فرانسيا پرەزيدەنتىنىڭ ا ق ش- قا ساپارىنىڭ ماقساتى نەدە - امەريكالىق ساراپشىلار وي ءبولىستى

ۆاشينگتون. قازاقپارات – ا ق ش ساراپشىلارى فرانسيا پرەزيدەنتى ەممانيۋەل ماكروننىڭ ا ق ش- قا ساپارىنىڭ ماقساتى تۋرالى وي ءبولىستى.

جەرگىلىكتى ساراپشىلاردىڭ پايىمداۋىنشا، ە. ماكروننىڭ باتىستاعى كواليتسيانىڭ ىشىندە شيەلەنىس ءورشىپ تۇرعانىنا قاراماستان ا ق ش- قا شاقىرتۋ العانى، ەكى ەلدىڭ رەسمي تۇلعالارى فرانسيانى ا ق ش- تىڭ ەجەلگى وداقتاسى رەتىندە قابىلدايتىنىن كورسەتەدى.

فرانسيانىڭ الەمدىك ارەناداعى، اسىرەسە ا ق ش- تاعى جوعارى بەدەلى ە. ماكروننىڭ حالىقارالىق باستامالاردى كوتەرۋىمەن بايلانىستى بولسا كەرەك. بۇل باستامالار ونى G7، ناتو جانە ب ۇ ۇ قاۋىپسىزدىك كەڭەسى سياقتى ۇيىمداردىڭ كوشباسشىسىنا اينالدىرعان.

اق ءۇيدىڭ ۇلتتىق قاۋىپسىزدىك جونىندەگى وكىلى دجون كيبري فرانسيانىڭ كەيىنگى ءبىر جىلدا ۇلتتىق قاۋىپسىزدىك ماسەلەلەرىنىڭ ورتاسىندا بولعانىن ەسكە سالدى. ايتۋىنشا، بۇل امەريكالىقتار مەن ولاردىڭ وداقتاستارىنىڭ قاۋىپسىزدىگى ءۇشىن وتە ماڭىزدى.

ا ق ش- تاعى بيزنەس ورتانىڭ ساراپشىسى فرانسۋز كوشباسشى كۇن تارتىبىنە شىعارعان ماسەلەنىڭ نەگىزگىسى ەكونوميكا سالاسىمەن بايلانىستى ەكەنىن ايتادى.

اتاپ ايتساق، فرانسيانى ا ق ش- تىڭ «ينفلياتسيانى تومەندەتۋ تۋرالى» جانە «چيپتەر مەن عىلىم تۋرالى» فەدەرالدىق زاڭدارى الاڭداتىپ وتىرعان كورىنەدى. فرانسيا تاراپىنىڭ پايىمىنشا، بۇل ەۋروپالىق وندىرۋشىلەرگە اركەلكى باسەكە جاعدايىن تۋىنداتادى. ساراپشى ە. ماكرون دج. بايدەندى وسى زاڭداردىڭ ەۋروداققا قاتىستى تالاپتارىن جۇمسارتۋعا كۇش سالادى.

مىسالى، «ينفلياتسيانى تومەندەتۋ تۋرالى» زاڭ تازا ەنەرگەتيكا سالاسى مەن ەلەكتروموبيلدەر وندىرىسىندە جۇمىس ىستەيتىن امەريكالىق كاسىپورىندارعا 430 ميلليارد دوللار كولەمىندە سۋبسيديا مەن سالىق جەڭىلدىكتەرىن كوزدەيدى. ال، «چيپتەر مەن عىلىم تۋرالى» زاڭ ا ق ش- تا ءوندىرىس وشاعىن اشقىسى كەلەتىن نەمەسە بۇرىننان بار ءوندىرىستى كەڭەيتكىسى كەلەتىن جاھاندىق كومپانيالارعا 52 ميلليارد دوللار كولەمىندە سۋبسيديا مەن سالىق جەڭىلدىكتەرىن بەرۋدى كوزدەيدى. بۇل وزگەرىستەر پاكەتى ەۋروپالىق وندىرۋشىلەردى ءتيىمسىز ەتىپ قانا قويماي، ەۋروپاعا تارتىلاتىن ينۆەستيتسيالاردىڭ تارتىمدىلىعىن السىرەتۋى مۇمكىن.

ساراپشىنىڭ باعالاۋى بويىنشا، بۇل ماسەلە قانشالىقتى كۇردەلى بولعانىنا قاراماستان، تاراپتار ەكى جاققا دا ءتيىمدى شەشىم تاۋىپ، ساۋدا سوعىسىنا دەيىن جەتكىزبەۋى كەرەك.

فرانسيا تاراپى ءۇشىن تاعى ءبىر وزەكتى پروبلەما بار. ول - كومىرسۋتەك باعاسى جانە امەريكالىق ەنەرگيا رەسۋرستارىنا دەگەن باعانىڭ قۇنىن تومەندەتۋ مۇمكىندىكتەرىمەن بايلانىستى ماسەلە.

ساراپشى تاراپتار كومىرسۋتەك باعاسىن تومەندەتۋدىڭ بالاما جولدارىپ ىزدەپ، وۋرووداقتى ەنەرگەتيكالىق داعدارىستان الىپ شىعاتىن جاڭا رەسۋرستار تابۋعا كۇش سالادى دەپ توپشىلايدى.

ۆاشينگتونداعى «Second Floor Strategies» كونسالتينگىلىك فيرماسىنىڭ پرەزيدەنتى، قورعانىس جانە گەوساياسات ماسەلەلەرى جونىندەگى ساراپشى ۋايلدەر الەحاندرو سانچەستىڭ ايتۋىنشا، بايدەن مەن ماكرون ەۋرووداقتىڭ ەنەرگەتيكالىق قاۋىپسىزدىگىن تالقىلايدى. ويتكەنى، ەۋروپا ەلدەرى بالاما جەتكىزۋشىلەردى ىزدەپ وتىر.

ۋ. سانچەس تە، دج. كيبري دە بايدەن مەن ماكروننىڭ اڭگىمەسىنە كاۆكاز بەن ورتالىق ازيا ەلدەرىنىڭ جاعدايى دا وزەك بولاتىنىن اتاپ ءوتتى. ناقتىراق ايتساق، جاڭا ەنەرگەتيكالىق رەسۋرس كوزىن ىزدەپ وتىرعان ەۋروپا ءۇشىن «ورتا ءدالىز» (ترانسكاسپي حالىقارالىق كولىك مارشرۋتى) جوباسى قىزىقتى.

ەكى ساراپشى دا ا ق ش پەن فرانسيانىڭ قىتايعا كەلگەندە كوزقاراسى ەكى ءتۇرلى ەكەنىن ايتىپ وتىر. بيزنەس ورتا ساراپشىسىنىڭ سوزىنشە، فرانسيا جاعى ا ق ش- قا قاراعاندا قىتاي تاقىرىبىن كەلىسسوزدىڭ كۇن تارتىبىنە شىعارۋعا قۇلىقسىز. ال، ۋ. سانچەس قىتاي ماسەلەسىندە ءبىر كەزدەسۋدىڭ نەگىزىندە ورتاق شەشىمگە كەلۋ مۇمكىن ەمەس ەكەنىن ايتادى. دەگەنمەن، ەكى ەل دە قىتايمەن ساۋدا جاساۋعا مۇددەلى. قىتايدىڭ ءىرى كولەمدەگى ينۆەستيتسياسىمەن بىرگە، الىپ نارىعىنا جول تابۋ ەكى ەل ءۇشىن دە ماڭىزدى. ءبىراق، بەيجىڭنىڭ جاھاندىق دامەسى مەن وڭىردەگى ىقپالى باتىستى الاڭداتپاي قويمايدى.

وسىلايشا، قوس ساراپشى دا فرانسيا پرەزيدەنتىنىڭ ا ق ش- قا جاسايتىن ساپارى تاراپتاردىڭ سىرتقى ساياساتتىڭ كەيبىر ماسەلەلەرى بويىنشا ۇستانىمى اركەلكى بولعانىنا قاراماستان، وداقتاستىق بايلانىستارى مىعىم ەكەنىن پاش ەتۋگە باعىتتالعان.

بۇعان دەيىن ەۋرووداقتىڭ ترانسكاسپي حالىقارالىق كولىك باعىتىن دامىتۋعا ينۆەستيتسيا سالۋدى جوسپارلاپ وتىرعانى تۋرالى حابارلانعان بولاتىن.