ەكىباستۇزداعى توتەنشە جاعداي: سوتقا دەيىنگى تەرگەۋ باستالدى

پاۆلودار. قازاقپارات - ەكىباستۇز قالاسىنداعى اپاتقا قاتىستى سوتقا دەيىنگى تەرگەۋ پاۆلودار وبلىسى بويىنشا پوليتسيا دەپارتامەنتى، ەكونوميكالىق تەرگەۋ دەپارتامەنتى جانە سىبايلاس جەمقورلىققا قارسى ءىس- قيمىل دەپارتامەنتى قىزمەتكەرلەرىنىڭ ۆەدومستۆوارالىق جەدەل تەرگەۋ توبىنا تاپسىرىلدى، دەپ حابارلايدى قازاقپارات ءتىلشىسى.

«30-قاراشا كۇنى پاۆلودار وبلىسىنىڭ پروكۋراتۋراسى جىلۋ جەلىلەرىندەگى ءىرى زاقىمدانۋ، جەلىلەردە سۋ قىسىمىنىڭ تومەندەتۋى جانە «ەكىباستۇزجىلۋەنەرگو» ج ش س- نىڭ سۋ جىلىتۋ قازاندىقتارىنىڭ توقتاۋ فاكتسى بويىنشا ق ر قىلمىستىق كودەكسىنىڭ 254-بابىمەن (ءوز مىندەتتەرىنە نەمقۇرايلى قاراۋ) سوتقا دەيىنگى تەرگەۋدى تىركەدى. ول ءۇشىن 5 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا كوزدەلگەن»، - دەلىنگەن پاۆلودار وبلىسى پروكۋراتۋراسىنىڭ حابارلاماسىندا.

اپات سالدارىنان بىرنەشە ونداعان كوپقاباتتى جانە جەكە تۇرعىن ۇيلەر، ءبىرقاتار الەۋمەتتىك نىسان جىلۋدان اجىراتىلىپ، 123 تۇرعىن ەۆاكۋاتسيالاندى. ونىڭ ىشىندە بالالار دا بار. ءبىلىم بەرۋ نىساندارى قاشىقتان وقىتۋ فورماتىنا كوشتى، بالاباقشالاردىڭ جۇمىسى توقتاتىلدى.

«سوتقا دەيىنگى تەرگەۋ پاۆلودار وبلىسى بويىنشا پوليتسيا دەپارتامەنتى، ەكونوميكالىق تەرگەۋ دەپارتامەنتى جانە سىبايلاس جەمقورلىققا قارسى ءىس- قيمىل دەپارتامەنتى قىزمەتكەرلەرىنىڭ ۆەدومستۆوارالىق جەدەل تەرگەۋ توبىنا تاپسىرىلدى»، - دەپ ناقتىلادى قاداعالاۋ ورگانىنان. پاۆلودار وبلىسى پروكۋرورىنىڭ قاۋلىسىمەن قىلمىستىق قۋدالاۋدىڭ زاڭدىلىعىن قاداعالاۋدى جۇزەگە اسىرۋ بويىنشا پروتسەسسۋالدىق پروكۋرورلار توبى ايقىندالدى.

تەرگەۋ بارىسى وبلىس پروكۋرورىنىڭ جەكە باقىلاۋىنا الىندى.

بۇعان دەيىن ەكىباستۇز تۇرعىندارىنا جىلۋ ءۇشىن تولەم قايتا ەسەپتەلەتىنى حابارلانعان ەدى.