14:05, 01 - جەلتوقسان 2022 | GMT +6
مينيستر استانادا وتكەن سەنبىدە نە سەبەپتى ينتەرنەت بولماعانىن ءتۇسىندىردى
استانا. قازاقپارات - سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين استاناداعى ميتينگ كەزىندە نە سەبەپتى ۇيالى بايلانىس ينتەرنەتى بولماعانىن ءتۇسىندىردى، دەپ حابارلايدى قازاقپارات ءتىلشىسى.
ايتا كەتەيىك، 26-قاراشا كەشكە قاراي ءبىر ساعات شاماسىندا ينتەرنەت جىلدامدىعى ازايعان ەدى.
«سول كۇنى كەشكى ساعات توعىز شاماسىندا مەملەكەتتىك تەحنيكالىق قىزمەتى ءتيىستى اقپاراتتى بەرگەن بولاتىن. ولار ءتيىستى ينتەرنەت شليۋزدى قاداعالايدى. سول ينتەرنەت شليۋزگە بەرىلەتىن ەلەكتر قۋاتى جۇيەلەرىندە اقاۋ بولعان. وسىنىڭ سالدارىنان ينتەرنەت شليۋزدىڭ جۇمىسى توقتاپ قالدى. ەلەكتر جابدىقتارى ىسكە قوسىلعان سوڭ ينتەرنەت قايتادان قوسىلدى»، - دەدى باعدات مۋسين سەنات وتىرىسىنان كەيىنگى باسپا ءسوز ءماسليحاتىندا.
بۇدان بۇرىن 26-قاراشادا استانا مەن اقمولا وبلىسىندا نەگە ينتەرنەت بولماعانى ايتىلعان ەدى.
سونىمەن قاتار، استانا قالاسىنىڭ پوليتسياسى سەنبى كۇنى ەلوردادا بولعان ميتينگتى ءتۇسىندىردى.