قازاقستاندا نەسيەسىن ءبىر جىل بويى تولەمەي جۇرگەندەردىڭ قارىزى كەشىرىلۋى مۇمكىن

استانا. قازاقپارات - قازاقستاندا كرەديتى بار جانە نەسيەسىن ءبىر جىل بويى تولەمەي جۇرگەندەردىڭ قارىزى كەشىرىلۋى مۇمكىن.

بۇل جەكە تۇلعانىڭ بانكروتتىعى تۋرالى زاڭ جوباسىندا كورسەتىلگەن مۇمكىندىك.

قۇجات جاقىندا دەپۋتاتتار تالقىسىنا ۇسىنىلادى، - دەپ حابارلايدى «حابار 24» تەلەارناسى.

تەلەارنا مالىمەتىنشە، پروبلەمالىق قارىزى بار قازاقستاندىقتاردىڭ 96 پايىزى كەپىلسىز نەسيە العاندار. دەمەك، ولاردىڭ دەنى بانكروتتىق تۋرالى زاڭنىڭ يگىلىگىن كورە الادى. قارىز جويىلۋى ءۇشىن وتەلمەگەن سوما 5 ميلليون تەڭگەگە دەيىن بولۋى كەرەك. سونداي-اق، سوتتان تىس بانكروتتىق ءراسىم تابىسىنىڭ كۇنكورىس دەڭگەيىنە جەتپەيتىن ازاماتتار پايدالانا الادى.

قارجى ۆيتسە-ءمينيسترى ەرجان ءبىرجانوۆ بورىشكەردىڭ مۇلكى بولماۋى كەرەگىن ەسكەرتتى. كىرىس پەن مۇلىكتىڭ بار-جوقتىعى ەلەكتروندى ۇكىمەت پورتالى ارقىلى ايقىندالادى. دەمەك، مۇلىكتىڭ ەسەبىن جۇرگىزەتىن بارلىق ۋاكىلەتتى مەملەكەتتىك ورگان دەرەكتەر بازاسىن بىرىكتىرەدى. وسىدان كەيىن بانكتەر ەسەپ ايىرىسۋ شوتتارى بويىنشا اقشا قوزعالىسىن جۇزەگە اسىرادى. سوتتان تىس بانكروتتىققا بانك، ميكرو قارجى ۇيىمدارى مەن كوللەكتورلىق اگەنتتىكتەر الدىنداعى قارىزدار بويىنشا قولدانىلۋى مۇمكىن. ءوتىنىش بويىنشا شەشىمدى جارتى جىل كۇتۋگە تۋرا كەلەدى.

«مىسالى، ەندىگى جىلى زاڭناما جۇمىس ىستەسە، 2023-جىلى ول بانكروت بولىپ تابىلاتىن بولسا، كەلەسى پروتسەدۋراعا ول 7 جىل وتكەننەن كەيىن جۇگىنۋگە مۇمكىندىگى بار. بانكروتتىقتان كەيىن ءۇش جىل ىشىندە قارجىلىق جاعدايىنا مونيتورينگ جۇرگىزىلەدى. مۇنداي تاجىريبە باسقا ەۋروپا ەلدەرىندە دە جۇرگىزىلىپ وتىرادى. سەبەبى ادەيىلەپ جاسالعان بانكروتتىق پروتسەدۋراسىن تەكسەرۋ ءۇشىن سونداي ءتاسىل قولدانىلادى»، - دەيدى قارجى ۆيتسە-ءمينيسترى ەرجان ءبىرجانوۆ.