قىتايدا كۇندى باقىلايتىن الەمدەگى ەڭ ۇلكەن راديوتەلەسكوپ سالىندى
تەلەسكوپ قىتايدىڭ وڭتۇستىك- باتىسىنداعى سىچۋان پروۆينسياسىنداعى ۇستىرتتە ورنالاسقان. ول ءارقايسىسىنىڭ ديامەترى 6 مەتر بولاتىن 313 انتەننادان تۇرادى. قۇرىلعىنىڭ الىپ جاتقان جالپى اۋماعى - 1 شاقىرىم. راديوتەلەسكوپتىڭ باستى كاليبرلەۋ انتەنناسى شەڭبەردىڭ ورتاسىنداعى مۇنارانىڭ ەڭ جوعارعى بولىگىنە ورناتىلعان. اسپان دەنەلەرىن باقىلاۋ 150-450 مەگاگەرتس جيىلىكپەن جۇرگىزىلەدى.
تەلەسكوپ كۇننەن بولىنەتىن شىعارىندىلار مەن ونىڭ ساۋلەلەرىن باقىلاۋعا ارنالعان. بۇل ءوز كەزەگىندە عارىشتاعى اۋا رايىنىڭ وزگەرۋىن انىقتاپ، جەرگە جاقىن راديۋستا ۇشىپ جۇرگەن اپپاراتتاردىڭ ىستەن شىعۋ ىقتيمالدىعىن ازايتۋعا مۇمكىندىك بەرمەك.
«DSRT» قۇرىلىسى 2021 -جىلى باستالعان. ال ونىڭ انتەننالارىن ورناتۋ بيىل قاراشا ايىنىڭ ورتاسىندا اياقتالدى. ەڭ الىپ تەلەسكوپپەن عىلىمي زەرتتەۋ جۇرگىزۋ ءىسى كەلەر جىلى جازدا باستالماق. ءمالىم بولعانداي، باقىلاۋلار ناتيجەسىندە الىنعان اقپاراتتار كوپشىلىك ءۇشىن قولجەتىمدى بولادى.