قازاقمىسقا جاڭا باسشى تاعايىندالدى

استانا. قازاقپارات - «قازاقمىس كورپوراتسياسى» ج ش س باسقارما ءتوراعاسى بولىپ نۇراحمەت نۇريەۆ تاعايىندالدى.

«قازاقمىس حولدينگ» ج ش س ديرەكتورلار كەڭەسىنىڭ شەشىمىمەن «قازاقمىس كورپوراتسياسى» جشس باسقارما ءتوراعاسى بولىپ نۇراحمەت نۇريەۆ تاعايىندالدى. ول كومپانيانى 2006 -جىلدان بەرى ۇزدىكسىز باسقارىپ كەلە جاتقان ەدۋارد وگايدىڭ ورنىنا كەلدى.

ەڭبەك ۇجىمى الدىندا ءوزىنىڭ ءىزباسارىن تانىستىرا وتىرىپ، ەدۋارد وگاي مۇنداي شەشىم «قازاقمىس» كومپانياسىنىڭ جۇرەگى بولىپ تابىلاتىن جاڭا ۇلىتاۋ وبلىسىنىڭ قۇرىلۋىنا بايلانىستى دا تۋىنداعانىن اتاپ ءوتتى.

- نۇراحمەت قانات ۇلى جەزقازعاندا جۇمىس ىستەيتىن بولادى جانە ورتالىق كەڭسە وسىندا ورنالاسادى. ءبىز جەزقازعان قالاسىندا ورنالاساتىن بولامىز جانە كومپانيانىڭ قولدانىستاعى مودەلدەگى شەشىم قابىلداۋ ورتالىعى دا وسىندا بولادى. نۇراحمەت قانات ۇلى جاس مامان بولسا دا، تاجىريبەسى جەتكىلىكتى جانە ول بىزدەن دە جاقسى ناتيجە كورسەتەدى، - دەگەن ەدۋارد وگاي جاڭا باسشىنىڭ جوعارى كاسىبي جانە ادامي قاسيەتتەرىن اتاپ ءوتىپ، جاڭا لاۋازىمدا تابىس تىلەدى.

نۇراحمەت نۇريەۆ ءوز سوزىندە قىزمەتكەرلەر مەن وندىرىستىك ۇجىم الدىندا كورسەتكەن جوعارى سەنىمى ءۇشىن باسشىلىققا العىسىن ءبىلدىرىپ، كومپانيانىڭ قۇندىلىقتارى مەن ماقساتتارىنا ادالدىعىن، سونداي- اق وبلىستى دامىتۋ جانە ەلدىڭ جوعارى باسشىلىعىمەن جاڭا، ءادىل قازاقستان قۇرۋ جونىندەگى ورتاق ۇستانىمىن ءبىلدىردى.

نۇراحمەت قانات ۇلى 1989 -جىلى تۋعان. ۇلى بريتانيادا ءبىلىم العان، سونىمەن قاتار Anglia Ruskin University ىسكەرلىك اكىمشىلەندىرۋ ماگيسترى دارەجەسىنە يە.

2011 -جىلدان 2013 -جىلعا دەيىن Hamble Group-تا قارجىلىق تالداۋشى بولىپ جۇمىس ىستەدى.

2013-2015 -جىلدارى پاۆلودار جانە اتىراۋ قالالارىندا مۇناي وڭدەۋ زاۋىتتارىنىڭ قۇرىلىمدىق بولىمشەلەرىندە جۇمىس ىستەدى.

2015-2019 -جىلدارى «مايكۋبەن ۆەست» ج ش س جانە «شۇباركول پرەميۋم» ا ق كومىر ءوندىرۋشى كاسىپورىندارىندا قارجى ديرەكتورى، باس ديرەكتوردىڭ كورپوراتيۆتىك دامۋ جونىندەگى ورىنباسارى بولىپ جۇمىس ىستەدى.

2019 -جىلدان 2020 -جىلعا دەيىن «ينتەرگاز ورتالىق ازيا» ا ق تاراز ۋمگ فيليالى ديرەكتورىنىڭ ورىنباسارى، «قازترانسگاز» ا ق تاريفتەر جانە ينۆەستيتسيالىق ساياسات دەپارتامەنتى ديرەكتورىنىڭ ورىنباسارى بولىپ جۇمىس ىستەدى.

«قازاقمىس» كورپوراتسياسىنداعى ەڭبەك جولىن 2020 -جىلى جوبالاۋ توبىنىڭ باسشىسى قىزمەتىنەن باستادى. سول جىلدىڭ قىركۇيەك ايىنان باستاپ «قازاقمىس كورپوراتسياسى» ج ش س اۋتسورسينگ جونىندەگى ديرەكتورى قىزمەتىن اتقاردى.

2021 -جىلدىڭ ماۋسىم ايىندا «قازاقمىس سمەلتينگ» جشس باس ديرەكتورى بولىپ تاعايىندالدى.