سۋىق سۋ سانانى سەرگىتەدى - قىسى- جازى تەڭىزگە تۇسەتىن اقتاۋلىق شىمىر قىز

اقتاۋ. قازاقپارات - كاسپي تەڭىزىنە قىسى- جازى شومىلاتىن اقتاۋلىقتار بار. شىمىر قىز شۇعا ابدۋللايەۆا سۋىق سۋ دەندى شىنىقتىرىپ قانا قويماي، سانانى دا سەرگىتەتىنىن ايتادى، دەپ حابارلايدى قازاقپارات ءتىلشىسى.

شۇعا ابدۋللايەۆا - اقتاۋ قالاسىنىڭ تۇرعىنى. كاسپيدىڭ جاعاسىندا وسكەن ول تەڭىزدە جۇزگەندى جاقسى كورەدى. سالاۋاتتى ءومىر سالتىن ۇستانادى. 2020 -جىلدان بەرى سۋىق سۋعا ءتۇسۋدى ادەتكە اينالدىرعان.

«2019 -جىلى كوۆيدپەن اۋىردىم. جازىلعاننان كەيىن تەڭىزدىڭ جىلى كەزىندە عانا ەمەس، سۋىق كەزىندە دە سۋعا ءتۇسۋدى ويلادىم. اعزاعا سترەسس بەرمەۋ كەرەك. نەگىزى، مي دايىندالۋ كەرەك. دەنە ميدىڭ تاپسىرماسىن ورىندايدى. الدىن الا دايىندالدىم. ۇيدە كونتراستى دۋش قابىلداپ ءجۇردىم. ۇناي باستادى. سودان جاز بويى شومىلىپ كەلىپ، كۇز، قىستا جالعاستىرىپ كەتتىم. ەشقانداي قيىندىق تۋمادى. جالپى، سول پاندەميادان كەيىن حالىقتىڭ دەنساۋلىعىنا ءمان بەرە باستاعانىن بايقادىم. ويتكەنى، جاعالاۋدا سەرۋەندەيتىن، تەڭىزگە تۇسەتىن ادامدار ەداۋىر كوبەيدى»، - دەيدى ول.

شىمىر قىز سۋىق سۋعا ءتۇسۋدىڭ اسەرى ەرەكشە ەكەنىن ايتادى.

«اسەرى وتە كەرەمەت. تەڭىزگە تۇسكەنگە دەيىن باسقا ادامسىڭ، تۇسكەننەن كەيىن باسقاسىڭ. كەلە جاتقاندا ۇيقىلى- وياۋ كۇيدە بولامىز. ال، تەڭىزگە ءتۇسىپ شىققاننان كەيىن كوزىڭ اشىلعانداي بولادى. اينالا ادەمىلەنە تۇسەدى. تابيعات، تەڭىزدىڭ ءتۇسى قانىعىراق بولىپ كەتەدى. دەنساۋلىققا دا پايداسى زور. يممۋنيتەتتى جاقسارتادى. سالقىن سۋعا شومىلعالى تۇماۋمەن اۋىرىپ كورگەن جوقپىن»، - دەيدى شۇعا.

سۋىق سۋعا ءتۇسۋ - قىسقا مەرزىمدى پروتسەدۋرا. ادام بار- جوعى 1-2 مينۋتقا عانا سۇڭگىپ شىعادى. شىققان كەزدە بويداعى كۇيزەلىس تە ۇشتى- كۇيلى جويىلىپ، اعزادا سىرتقى كۇشتەرگە قارسى تۇراتىن يممۋنيتەت پايدا بولىپ، دەنە شىنىعادى.

كاسپي تەڭىزى تۇزدى، سوندىقتان سۋى قاتپايدى. تەك جاعاعا جاقىن تۇستارى قايماقتانىپ، مۇز پايدا بولادى.

«تەڭىز سۋىنىڭ -1 -2 گرادۋس بولىپ تۇرعاندا شومىلعانىم - ەڭ سالقىنى. ودان دا سۋىعىراق بولسا جاقسى ەدى. ويتكەنى، بۇل تەمپەراتۋراعا مەنىڭ اعزام ابدەن ۇيرەنىپ العان. يممۋندىق جۇيەم ودان سايىن جاقسى جۇمىس جاسار ما ەدى؟!» - دەيدى ول.

قازىر شۇعا ءوزىنىڭ سالاۋاتتى ۇستانىمدارىن الەۋمەتتىك جەلىدە جاريالاپ، سۋىق سۋعا تۇسكىسى كەلەتىندەرگە كەڭەس بەرىپ، ۇيرەتىپ تە ءجۇر.

«دارىگەرگە قارالىپ، پسيحولوگيالىق جاعىنان دا دايىندالىپ كەلگەندەردى ۇيرەتىپ ءجۇرمىن. 1-2 رەت شومىلىپ، ارىقاراي جالعاستىرىپ كەتىپ جاتقاندار كوپ. جالپى، ومىردە جەتىستىككە جەتۋ ءۇشىن ءتارتىپ كەرەك. اشىعۋ، سۋىق سۋعا شومىلۋ - ءبارى دە ءتارتىپتىڭ ارقاسىندا بولادى»، - دەيدى شىمىر قىز.

سالقىن سۋعا ءتۇسۋدىڭ پايداسىن دارىگەرلەر دە جوققا شىعارمايدى. مۇزداي سۋعا شومىلۋ ارتىق سالماقتان ارىلتىپ، تەرىنىڭ سەرپىمدىلىگىن ارتتىرادى. شىمىرلار بۇلشىق ەت پەن بۋىن اۋرۋىن سەزىنبەيدى، جەدەل جۇقپالى اۋرۋلاردى ۇمىتادى. بويدا كۇش- قۋات ارتىپ، ۇيقى مەن تابەتكە دە وڭ اسەرىن تيگىزەدى.

«تەڭىزگە سۋىق كەزدە شومىلۋ پايدالى. وستەوحوندروز اۋرۋى بار، سالماق تاستاعىسى كەلەتىن، جۇيكە مەن يممۋندىق جۇيەسىن كۇشەيتكىسى كەلەتىندەرگە پايداسى زور. اعزانى سەرگەك قىلادى. ءبىراق، تەك قانا دەنى ساۋ ادامدار سۋىق سۋعا شومىلۋ كەرەك. جۇرەگى اۋىراتىندار، تەرى اۋرۋلارى بار ازاماتتار تۇسپەگەنى دۇرىس»، - دەيدى دارىگەر نيەۆرولوگ ءىلياس ق ۇلىمبەتوۆ.

اقتاۋدا كۇن رايىنا، جىلدىڭ مەزگىلىنە قاراماستان تەڭىزگە تۇسەتىندەردىڭ قاتارى ارتىپ كەلەدى. ولار 31- جەلتوقساندا جاعالاۋعا جينالىپ، بيىلعى جىلدى تەڭىزدە شىعارىپ سالۋدى جوسپارلاپ وتىر.