قىتايدا جاپپاي نارازىلىقتان كەيىن كوروناۆيرۋس شەكتەۋلەرى جەڭىلدەدى
2 جەلتوقسان, 09:54

قىتايدا جاپپاي نارازىلىقتان كەيىن كوروناۆيرۋس شەكتەۋلەرى جەڭىلدەدى

استانا. قازاقپارات - وتكەن دەمالىس كۇندەرى بۇكىل ەل اۋماعىندا بولعان كوۆيد شەكتەۋلەرىنە قارسى جاپپاي نارازىلىقتان كەيىن قىتاي بيلىگى «نولدىك كوۆيد» ساياساتىن ءبىرشاما جەڭىلدەتۋدى شەشتى، دەپ حابارلايدى قازاقپارات bbc-گە سىلتەمە جاساپ.

شاڭحاي مەن گۋاڭجوۋدىڭ ونداعان اۋدانىندا، اۋرۋ جۇقتىرۋشىلار ءوسىمى بايقالعان قالالاردا، سونداي-اق جاپپاي نارازىلىق بولعان ايماقتاردا بەيسەنبىدە شەكتەۋ شارالارى الىنىپ تاستالدى.

سەيسەنبىنىڭ باسىندا نارازىلىق تولقىنى باستالعان ءۇرىمجى قالاسىندا شەكتەۋلەر ءىشىنارا الىنعان ەدى.

ەل استاناسى بەيجىڭدە، قىتايدىڭ ەڭ ءىرى قالاسى شاڭحايدا، سونداي-اق نانجيڭ، چىڭدۋ، ۋحان جانە باسقا دا جەرلەردە شەرۋ بولدى.

شەرۋگە قاتىسۋشىلار ۇراننىڭ ورنىنا قولىنا بوس اق قاعاز ۇستاپ شىقتى. وسىلايشا ولار سەنزۋرا تىيىمدارىن اينالىپ وتۋگە تىرىستى.

شەكتەۋلەرگە جانە «نولدىك كوۆيد» ساياساتىنا قارسى ۇراندار اراسىندا ق ح ر ءتوراعاسى شي جينپيڭنىڭ وتستاۆكاعا كەتۋىن سۇراعان وتە ەرەكشە ساياسي تالاپتار بولدى.

كەيبىرەۋلەر بۇل وقيعانى «اق قاعازدار رەۆوليۋتسياسى» دەپ اتادى.

بۇعان دەيىن قىتاي باسشىلىعى «نولدىك كوۆيد» قاتاڭ ساياساتىن ۇستاندى. بۇل كەزدە كوروناۆيرۋس جۇقتىرۋ جاعدايلارىنىڭ كوپ بولۋىنا بايلانىستى بۇكىل ميلليونداعان قالالار كەنەتتەن لوكداۋنعا جابىلۋى مۇمكىن ەدى.

شىڭجاڭ- ۇيعىر اۆتونوميالىق ولكەسىنىڭ ورتالىعى ءۇرىمجى تۇرعىندارىنىڭ ايتۋىنشا، ءدال وسى ساياسات وتكەن بەيسەنبىدە كوپقاباتتى ۇيلەردىڭ بىرىندە ءورت شىعىپ، ادام ولىمىنە سەبەپ بولعان.

ويتكەنى بۇل عيماراتتىڭ تۇرعىندارىنا پاتەردەن شىعۋعا تىيىم سالىنعان ەكەن. ءورت سالدارىنان 10 ادام قازا تاپتى.

سوڭعى كۇندەرى قىتايدا پاندەميا باستالعاننان بەرى كوروناۆيرۋس جۇقتىرۋدىڭ رەكوردتىق تاۋلىكتىك كورسەتكىشى تىركەلدى.

سارسەنبىدە ءبىر تاۋلىكتە 36 مىڭنان استام جاعداي انىقتالعان.

پاندەميا باستالعالى بەرى قىتايدا رەسمي مالىمەت بويىنشا 5200 ادام قايتىس بولعان.

فوتو: www.bbc.com


جاڭالىقتار