ساۋىق جاقانوۆا: ءسوزدىڭ توركىنىن ءتۇسىنىپ، جەتكىزە ءبىلۋ - جاراتۋشىنىڭ سىيلاعان قابىلەتى

استانا. قازاقپارات - قازاق راديوسىنىڭ «التىن قورىنداعى» ادەبي-سازدى حابارلاردىڭ كوبى ساۋىق جاقانوۆانىڭ داۋسىمەن جازىلعان.

ول اسەم ۇنىمەن تىڭدارمانعا جارتى عاسىردىڭ تاريحىن جەتكىزىپ، زور سۇيىسپەنشىلىگىنە بولەندى. راديوعا قارشادايىنان كەلگەن قىزدىڭ ماقساتى دا وسى بولاتىن. وزىنە ارتىلعان مىندەتتى ابىرويمەن اتقارىپ، «ەفيردىڭ اقبايانى» اتانعان ديكتور راديودا قىزمەت ەتكەن جىلدارىن ءومىرىنىڭ جارقىن ساتتەرى دەپ بىلەدى. قازاقستاننىڭ ەڭبەك سىڭىرگەن ءارتىسى، داڭقتى ديكتور ساۋىق جاقانوۆامەن اڭگىمەلەسىپ، وتكەن شاققا ساياحات جاساعان ەدىك.

- جارتى عاسىرعا جۋىق ديكتور بولىپ قىزمەت اتقاردىڭىز. بۇل ماماندىقتىڭ قادىر-قاسيەتىن قالاي باعالار ەدىڭىز؟ ءسىزدىڭ ويىڭىزشا، بۇل جاراتۋشى سىيلاعان قابىلەت پە الدە ەڭبەكپەن جەتۋگە بولاتىن دۇنيە مە؟

- مەنى تانىستىرعاندا «راديونىڭ ساندۋعاشى»، «بۇلبۇل ءۇندى» دەگەن تەڭەۋ ايتىپ جاتادى. نەگىزى، ماسەلە وندا ەمەس دەپ ويلايمىن. ارينە، داۋىس تا بەلگىلى ءبىر دەڭگەيدە ءرول وينايدى عوي. ءوزىم ءماتىندى دۇرىس جەتكىزۋگە قاتتى ءمان بەرەمىن. ول جەردە نە ايتىلىپ تۇر؟ سونى جۇرەگىڭنەن وتكىزىپ، تىڭداۋشىعا شىنايى جەتكىزە ءبىلۋ قاجەت. ءماتىننىڭ ىشىنە كىرىپ كەتۋ كەرەك. قازاقتىڭ سوزدەرىنىڭ ءجونى، رەتى بار. سونى ديكتور سەزىنە بىلۋگە ءتيىس. مەنىڭ ويىمشا، ءسوزدى جەتكىزە ءبىلۋ، سويلەۋ ونەرى تۇقىمدا بولۋى كەرەك. قازاق «تاقىر جەرگە ءشوپ شىقپايدى» دەيدى.

انام ءاندى كۇشتى سالاتىن ادام ەدى. راديودا «بەسىگىڭدى تۇزە» دەگەن حابار بولدى. سول جەردە مارقۇم انامنىڭ ايتقان سوزدەرى بار. كوپ بالا تۋىپ، تاربيەلەگەن بەكزات ادام بولاتىن. اكە-شەشەم مال باققان كىسىلەر عوي. كەشكە مالدى جايعاستىرىپ بولىپ، ءوزىمىز وتىرامىز. انام بىزگە قازاقتىڭ ەرتەگى، اڭىز-اڭگىمەلەرىن، جاڭىلتپاش ايتىپ بەرەتىن. اۋزىمىز اشىلىپ وتىرىپ، قىبىر ەتپەي تىڭدايمىز. قازىر ويلاپ وتىرسام، العاشقى ۇستازىمداي بولعان ەكەن عوي.

اكەمنىڭ جالعىز قارىنداسى بار ەدى. ول كىسىنىڭ بالاسى بولمادى، كۇيەۋى ۇلكەن قىزمەتتە ىستەيتىن. ءۇيدىڭ ۇلكەنى بولعاندىقتان شىعار، مەنى سول كىسىلەردىڭ قولىنا بەردى. ۇيگە جازدىگۇنى، دەمالىستا عانا كەلەتىنمىن. مەكتەپتى دە، ۋنيۆەرسيتەتتى دە الماتىدا وقىدىم. مەكتەپتە جۇرگەندە حورعا قاتىسامىن، كونسەرت جۇرگىزەمىن. ءبىزدىڭ ۋاقىتتا جۋرناليستيكا فاكۋلتەتى بولمادى، فيلولوگيا ماماندىعى بويىنشا وقۋعا ءتۇستىم. ۋنيۆەرسيتەتتە دە مادەني ءىس- شارالارعا قاتىسىپ ءجۇردىم. 1966 -جىلى ۋنيۆەرسيتەت بىتىرگەن كەزدە راديودا كونكۋرس جاريالانىپ جاتقانىن ەستىپ، باعىمدى سىناپ كورگىم كەلدى. ونەرگە جاقىن ەكەنىمدى بىلەتىن جەزدەم دە «وسى كونكۋرسقا قاتىسىپ كورسەيشى»، - دەدى. ءسويتىپ، تاۋەكەلگە بەل بۋىپ قاتىسىپ، باعىما وراي ءوتىپ كەتتىم. ول كەزدە ءبىر-اق راديو بار، سونى تىڭداپ جۇرەتىنبىز. زامزاگۇل ءشارىپوۆانىڭ وقىعانى ۇنايتىن. داۋسى سونداي ادەمى، تالانتتى جان ەدى. راديوداعى قىزمەتىنەن بولەك، بىرنەشە ءرولدى سومداعان بەلگىلى اكتريسا. ونىڭ داۋسىن ۇناتقانىم سونشالىق، كونكۋرستا بەرىلگەن شىعارمانى سول كىسىگە ۇقساتىپ وقىپپىن. ونى كەيىن بايقاپ، ۇيالعانىم- اي. اركىمنىڭ وزىنە ءتان ينتوناتسياسى، جولى بولۋى كەرەك قوي، نە نارسە دە بولسا دا. قۋانىشىما وراي، جاقسى ورتاعا تاپ بولدىم. راديودا مىقتى ديكتورلار جۇمىس ىستەيدى ەكەن. اسىرەسە، انۋاربەك بايجانبايەۆ.

- قازاق راديوسىنان، تەلەديداردان بەرىلگەن رەسپۋبليكانىڭ تىنىس- تىرشىلىگى جايلى جاڭالىقتار، ءتۇرلى حابارلار تىڭدارمان قاۋىمعا، كورەرمەنگە انۋاربەك بايجانبايەۆتىڭ اشىق تا اۋەزدى ۇنىمەن جەتكەنىنە تاريح كۋا. ءسىزدى «ەفيردىڭ اقبايانى» دەپ اتاعان سول كىسى ەكەن. جۇرتشىلىقتى ەرەكشە داۋسىمەن باۋراپ العان، تالاي حاباردى بىرگە جۇرگىزگەن ارىپتەسىڭىز تۋرالى ايتىپ بەرىڭىزشى.

- ءار ادامنىڭ داۋىس بوياۋىندا وزگەشەلىك بولادى. انۋاربەك بايجانبايەۆتىڭ داۋىسى - كۇمبىرلەپ تۇرعان، قۇلاققا جاعىمدى ەستىلەتىن كەرەمەت داۋىس. اناسى ءانشى بولعان ەكەن. ول كەزدە جازۋشىلار، جۋرناليستەر كىتاپتى ماشينكامەن تەرەتىن. ول كىسى كىتاپ باساتىن كوررەكتور بولىپ قىزمەت ەتكەن. كىتاپ باسار الدىندا ونى وقىپ وتىرۋ كەرەك ەكەن. انەكەڭ ول ۋاقىتتا جاپ- جاس جىگىت، كىتاپتى كەڭ تىنىستى ۇنىمەن وقىعاندا، قازىر اتىن ۇمىتىپ تۇرمىن، قاسىندا وتىرعان بەلگىلى جازۋشى تاڭعالىپتى. تىڭداپ بولعان سوڭ «سەنىڭ داۋىسىڭ كەرەمەت قوي! مىنا شىعارمانى قالاي رەتىمەن وقىپ وتىرسىڭ؟! سەن راديوعا بارسايشى» دەيدى. ايتقانداي-اق، ول كىسى راديوعا كەلىپ، جۇمىسقا قابىلدانادى. ول كەزدە مينا سەيىتوۆا دەگەن العاشقى ديكتور بولعان. سوعىس ۋاقىتىندا مايداننان كەلگەن حاتتىڭ ءبارىن سول كىسى وقىعان ەكەن. ەڭبەك جولىن پيونەر ديكتور بولىپ باستاعان ونىڭ ەكى بالاسى بولىپتى. بىرەۋىن پيانينونىڭ استىنا، بىرەۋىن ۇستىنە جاتقىزىپ، كۇنى-ءتۇنى جۇمىستا جۇرەدى ەكەن. كۇيەۋى سوعىستا. انۋاربەك بايجانبايەۆتى سول كىسى جۇمىسقا الادى. ايتپاقشى، انەكەڭ سوعىستان ورالعاننان كەيىن قازاق راديوسىنا جۇمىسقا ورنالاسقان. مايداننان اياعى جارالانىپ كەلگەن.

مىنەزى قانداي دەسەڭشى؟! ادامنىڭ داۋسىنان دا مىنەزىن بىلۋگە بولادى دەيدى. انەكەڭ بالا مىنەزدى، اقكوڭىل ادام ەدى. ۇلكەن بولسىن، كىشى بولسىن الدىنان كەسە-كولدەنەڭ وتپەيتىن. وزىنە ۇنايتىن بولۋى كەرەك، حاباردى ءبىر ەر، ءبىر ايەل وقۋى كەرەك بولعاندا «مەن ساۋىقپەن وقيمىن» دەيتىن. كوڭىلى تولعان كەزدە «وي، ساكە، قاتىردىق ءيا، ءبىر ءارپىن دە قيسايتپاي وقىدىق قوي» دەيدى ريزا بولىپ. ول كىسىنىڭ قاسىندا ءجۇرىپ، ءبىراز دۇنيە ۇيرەندىم. دارا داۋىسىمەن، شەبەرلىگىمەن، جايدارى مىنەزىمەن ەستە قالدى... كەلەسى جىلى انۋاربەك بايجانبايەۆتىڭ ءجۇز جىلدىعى بولادى. ءبىز تۋرالى كىتاپ جازىلىپ جاتىر. جاقىندا جارىققا شىعىپ قالار.

- ول ۋاقىتتا حاباردىڭ بارلىعىن دەرلىك سىزدەر وقىدىڭىزدار. ديكتورلارعا قانداي تالاپ قويىلاتىن ەدى؟

- ءيا، بۇرىن قانداي حابار بولسىن، ءبارىن ءبىز، ديكتورلار وقيتىنبىز. قازىر جۋرناليستەر شىعادى عوي. ول كەزدەگى تالاپ باسقا بولدى، كورەرمەن، تىڭداۋشى قاۋىمعا تەك جاقسى جاڭالىقتاردى جەتكىزەتىنبىز. كۇنىنە التى ساعات ەمەس، ءومىرىمنىڭ ءبارى راديودا ءوتتى. قانداي حابار وقىمادىم دەسەيشى؟ ! جانرى ءارتۇرلى شىعارما وقىدىق: ساتيرا، ولەڭ، ەرتەگى، جاڭالىق. ءوز ءىسىمدى جاقسى كورگەننەن عوي، جۇمىستا جۇرگەندە ءبارىن ۇمىتامىن. ءماتىننىڭ ىشىنە قالاي كىرىپ كەتكەنىمدى بىلمەيتىن ەدىم. ءسوزدىڭ توركىنىن ءتۇسىنىپ، جەتكىزە ءبىلۋ - جاراتۋشىنىڭ سىيلاعان قابىلەتى. مىسالى، اقىن، جازۋشىلاردى بىرەۋ سۇيرەپ وتىرعانداي بولادى. ونى وزدەرى بىلمەي جاتادى. مىسالى، كەيبىر اقىندار ءسوز ىزدەۋى مۇمكىن. ال ەندى ءبىرى ءسوز ىزدەمەيدى. وزىمەن- ءوزى قۇيىلىپ كەلە بەرەدى. بۇل دا سونداي ونەر دەر ەدىم. ءماتىن وقىعاندا قۇلاعىما سىبىرلاپ وتىرعانداي بولادى.

ول ۋاقىتتا تاماق تابۋ دا وڭاي بولمادى. وتباسىم، ەكى بالام بار، ۇلكەن كىسىلەرمەن تۇردىم. انۋاربەك بايجانبايەۆ «حالىق «ساۋىق وقىسىن» دەپ، ۇنەمى سەنى سۇرايدى» دەپ ايتاتىن. اراسىندا ۇيگە جۇگىرىپ بارىپ كەلەمىن. قاربالاس تىرلىكپەن ءجۇرىپ قالاي وقىعانىمدى اسىقپاي تىڭداۋعا، قاراۋعا قاتتى كوڭىل بولمەپپىن. سويتسەم، جامان وقىماعان ەكەنمىن. قۇدايعا شۇكىر، ازدى-كوپتى ەڭبەگىمىز ەلەنىپ، 1995 -جىلى «قازاقستاننىڭ ەڭبەك سىڭىرگەن ءارتىسى»، راديونىڭ 100 جىلدىعىندا «قازاقستاننىڭ ەڭبەك سىڭىرگەن قايراتكەرى» اتاعى بەرىلدى. قازىر بۇل اتاق بۇكىل سالا قىزمەتكەرلەرىنە بەرىلىپ جاتىر. جالپى، ءوزىم ەشتەڭە سۇراعان ەمەسپىن، وردەن، مەدال بەرىپ جاتادى. كەڭەس زامانىندا العان «قۇرمەت بەلگىسى» وردەنىم دە بار. جاقىندا 78 گە كەلەمىن. «جاسىم ۇلعايعان شاقتا ونىڭ پايداسى بار ما؟» دەپ ويلايمىن. تىكەلەي وزىمە ايتپاسا دا، سەزەسىڭ عوي، قىزعانىشپەن قاراپ، «ءبىز دە سولاي ەڭبەك ەتتىك قوي» دەيتىن ادام تابىلادى. اتاق العاننىڭ اۋرۋحاناعا تىركەلۋگە، قارالۋعا كومەگى بولا ما دەپ ويلاعان ەدىم. وكىنىشكە قاراي، كومەكتەسپەيدى ەكەن. بۇرىن داۋسىمىزدى تىڭداعان ادامدار كورگەن جەردە سىيلاپ، قۇرمەت كورسەتىپ، كوتەرمەلەپ جاتادى. سوعان ريزا بولامىن. ديكتور ءۇشىن بۇل - ۇلكەن باقىت.

- ءبىر سۇحباتىڭىزدا «ايەل رەتىندە اسا باقىتتى بولدىم دەپ ايتا المايمىن» دەگەن ەكەنسىز.

- ەندى كۇنى-ءتۇنى راديودا ءجۇردىم. دەنساۋلىقتى كۇتپەپپىز، بۇيرەگىم اۋىرادى ەكەن، قان قىسىمىم جوعارى. ءوزىم نازىك، كىشكەنتاي ەدىم. كۇيەۋگە شىققاننان كەيىن ەكى جىلدان كەيىن، جيىرما جەتى جاسىمدا بوساندىم. تۇڭعىش بالاممەن بىرگە توعىز اي بويى اۋرۋحانادان شىقپادىم عوي. ول كەزدىڭ جاستارىن سىزدەرمەن سالىستىرۋعا بولمايدى. سىزدەر ءبارىن بىلەسىزدەر. ال ءبىز اڭعالداۋ بولىپپىز (كۇلىپ). ابىسىنىم گينەكولوگ-دارىگەر بولاتىن. ول اۋرۋحاناعا كەلگەندە بوسانىپ جاتقان ايەلدەردى كورسەتەدى. ءوزىم ەموتسياعا جاقىن اداممىن، انادان كەيىن ۇيىقتاي الماي قالاتىن ەدىم. سوسىن اۋرۋ بولىپ تۋعان بالالار بولادى. ۇلىمنىڭ اياعى سىنىپ، ءومىرىمنىڭ ءبارى سول بالانى ەمدەتۋمەن ءوتتى. جۇمىس، سوسىن بالانى ەمدەتۋ. الماتىدا بىرنەشە رەت وپەراتسيا جاسادى. رەسەيگە دە اپاردىق. جولداسىم ەكەۋىمىز كەزەكپەن بارىپ، تاماق تاسيمىز. ول ۋاقىتتا قازىرگىدەي دوڭگەلەگى بار شابادان دا جوق. بالانىڭ اۋىرعانى قيىن ەكەن. سونىڭ ءبارى وڭاي بولمادى. قازىر ويلاسام، جاستىقپەن بىلىنبەگەن ەكەن.

وتباسىندا ون ءبىر بالا بولدىق، قازىر ءبارىمىز بارمىز، قۇدايعا شۇكىر. جەزدەم جوعارعى سوت ءتوراعاسىنىڭ ورىنباسارى، الاش قايراتكەرلەرىن اقتاعان كىسى ەدى. سول ۇيدە وسكەنىمدى جاڭا ايتتىم. اپام مارقۇم - اكەمنىڭ جالعىز قارىنداسى، اكەم ەكەۋى جەتىم وسكەن. قانشا دەگەنمەن قىز بالا باۋىرمال بولادى ەكەن. سوسىن عوي، جالعىز اعاسىنىڭ قىزىن وقىتۋعا كومەكتەسكەنى. ول كىسى ءبارىمىزدى وقىتتى. مەنەن باسقا باۋىرلارىم ينتەرناتتا تۇردى.

جولداسىم مارلەن قامباروۆتىڭ ومىردەن وتكەنىنە ءبىراز ۋاقىت بولدى. پوليتەحنيكالىق ينستيتۋتتى بىتىرگەن. اكەسى مينيستر، ال ەنەم ءۇي شارۋاسىنداعى ايەل ەدى. ءبىر ۇيدە بەس بالا وسكەن: ءۇش بالا، ەكى قىز. جولداسىم ۇلدىڭ كىشىسى بولاتىن.

- قالاي تانىسقاندارىڭىز ەسىڭىزدە مە؟

- كورشى تۇردىق. جالپى، ورىسشا سويلەيتىن وتباسى بولاتىن. ۇيىندە ۇلكەن شەشەسى مەن ەنەم، ۇلكەندەر عانا قازاقشا سويلەيدى. اعالارى ۇيلەنىپ، جولداسىمنىڭ بويداق جۇرگەن كەزى بولاتىن. ەكى ءۇي جاقىن تۇرامىز. ونىڭ اپاسى سومكە اسىنىپ كەلە جاتادى. سوندايدا مەن كەزدەسىپ قالىپ، «اپا، مەن اپارىپ بەرەيىن» دەپ، ەكىنشى قاباتتاعى ۇيىنە جەتكىزىپ سالامىن. كورىپ قالعاندا كومەكتەسىپ جۇرەمىن، وعان قازاقشا سويلەيتىنىم ۇنايدى ەكەن. سودان اپا ۇيىنە بارىپ، مەنى ماقتاپ، «وسى بيعايشانىڭ ءسىڭلىسى، ساۋىق دەگەن قانداي تاماشا قىز. قازاقشا سويلەيدى. ۇنەمى كومەكتەسەدى، تاربيەلى» دەپ ايتادى ەكەن. ءبىراق «جاستار وزدەرى بىلەر» دەپ، ۇلدارىنا «وسىنى ال، كور» دەپ ايتۋعا ىڭعايسىزدانعان عوي. ءبىراق ۇلكەن كىسىلەردىڭ ءسوزىن قۇلاعى شالىپ جۇرگەن جولداسىم كەيىن كينوعا شاقىردى. مەن ورىس ءتىلىن بىلمەيمىن، ال ول ورىسشا وقىعان. وسىعان قاراماستان ەكەۋىمىز جاقسى ءتىل تابىسىپ كەتتىك. جولداسىم كەيىن قازاقشا جاقسى ۇيرەنىپ، ماقالداتىپ سويلەيتىن بولدى. ءسويتىپ، «ەل ماقتاعان جىگىتتى قىز جاقتاعان» دەپ، ءۇي بولعان جايىمىز بار.

جولداسىم ازىلگە جاقىن ادام ەدى. ءبىر نارسەنى تارس ەتكىزىپ ايتا سالاتىن. اكەسى كومسومولدان باستاپ پارتيا جۇمىستارىن ىستەگەن. تۋعان جەرى كوكشەتاۋعا زەينەتكە شىققاننان كەيىن عانا باردى. ەلىمىزدىڭ ءار وڭىرىندە قىزمەت اتقارعان. مىسالى، جولداسىم اقتوبەدە تۋسا، تاعى ءبىر بالاسى اتىراۋدا، ەندى ءبىرى تالدىقورعاندا دۇنيەگە كەلگەن.

وتباسىمىز تۋرالى ايتار بولسام، ەكى ۇلىمىز ومىرگە كەلدى. ۇلكەن ۇلىم ءال- فارابي اتىنداعى قاز ۇ ۋ-دىڭ فيزيكا فاكۋلتەتىن اعىلشىن تىلىندە ءبىتىرىپ، كەيىن لوندوندا ءبىلىم الدى. قازىر ۋنيۆەرسيتەتتە اعىلشىن تىلىنەن ساباق بەرىپ ءجۇر. اعىلشىن تىلىندە كىتاپ جازعان، Forbes جۋرنالىنا ۇنەمى شىعىپ تۇرادى. ال قولىمداعى ۇلىم - زاڭگەر.

- ۇلكەن جيىنداردا اراكىدىك بوي كورسەتىپ قالاسىز. جالپى، قازىر تەلەديدار كورەسىز بە، ديكتورلارعا كوڭىلىڭىز تولا ما؟

- جاقىندا «ۇركەر» سىيلىعىنىڭ جەڭىمپازدارىن ماراپاتتاۋ سالتاناتتى ءىس- شاراسىنا قاتىسىپ، بارىمەن كەزدەسىپ، ارقا- جارقا بولىپ قالدىم. ارداگەر دەپ شاقىرىپ تۇرادى، راقمەت. ونداي ءىس- شارالارعا قۋانا بارىپ تۇرامىن. دۋلات يسابەكوۆ «ەڭبەك ەرى» اتاعىن الدى عوي. ول كىسىمەن ۋنيۆەرسيتەتتە بىرگە وقىعانمىن. كەشە ءبىر جىگىت حابارلاسىپ، «حابار تۇسىرەمىز، ستۋدەنت كەزىندە قانداي بولعانىن ايتىپ بەرىڭىزشى» دەيدى. ەندى سوعان دايىندالىپ جاتىرمىن.

ال ديكتورلارعا كەلەتىن بولساق، وقىعان دۇنيەنى ءتۇسىنۋ ءبىر بولەك، وعان سەنۋ كەرەك. ءوزىڭ نە ايتىپ، نە قويعانىڭا ءوزىڭ سەنبەسەڭ، كوڭىلىڭ باسقا جاقتا بولسا، ماتىندە ايتىلعان ويدى جەتكىزە المايسىڭ. سوسىن مىنەز كەرەك. جالپى، ماعان جاتتاپ ايتقان ۇنامايدى. ونى دا دۇرىس جاتتامايتىندار بار عوي. سونى كورىپ، قىنجىلاسىڭ. قازاقتىڭ سوزدەرى كۇردەلى، سونى بۇزباي ايتۋ كەرەك. ايتاتىن باستى ءسوز بولادى، سوعان ءمان بەرگەن ءجون. سوسىن، ارينە ديكتور ءۇشىن سەزىمتالدىق، شىنايىلىق ماڭىزدى. ەفيرگە شىعىپ جۇرگەندەردىڭ قاتەسىن كورىپ قويامىن. ادەمى ادام، ادەمى قىز. ماعىناسى كەرەمەت نارسە ايتىپ جاتىر. ءبىراق ونى جاتتاپ الىپ، «تيسە تەرەككە، تيمەسە بۇتاققا» دەگەندەي جاي ايتىپ تۇر. ايتىپ تۇرعان نارسەڭ جان دۇنيەڭنەن شىعۋى كەرەك، ايتپەسە، ءبارى بەكەر.

- ارمانىڭىز بار ما؟

- ادامدا ارمان تاۋسىلعان با؟ جان-جاعىما اۋىرتپالىعىمدى تۇسىرمەي، ءوز اياعىممەن ءجۇرىپ، ءوز قولىممەن تاماعىمدى ءىشىپ، بەس ۋاقىت نامازىمدى وقىپ، ەشكىمگە قيىندىق ارتپاي وتكەن ادامداردىڭ ىزىمەن كەتسەم دەيمىن. ەكى ۇل عوي مەندە، قىز جوق. ەكى بالاما ادال ءسۇت ەمگەن، قازاقى تاربيە كورگەن، اقىلى بار، ەرىن سىيلاي الاتىن، جاقىن- جۋىعىن تۇسىنە الاتىن قىز كەزدەسسە ەكەن دەپ ارماندايمىن.

- اڭگىمەڭىزگە راقمەت!

سۇحباتتاسقان

ەلميرا جاقسىباي قىزى

«تۇركىستان»