قازاقستاندا كوروناۆيرۋستىڭ جاڭا شتامى تابىلدى
30-قاراشادا پرەمەر-ءمينيستردىڭ ورىنباسارى - ساۋدا جانە ينتەگراتسيا ءمينيسترى سەرىك جۇمانعاريننىڭ توراعالىعىمەن قازاقستان رەسپۋبليكاسىنىڭ اۋماعىندا كوروناۆيرۋستىق ينفەكسيانىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ وتىرىسى ءوتتى.
رەسپۋبليكادا قاراشادا قازان ايىمەن سالىستىرعاندا سىرقاتتانۋشىلىق 1,6 ەسە ءوستى (اپتاسىنا 453-تەن 725 جاعدايعا دەيىن). دەنساۋلىق ساقتاۋ ۆيتسە-ءمينيسترى ايجان ەسماعامبەتوۆا اتاپ وتكەندەي، COVID-19 عا تەستىلەۋ سانى ازايدى، سەبەبى اۋرۋ جەڭىلدەي باستادى، كوبى مەديتسينالىق كومەككە جۇگىنبەيدى.
بارلىق وڭىرلەردە ينفەكسيانىڭ رەپرودۋكتيۆتىلىك كورسەتكىشى بىردەن ارتىق، بۇل - ۆيرۋستىڭ حالىق اراسىندا بەلسەندى اينالىمى مەن تارالۋىنىڭ بەلگىسى.
وڭىرلەر بولىنىسىندە سوڭعى ايدا ەلىمىزدىڭ 3 وڭىرىندە - الماتى، استانا جانە قاراعاندى وبلىسىندا اۋرۋشاڭدىقتىڭ اپتا سايىن 2,2 ەسەگە دەيىن ءوسۋى بايقالادى.
سونداي-اق 5 وڭىردە (اقمولا، اتىراۋ، جامبىل، ۇلىتاۋ وبلىستارى، شىمكەنت) سوڭعى اپتادان باستاپ سىرقاتتانۋ اپتاسىنا 3,5 ەسەگە دەيىن بىرتىندەپ ءوسىپ كەلەدى.
سوڭعى سەكۆەنيرلەۋ قورىتىندىسى بويىنشا رەسپۋبليكادا وميكرون BQ.1.1 (سەربەر) شتاممى نۇسقاسىنىڭ %0,5 اينالىمى انىقتالدى، %99,5 - وميكرون شتامىنىڭ باسقا نۇسقالارى.
حالىقتى كوروناۆيرۋستى ينفەكسياعا قارسى ۆاكسيناتسيامەن قامتاماسىز ەتۋ ماقساتىندا وڭىرلەرگە 12 جاستان اسقانداردى ۆاكسيناتسيالاۋ جانە رەۆاكسيناتسيالاۋ ءۇشىن Pfizer ۆاكسيناسىنىڭ 200 مىڭ دوزاسى جەتكىزىلدى.
وتىرىس قورىتىندىسى بويىنشا وبلىستاردىڭ، الماتى، استانا جانە شىمكەنت قالالارىنىڭ اكىمدىكتەرىنە ەپيدەميولوگيالىق جاعدايدى، اسىرەسە حالىقتىڭ سانيتاريالىق-ەپيدەميولوگيالىق تالاپتاردى ساقتاۋى، اقپاراتتىق-ءتۇسىندىرۋ جۇمىستارىن، ونىڭ ىشىندە ج ر ۆ ي مەن تۇماۋدىڭ الدىن الۋ بويىنشا شارالاردى باقىلاۋدا ۇستاۋ تاپسىرىلدى.
ۇجىمدىق يممۋنيتەتتى ساقتاۋ ءۇشىن سوڭعى ۆاكسيناتسيادان كەيىن 6 اي ارالىقپەن كوروناۆيرۋستىق ينفەكسياعا قارسى رەۆاكسيناتسيا الۋ قاجەت، ول ءۇشىن رەسپۋبليكادا كوروناۆيرۋستىق ينفەكسياعا قارسى ۆاكسينالار مولشەرى جەتكىلىكتى.