قازاقستاندا ازىق-تۇلىك ءبىر ايدا قانشاعا قىمباتتادى
قازاقپارات بۇل تۋرالى ۇلتتىق ستاتيستيكا بيۋروسىنا سىلتەمە جاساپ حابارلايدى.
ازىق-تۇلىك تاۋارلارىنىڭ اراسىندا قيار - 41,5 پايىز، قىزاناق - 26,1 پايىز، جۇمىرتقا - 6,7 پايىز، پياز - 5,9 پايىز، كۇرىش - 3,5 پايىز، قايماق - 3,4 پايىز، جاڭا پىسكەن جەمىس - 3 پايىز، تۇزدالعان مايشاباق - 2,7 پايىز، ايران - 2,5 پايىز، ءسۇت - 2,4 پايىز، كونديتەرلىك ونىمدەر - 1,6 پايىز، ىرىمشىك جانە سۇزبە 1,5 پايىز قىمباتتادى. ال ءسابىز - 2,9 پايىز، قۇمشەكەر - 1,9 پايىز ارزاندادى.
قاراشادا ونىڭ الدىنداعى ايمەن سالىستىرعاندا ازىق-تۇلىككە جاتپايتىن تاۋارلار باعاسى 1,6 پايىز ءوستى. ديزەل وتىنى - 13,9 پايىز، تاس كومىر - 2,6 پايىز، اعاش وتىنى 1,6 پايىز قىمباتتادى. جۋۋ جانە تازالاۋ قۇرالدارى - 4,1 پايىز، جەكە پايدالانىلاتىن تاۋارلار - 2,8 پايىز، كيىم جانە اياق كيىم، ىدىس، توقىما بۇيىمدارى - 1,6 پايىز قىمباتتادى.
اقىلى قىزمەتتەر قۇنى وتكەن ايدا 0,8 پايىز ارتتى. باعانىڭ ءوسۋى قوعامدىق تاماقتاندىرۋ قىزمەتتەرىنە - 2,7 پايىز، مونشا قىزمەتتەرىنە - 1,9 پايىز، شاشتاراز بەن سۇلۋلىق سالوندارى قىزمەتتەرىنە - 1,8 پايىز، دەنساۋلىق ساقتاۋ، دەمالىس جانە سپورتتىق ءىس-شارالار سالاسىنداعى قىزمەتتەرگە - 1,7 پايىز، قوناق ءۇي قىزمەتتەرىنە 1 پايىز قۇرادى.
قاراشا ايىندا ايلىق ينفلياتسيا دەڭگەيى قازانمەن سالىستىرعاندا 0,2 پايىزدىق تارماققا تومەندەپ، 1,4 پايىز قۇراعان.
ال جىلدىق ەسەپتەۋدە19,6 پايىز قۇرادى. ءبىر جىلدا ازىق-تۇلىك تاۋارلارىنىڭ باعاسى - 24,1 پايىز، ازىق-تۇلىككە جاتپايتىن تاۋارلار - 18,6 پايىز، اقىلى قىزمەتتەر - 14,1 پايىز قىمباتتادى.