استانادا سپورت سەكسيالارىنا كەلەسى جىلى قانشا قاراجات بولىنەدى
بۇل تۋرالى استانا قالاسى دەنە شىنىقتىرۋ جانە سپورت باسقارماسى باسشىسىنىڭ مىندەتىن اتقارۋشى ەركەعالي كاربوزوۆ ءمالىم ەتتى، دەپ حابارلايدى قازاقپارات ءتىلشىسى.
«بۇگىندە استانادا مەملەكەتتىك تاپسىرىس بويىنشا سپورتتىڭ 25 تۇرىنەن 575 سپورتتىق سەكسيا جۇمىس ىستەپ تۇر. جىل باسىندا بەرىلگەن ۆاۋچەرلەر سانى 44998 بولسا، ونىڭ ىشىندە بەلسەندىسى 27 369 ۆاۋچەر. وتكەن جىلى سپورت باعدارلاماسىنا 602 ميلليون تەڭگە بولىنسە، بيىل قارقىن الىپ، 1,3 ميلليارد تەڭگەگە جەتتى. سونىمەن قاتار بيۋجەتتى ناقتىلاۋ كەزىندە ءماسليحات دەپۋتاتتارىنىڭ قولداۋىمەن قوسىمشا قاراجات ءبولىندى. وسىلايشا جەرگىلىكتى بيۋجەتتەن باس-اياعى 5,6 ميلليارد تەڭگە قارجى ءبولىندى»، - دەدى ەركەعالي كاربوزوۆ ەلوردا ءماسليحاتىنىڭ وتىرىسىندا.
ونىڭ ايتۋىنشا، تاياۋدا سپورت سەكسيالارىنا ۇكىمەت رەزەرۆىنەن قوسىمشا 660 ميلليون 201 مىڭ تەڭگە قارجى ءبولىندى.
«كەلەسى جىلعا بيۋجەت ءليميتى بويىنشا 2 ميلليارد تەڭگە قاراستىرىلىپ وتىر. پروبلەمالارعا كەلسەك، ءبىز جوعارىدا اتالعان 575 سپورتتىق سەكسيانىڭ ءبارىن بارىپ، قاراپ ۇلگەرمەدىك. ويتكەنى بىزدە مونيتورينگ جۇرگىزەتىن قۇزىرەت جوق. ءبىز اتالعان جايت بويىنشا قوعامدىق كەڭەسپەن بىرلەسىپ جۇمىس جاساۋعا تىرىستىق. ازىرگە ماسەلە ءوز شەشىمىن تاپپاي تۇر. سپورت سەكسياسىنا بارعان بالانىڭ اتا-اناسى تابەلگە قول قويادى. قازان ايىنان باستاپ ArtSport پلاتفورماسى بىزگە IP مەكەنجايدى كورۋ مۇمكىندىگىن بەردى. اتالعان مۇمكىندىك ارقىلى ءبىر مەزەتتە 80-90 بالانىڭ قول قويعانىن كورىپ وتىرمىز. وكىنىشكە قاراي، بىزدە ول اقپاراتتىڭ راستىعىن تەكسەرەتىن مۇمكىندىك جوق. دەگەنمەن جەتكىزۋشى مەن بالالاردىڭ اتا-اناسىنان سەكسياعا بارىپ جۇرگەنى تۋرالى مالىمەتتى الىپ وتىرمىز»، - دەيدى ول.
سونداي-اق دەنە شىنىقتىرۋ جانە سپورت باسقارماسى باسشىسىنىڭ مىندەتىن اتقارۋشى باقىلاۋ مەن قاداعالاۋ ماسەلەسىن جۇيەلەۋ كەرەكتىگىن ايتتى.