جەتىسۋ وبلىسىندا مال قالىڭ قاردىڭ استىندا قالدى دەگەن اقپارات راس پا

تالدىقورعان. قازاقپارات - جەتىسۋ وبلىسىنىڭ اكىمدىگى جەلىدە وسى وڭىردە مال قالىڭ قاردىڭ استىندا قالدى دەلىنگەن اقپاراتتى جوققا شىعاردى، دەپ حابارلايدى قازاقپارات ءتىلشىسى.

تەلەگرام كانالداردىڭ بىرىندە جەتىسۋ وبلىسىندا ءىرى قارا مەن ۇساق مالدىڭ قالىڭ قار استىندا قالعانى جانە جولدىڭ قاردان ۋاقىتىلى تازالانباعانى تۋرالى اقپارات جاريالانعان.

وسىعان بايلانىستى وڭىرلىك اكىمدىك تۇسىنىك بەردى.

«بۇل جاريالانىم - مونتاجدالعان بەينەجازبا. ونىڭ جەتىسۋ وبلىسىنا ەش قاتىسى جوق. كەربۇلاق اۋدانىنا قاراستى ەكى اۋىلدىق وكرۋگتە ارالتوبە دەپ اتالاتىن 2 ەلدى مەكەن بار. بۇل ۆيدەو ارالتوبە دەپ اتالاتىن قوس اۋىلدا دا تۇسىرىلمەگەن. ۆيدەونىڭ العاشقى بولىگى (قارعا كومىلىپ قالعان تۇيە مەن قويدىڭ جانە ايازدا قالعان مالشىنىڭ ۆيدەوسى) قىتايدىڭ شىڭجاڭ ايماعىندا بولعان دەگەن اقپارات بىرەر كۇن بۇرىن عالامتوردا تارادى. ياعني، بۇنىڭ دا جەتىسۋ وبلىسىنا ەش قاتىسى جوق. ال بەينەجازبا سوڭىندا اۆتور «زايسان، مارقاكول» دەپ اتاپ وتكەن جول بولىگى دە جەتىسۋ وبلىسىنا قارامايتىندىعى بەلگىلى. ارالتوبە اۋىلدارىندا تۇرعىنداردىڭ ءۇي جانۋارلارى قوراسىندا، قاۋىپسىز جەردە تۇر»، - دەلىنگەن جەتىسۋ وبلىسى اكىمىنىڭ باسپا ءسوز قىزمەتى تاراتقان حابارلامادا.

ۆەدومستۆونىڭ اقپاراتىنا سايكەس، بۇل جونىندە تۇرعىندار تاراپىنان قانداي دا ءبىر شاعىم تۇسپەگەن.

سول سەبەپتى اكىمدىك حالىقتان جالعان اقپاراتقا سەنبەۋدى، تاراتپاۋدى جانە اقپاراتتىڭ شىنايلىعىنا كوز جەتكىزۋدى سۇرايدى.