ 750 مىڭ تەڭگەدەن يەلەنسە، ەكىنشى ورىنعا سىرىم شونبايەۆ پەن ارداق ەلەۋسىز جايعاستى، ولارعا 500 مىڭ تەڭگە بۇيىردى.

ءۇشىنشى ورىندى تۇرسىنبەك ءىلياس، بەكەت بەكسۇلتان، جارقىننۇر ەرجانات يەلەنىپ، ءارقايسىسى 300 مىڭ تەڭگەدەن الدى.

ال، ماۋەتبەك لۋنارا مەن نۇرجان ءىلياسوۆ «ءۇمىت» ارنايى ديپلومىمەن ماراپاتتالدى. جانتۋ دادابايەۆ، ساماتوۆا ايىمگۇل، تىلەۋبەك ءىنجۋ، توقتاروۆ داستان، تالاپحان ەربولات فەستيۆالدىڭ ديپلومانتتارى اتانىپ، ارنايى اقشالاي سىياقى يەلەندى.