ەكس-اكىم ەكىباستۇزداعى ەلدى دۇرلىكتىرگەن توتەنشە جاعدايعا بايلانىستى پىكىر ءبىلدىردى

استانا. قازاقپارات - ەكىباستۇز قالاسىنىڭ بۇرىنعى اكىمى نۇرجان اشىمبەتوۆ ەلدى دۇرلىكتىرگەن توتەنشە جاعدايعا پىكىر ءبىلدىردى، دەپ حابارلايدى قازاقپارات ءتىلشىسى.

«ەكىباستۇزدا توتەنشە جاعداي بولدى. دەگەنمەن پروبلەما ءبىر كۇننىڭ ىشىندە پايدا بولعان جوق. ەكىباستۇز جىلۋ ستانتسياسىن كەزىندە جەكە مەنشىك يەلەندى. اتالعان ءوڭىردىڭ جىلۋ ەلەكتر ورتالىعى - ەڭ ەسكى، توزعان نىسانعا جاتادى. ينۆەستور ول پروبلەماعا ۋاقىتىلى ءمان بەرمەگەن سەكىلدى. كەزىندە جاپپاي ساتىپ الدى. مۇمكىن مەملەكەتتەن سۋبسيديا بولادى دەگەن شىعار»، - دەيدى نۇرجان اشىمبەتوۆ NewsRoom99 Telegram كانالى تاراتقان ۆيدەودا.

سونداي-اق، ەكىباستۇز قالاسىنىڭ بۇرىنعى اكىمى باسشىلىققا 2018 -جىلى كەلگەنىن ايتتى.

«مەنىڭ الدىمدا كوممۋنالدىق شارۋاشىلىق پروبلەماسى تۇردى. ماسەلەنى شەشۋ قيىنعا سوقتى. ماماندار جىلۋ جەلىلەرىن اۋىستىرىپ جاتتى. ول جەردە جىلۋ مەن سۋ بەرۋ جەلىلەرىنىڭ قۇبىرى قاتار جۇرگىزىلگەن. جوندەۋ جۇمىسى كەزىندە جىلۋ جەلىلەرىن سۋدان بولەك تارتتى. وسىلايشا جىلۋ مەن سۋ بولەكتەندى. ءبىز بۇل ماسەلەنى كوتەرگەن سوڭ بيۋدجەتتەن قارجى ءبولىندى. ناتيجەسىندە ءبىرقاتار پروبلەما شەشىمىن تاپتى. باسشىلىقتان كەتكەننەن كەيىن جىلۋعا جاۋاپتىلار شارۋانى سول كۇيى قالدىرعان، شاماسى. وسى ۋاقىتقا دەيىن جىلۋ جەلىلەرىنە قانداي دا ءبىر جوندەۋ، قايتا سالۋ جۇمىستارى جۇرگىزىلمەگەن»، - دەيدى ول.