قاسىم-جومارت توقايەۆ ق ح ر ءتوراعاسى شي جينپيڭگە كوڭىل ايتۋ جەدەلحاتىن جولدادى

استانا. قازاقپارات - مەملەكەت باسشىسى قىتاي حالىق رەسپۋبليكاسىنىڭ بۇرىنعى ءتوراعاسى جياڭ زىمين مىرزانىڭ ومىردەن وزعانى تۋرالى سۋىت حاباردى تەرەڭ كۇيزەلىسپەن قابىل العانىن جەتكىزدى، دەپ حابارلايدى اقوردانىڭ باسپا ءسوز قىزمەتى.

- جياڭ زىميندى قىتايدىڭ دامۋى مەن حالىقارالىق قاۋىمداستىقتاعى مەرەيىن ارتتىرۋ جولىندا رياسىز قىزمەت ەتكەن ەلىڭىزدىڭ كورنەكتى پەرزەنتى رەتىندە جاقسى بىلەمىز. ەكى ەل اراسىنداعى بەرىك دوستىقتى نىعايتۋعا سۇبەلى ۇلەس قوسقان تۇلعا رەتىندە ونىڭ جارقىن بەينەسىن حالىقتارىمىز جادىندا ماڭگى ساقتايدى، - دەپ جازىلعان جەدەلحاتتا.

پرەزيدەنت جەدەلحاتتا قازاقستان حالقىنىڭ جانە جەكە ءوزىنىڭ اتىنان ونىڭ وتباسى مەن تۋعان- تۋىستارىنا، سونداي-اق بارشا قىتاي حالقىنا كوڭىل ايتتى.