پرەمەر-مينيستر قوستاناي وبلىسىنىڭ جاڭا اكىمىنە قانداي تاپسىرمالار بەردى

قوستاناي. قازاقپارات - بۇگىن قوستاناي وبلىسىنىڭ اكىمى بولىپ تاعايىندالعان قۇمار اقساقالوۆتى وبلىس اكتيۆىنە تانىستىرعان پرەمەر-مينيستر ءاليحان سمايىلوۆ اكىمدىكتىڭ الدىنا ءبىرقاتار مىندەت قويىلعانىن ايتتى.

بۇل تۋرالى قازاقپارات ۇكىمەتتىڭ سايتىنا سىلتەمە جاساپ حابارلايدى.

ونىڭ ىشىندە، مەملەكەت باسشىسىنىڭ «ادىلەتتى قازاقستان: ءبارىمىز جانە ءارقايسىمىز ءۇشىن. قازىر جانە ءاردايىم» سايلاۋالدى باعدارلاماسى اياسىندا حالىقتىڭ ءومىر ءسۇرۋ دەڭگەيى مەن ءال-اۋقاتىن ارتتىرۋ شارالارى قاراستىرىلعان. الداعى جىلدارى وبلىستا 7,5 مىڭ وقۋشىعا ارنالعان 9 جاڭا مەكتەپ، 25 العاشقى مەديتسينالىق-سانيتارلىق كومەك نىسانىن سالۋ جانە 2 اۋداندىق اۋرۋحانانى جاڭعىرتۋ جوسپارلانىپ وتىر. بۇدان باسقا، اگروونەركاسىپتىك كەشەندى جانە اۋىلداعى كاسىپكەرلىكتى دامىتۋ جونىندەگى ءىس-شارالار كوزدەلگەن.

«قوستاناي وبلىسى ءۇشىن ماشينا جاساۋ سالاسىنىڭ ماڭىزى وتە زور. سالانىڭ ءوڭىر مەن جالپى ەل ءۇشىن ماڭىزدىلىعىن ەسكەرە وتىرىپ، لوكاليزاتسيا دەڭگەيىن ودان ءارى ارتتىرۋ، قۇرامداس بولىكتەرى ءوندىرىسىن دامىتۋ، سونداي-اق جوعارى بىلىكتى كادرلاردى دايارلاۋ بۇگىنگى تاڭدا وزەكتى ماسەلەلەر بولىپ تابىلادى»، — دەدى ول.

سونىمەن قاتار پرەمەر-مينيستر الەۋمەتتىك وبەكتىلەردى، تۇرعىن ءۇي-كوممۋنالدىق جانە ەنەرگەتيكالىق ينفراقۇرىلىمدى جاڭعىرتۋ، جاڭا يندۋستريالىق جوبالاردى ىسكە قوسۋ، جۇمىس ورىندارىن قۇرۋ جانە جەرگىلىكتى جولداردىڭ ساپاسىن ارتتىرۋ جونىندەگى شارالاردى ىسكە اسىرۋ جۇمىستارىن كۇشەيتۋ قاجەتتىگىنە نازار اۋداردى.

«وبلىس باسشىلىعى جىلۋ بەرۋ ماۋسىمىنىڭ تۇراقتى ءوتۋى جانە ج ە و مەن جىلۋ تراسسالارىندا اپاتتىق جاعدايلاردىڭ الدىن الۋ بويىنشا بارلىق قاجەتتى شارالاردى قابىلداۋى قاجەت»، — دەپ تۇيىندەدى ءاليحان سمايىلوۆ.