ءال-فارابي داڭعىلى سول جاعالاۋعا كوشىرىلەدى - استانا اكىمدىگى
كۇن تارتىبىنە سايكەس ءال-فارابي داڭعىلىنىڭ اتاۋىن كوشىرۋ ماسەلەسى قارالدى، دەپ حابارلايدى قازاقپارات.
بۇعان دەيىن «الماتى» جانە «بايقوڭىر» اۋداندارىندا ورنالاسقان اقجول، ۆيشنيەۆسكايا جانە بايىرقۇم كوشەلەرى بىرىكتىرىلىپ، ءال-فارابي داڭعىلى بولىپ وزگەرتىلگەن بولاتىن. قالا تۇرعىندارى، استانا ءماسليحاتى مەن قوعامدىق كەڭەس مۇشەلەرى، عالىمدار، زيالى قاۋىم وكىلدەرى بۇل كوشە وندىرىستىك ايماقتا ورنالاسقاندىقتان، ۇلى عالىمنىڭ ەسىمىنە سايكەس كەلمەيدى، وسىعان بايلانىستى قالانىڭ ۇلكەن جانە ورتالىق كوشەلەرىنىڭ بىرىنە عالىمنىڭ ەسىمى بەرىلۋى ءتيىس دەگەن ۇسىنىستارىن بىرنەشە رەت ايتقان بولاتىن.
«استانانىڭ ونوماستيكالىق كوميسسياسىنىڭ وتىرىسىنا ەسىل اۋدانىندا ورنالاسقان 38№ جوبالىق اتاۋى بار كوشەگە ۇلى عالىم ءال-فارابيدىڭ ەسىمىن بەرۋ تۋرالى شەشىم قابىلداندى. بۇل كوشە تاۋەلسىزدىك داڭعىلىنداعى سالىنىپ جاتقان كوپىردىڭ ارتىندا ورنالاسقان.
قالانىڭ بولاشاق جوسپارىنا سايكەس بۇل كوشە ەسىل وزەنىنەن باستالىپ، جالپى ۇزىندىعى 7 شاقىرىمنان اساتىن قابانباي باتىر داڭعىلىنا دەيىن سوزىلاتىن ۇلكەن داڭعىلداردىڭ ءبىرى بولادى»، - دەپ جازدى اكىمدىكتەن.
قالانىڭ ونوماستيكالىق كوميسسياسىنىڭ وتىرىسىندا قارالعان ۇسىنىستار قاراۋ ءۇشىن استانا ءماسليحاتىنىڭ تۇراقتى كوميسسيالارىنىڭ جاريا تىڭداۋلارىنا، استانا قوعامدىق كەڭەسىنىڭ قاراۋىنا جىبەرىلەدى.