قازا بولعان قۇتقارۋشى اسقار زابيكۋليننىڭ ەسىمى استاناداعى قاي كوشەگە بەرىلمەك

استانا. قازاقپارات - قازا بولعان استانالىق ءورت ءسوندىرۋشى اسقار زابيكۋليننىڭ ەسىمى قانداي كوشەگە بەرىلەتىنى بەلگىلى بولدى، دەپ حابارلايدى قازاقپارات.

قالا اكىمدىگىنىڭ رەسمي سايتىندا ءمالىم ەتىلگەندەي، بۇگىن استانا ونوماستيكا كوميسسياسىنىڭ وتىرىسى ءوتتى. ونىڭ بارىسىندا ادامداردى قۇتقارىپ، ەرلىكپەن قازا تاپقان اسقار زابيكۋليننىڭ ەسىمىن ەسىل اۋدانىندا («ۇركەر» تۇرعىن الابى) ورنالاسقان ە-583 كوشەسىنە بەرۋ تۋرالى شەشىم قابىلداندى. وسى ەسىل اۋدانىندا ءورت ءسوندىرۋشى سايات ابەيەۆ پەن گراناتانى كەۋدەسىمەن جاۋىپ، تەرروريستى زالالسىزداندىرعان پوليتسيا كاپيتانى عازيز بايتاسوۆتىڭ ەسىمىمەن اتالعان كوشەلەر بار ەكەنىن ايتا كەتەيىك.

سونداي-اق ونوماستيكا كوميسسياسى اسقار زابيكۋلين قىزمەت ەتكەن 6№ مامانداندىرىلعان ءورت ءسوندىرۋ بولىمىنە ونىڭ ەسىمىن بەرىپ، مەكەمە الدىنا بيۋست ورناتۋدى ۇسىندى. بۇدان بولەك، ءورت ءسوندىرۋشىنىڭ ەستەلىك سۋرەتىن استانا قالاسىنىڭ ا. پۋشكين كوشەسىندە ورنالاسقان «قۇتقارۋشىلار ساياباعىنداعى» اقپارات تاقتاسىنا ورنالاستىرۋ شەشىمى قابىلداندى. بۇل ساياباقتا قايتىس بولعان قۇتقارۋشىلاردى ەسكە الۋعا ارنالعان اقپارات تاقتاسى ورنالاستىرىلعان.

قالانىڭ ونوماستيكا كوميسسياسىنىڭ وتىرىسىندا قارالعان ۇسىنىستار ەندى استانا ءماسليحاتىنىڭ تۇراقتى كوميسسيالارىنىڭ جاريا تىڭداۋىنا، استانا قوعامدىق كەڭەسىنىڭ قاراۋىنا جىبەرىلەدى.

بۇعان دەيىن قۇتقارۋشى اسقار زابيكۋليننىڭ وتباسىنا مەملەكەت باسشىسىنىڭ تاپسىرماسى بويىنشا ءۇش بولمەلى پاتەردىڭ كىلتى تابىستالعان بولاتىن. پاتەر اسقاردىڭ جۇبايىنا جەكە مەنشىككە بەرىلدى. اكىمدىك مالىمەتىنشە، قازىرگى ۋاقىتتا پاتەردە ارلەۋ جانە ودان ءارى جيھازبەن تولىقتىرۋ جۇمىستارى جۇرگىزىلىپ جاتىر.

قۇتقارۋشى ايان كەمپىروۆتىڭ وتباسىنا يپوتەكانى وتەۋگە كومەك كورسەتىلدى. ونىڭ سوماسى 24 ميلليون تەڭگەنى قۇرايدى. سونىمەن قاتار اسقار زابيكۋلين مەن ايان كەمپىروۆتىڭ وتباسىلارىنا 6 ميلليون تەڭگە سوماسىنا نەسيەلەر وتەلدى.