الماتىدا جانارماي قۇيۋ بەكەتىنە شابۋىل جاسالدى

الماتى. قازاقپارات - الماتىدا جانارماي قۇيۋ بەكەتىنە شابۋىل جاساعان كۇدىكتىلەر انىقتالدى، دەپ حابارلايدى قازاقپارات ءتىلشىسى.

الماتى قالالىق پوليتسيا دەپارتامەنتىنىڭ مالىمەتىنشە، كۇدىكتىلەر 100 مىڭ تەڭگە مەن ەكى تەلەفوندى قولدى قىلعان.

«جانارماي قۇيۋ بەكەتىنە جاسالعان قاراقشىلىق شابۋىل تۇنگى ساعات ەكىدە بولعان. بەتپەردە كيگەن ەكى ادام قولىنا شەگە سۋىرعىش جانە بالتا الىپ، جانار-جاعارماي قۇيۋ بەكەتىنە كەلگەن. ولار كاسسير مەن كۇزەتشىنى ارتقى بولمەگە قاماپ، قىزمەتكەرلەردىڭ تەلەفوندارى مەن كاسساداعى اقشانى ۇرلاپ كەتكەن. شابۋىلداۋشىلاردىڭ بۇكىل ارەكەتى بەينەباقىلاۋ كامەراسىنا جازىلىپ قالعان. كۇدىكتىلەر سول كۇنى انىقتالىپ، قاماۋعا الىندى. بۇل - 23 جاستاعى ت. جانە 22 جاستاعى م. ەسىمدى ازامات»، - دەدى مەدەۋ اۋداندىق پوليتسيا باسقارماسىنا قاراستى پوليتسيا ءبولىمىنىڭ باستىعى ەلنۇر قۇدرەتبايەۆ.

اتالعان دەرەك سوتقا دەيىنگى تەرگەۋدىڭ ءبىرىڭعاي تىزىلىمىنە ق ر ق ك 191-بابى 2-بولىگى بويىنشا تىركەلدى.

«كۇدىكتىلەر - باسقا جاقتان كەلگەندەر. ولار الماتىعا جۇمىسقا ورنالاسۋ ءۇشىن كەلگەن، ءبىراق اقشا تابۋدىڭ بۇدان باسقا وڭاي جولىن ويلاپ تاپپقان. شابۋىلداۋشىلار ۋاقىتشا ۇستاۋ يزولياتورىنا قامالدى. پوليتسيا قىزمەتكەرلەرى ولاردىڭ بۇرىن جاسالعان قىلمىستارعا قاتىسى بار-جوعىن تەكسەرىپ جاتىر»، - دەدى پوليتسيا وكىلى.