پاۆلودار وبلىسىنىڭ ەكس-اكىمى ەكىباستۇز تۇرعىندارىنان كەشىرىم سۇرادى

None
ەكىباستۇز. قازاقپارات - بۇگىن پاۆلودار وبلىسىنىڭ اكىمى قىزمەتىنەن بوساتىلعان ءابىلقايىر سقاقوۆ ەكىباستۇز قالاسىنىڭ تۇرعىندارىنان كەشىرىم سۇرادى، دەپ حابارلايدى قازاقپارات.

«قۇرمەتتى جەرلەستەر! مەن ءۇشىن سىزدەرگە قىزمەت ەتۋ اسا زور قۇرمەت بولدى. ماسەلەلەردى شەشۋدى باستى باسىمدىق ەتە وتىرىپ، بارلىعىن ءارقاشان دا شىنايى جانە ادال ورىندادىم. جىلدار بويى جينالعان ماسەلەلەردىڭ ءبىراز بولىگى شەشىلدى، قالعاندارىن شەشۋگە ۋاقىت كوبىرەك قاجەت بولدى. ەكىباستۇزداعى توتەنشە جاعداي ءدال سول - ۇزاق ۋاقىت بويى جينالىپ كەلگەن جانە تەز شەشىلمەيتىن پروبلەما. ⠀

دەگەنمەن، قادىرلى ەكىباستۇز تۇرعىندارى، قالىپتاسقان جاعداي ءۇشىن ءوز جاۋاپكەرشىلىگىمنىڭ دە بار ەكەنىن بىلەمىن جانە سىزدەردەن شىن جۇرەكتەن كەشىرىم سۇرايمىن! وسى كۇندەرى مەنىڭ بارلىق ويىم مەن ۋايىمىم سىزدەر تۋرالى بولدى جانە سولاي بولىپ قالا بەرەدى. سىزدەرگە قايراتتىلىق، ال ماماندار مەن ارىپتەستەرىمە ماسەلەنىڭ جەدەل شەشىلۋىن تىلەيمىن»، - دەپ جازدى ءا. سقاقوۆ الەۋمەتتىك جەلىدەگى پاراقشاسىندا.

بۇعان دەيىن حابارلاعانىمىزداي، ق ر پرەزيدەنتى قاسىم-جومارت توقايەۆ بۇگىن ءابىلقايىر سقاقوۆتى پاۆلودار وبلىسىنىڭ اكىمى قىزمەتىنەن بوساتتى. ونىڭ ورنىنا ۋاقىتشا ولەگ كرۋك تاعايىندالدى.

ەسكە سالايىق، 27- قاراشادا ەكىباستۇز جىلۋ ەلەكتر ورتالىعىندا اپات بولىپ، قالا تۇرعىندارى جىلۋسىز قالدى.

كەيىنىرەك جىلۋ قازاندىعىنىڭ ىستەن شىعۋىنا بايلانىستى وبلىس اكىمى باستاعان جەدەل شتاب قۇرىلدى.

ەكىباستۇز قالاسىنىڭ وقۋشىلارى ونلاين وقۋعا كوشىرىلدى.

28- قاراشا كۇنى تاڭەرتەڭ قالادا جەرگىلىكتى اۋقىمداعى توتەنشە جاعداي جاريالاندى.

30- قاراشادا ەكىباستۇزعا پرەمەر-مينيستر ءاليحان سمايىلوۆ بارىپ، كىنالىلەر جاۋاپقا تارتىلاتىنىن ايتتى. اپات سەبەبى رەتىندە جىلۋ جەلىلەرىنىڭ توزۋى، جىلۋ ورتالىعى باسشىلىعى تاراپىنان نەمقۇرايدىلىق پەن ينۆەستيتسيالاردىڭ جەتكىلىكسىزدىگى اتالدى.

بۇگىن تاڭەرتەڭ بەرىلگەن مالىمەتكە سايكەس، 17- كوپقاباتتى تۇرعىن ءۇي ورتالىق جىلۋ جەلىسىنە ءالى قوسىلعان جوق. ونىمەن قوسا، 58 تۇرعىن ءۇي سۋدان اجىراتىلدى.


سوڭعى جاڭالىقتار