پرەزيدەنتتىك وليمپيادا جۇلدەگەرلەرى ءبىلىم گرانتتارى مەن اتاۋلى ستيپەنديالارعا يە بولدى
ەڭ جوعارى ۇپاي جيناعان قاتىسۋشىلار ەلىمىزدىڭ الدىڭعى قاتارلى ۋنيۆەرسيتەتتەرىنە 35 گرانت پەن 12 اتاۋلى ستيپەنديانى جەڭىپ الدى.
«پرەزيدەنتتىك وليمپيادانىڭ ارقاسىندا وقۋشىلارىمىز ءوز الەۋەتىن اشىپ، ءبىلىم گرانتتارى تۇرىندەگى قوماقتى قولداۋعا يە بولىپ جاتىر. بالالاردىڭ وليمپياداعا قاتىسۋ كورسەتكىشى ءوسىپ كەلەدى. ولار ماتەماتيكا، بيولوگيا، حيميا جانە فيزيكا پاندەرى بويىنشا بىلىمدەرىن ساراپقا سالدى. بايقاۋعا بۇرىن رەسپۋبليكالىق جانە حالىقارالىق پاندىك وليمپيادالارعا قاتىسپاعان 11 (12) سىنىپ وقۋشىلارى قاتىسا الاتىنىن ەسكە سالا كەتەيىن. بىلتىر مينيسترلىكتىڭ باستاماسىمەن قازاقستاننىڭ 20 ج و و وسى وليمپيادانىڭ جەڭىمپازدارىنا 50 گە جۋىق گرانت ءبولدى. ال، بيىل «دارىن» وكىلدەرى جوعارى وقۋ ورىندارىن گرانت بولۋگە شاقىرعان بولاتىن. ناتيجەسىندە 6 ۋنيۆەرسيتەت جەڭىمپازدارىمىزعا 35 گرانت پەن 12 اتاۋلى ستيپەنديا ءبولدى. دارىندى بالالارىمىزعا قولداۋ كورسەتكەن جوعارى وقۋ ورىندارىنىڭ باسشىلارىنا العىسىمىز شەكسىز»، - دەدى وقۋ-اعارتۋ مينيسترلىگى ورتا ءبىلىم كوميتەتىنىڭ ءتوراعاسى گۇلميرا كارىموۆا.
سونداي-اق، وليمپيادانىڭ قورىتىندىسى بويىنشا مينيسترلىكتىڭ 1- دارەجەلى ديپلومىمەن 9 قاتىسۋشى، Ⅱ دارەجەلى ديپلومىمەن 18 قاتىسۋشى جانە Ⅲ دارەجەلى ديپلومىمەن 27 قاتىسۋشى ماراپاتتالدى.