اتىراۋ وبلىسىندا جوعالعان جىگىتتى ىزدەۋگە تىكۇشاق تارتىلدى
بۇگىن ونى ىزدەۋگە تىكۇشاق تارتىلدى، دەپ حابارلايدى قازاقپارات ءتىلشىسى.
وبلىستىق توتەنشە جاعدايلار دەپارتامەنتى قوعاممەن بايلانىس توبىنىڭ مالىمەتىنشە، 24 جاستاعى جىگىت 20- قاراشادا تاڭعى ساعات 05:00 دە ۇيىنەن شىعىپ كەتكەن. سودان بەرى ودان ەش حابار بولماعان.
ءىز-ءتۇزسىز جوعالعان جىگىت - قىزىلقوعا اۋدانىنداعى جامبىل اۋىلدىق وكرۋگىنە قارايتىن قاراكول اۋىلىنىڭ تۇرعىنى. 1998-جىلى تۋعان جىگىتتى ىزدەۋگە العاشقى كۇنى توتەنشە جاعدايلار دەپارتامەنتى مەن قىزىلقوعا اۋداندىق پوليتسيا بولىمىنەن، جەرگىلىكتى اتقارۋشى ورگان مەن تۋىستارىنان 37 ادام قاتىستى. تاڭدا ۇيىنەن شىعىپ، كەرى ورالماعان 24 جاستاعى جىگىتتى ىزدەۋ ءتورت كۇن قاتارىنان جۇرگىزىلىپ، كەيىن توقتاتىلعان.
«جوعالعان جىگىتتى ىزدەۋ جۇمىستارى توتەنشە جاعدايلار دەپارتامەنتىنىڭ جانە تۋىستارىنىڭ قاتىسۋىمەن قايتا جالعاسىپ جاتىر. بۇگىن، 30- قاراشادا جەرگىلىكتى ۋاقىتپەن ساعات 09:52 دە حابار-وشارسىز كەتكەن جىگىتتى ىزدەۋگە «قازاۆياقۇتقارۋ» ا ق- نىڭ «ەۆروكوپتەر» تىكۇشاعى تارتىلدى. تىكۇشاق بورتىندا 7 ادام بار»، - دەپ حابارلادى دەپارتامەنتتىڭ قوعاممەن بايلانىس توبىنان.
ەسكە سالا كەتەلىك، بۇدان بۇرىن اتىراۋ وبلىسىندا 24 جاستاعى جىگىتتى ءۇش كۇننەن بەرى ىزدەپ جاتقانىن جازعان بولاتىنبىز.
سونداي-اق، اتىراۋ وبلىسىندا جوعالعان ءۇش ادام ءبىر كۇننەن سوڭ تابىلعان ەدى.
ونىڭ ەكەۋى 20- قاراشادا اتىراۋ قالاسىنا ىرگەلەس ورنالاسقان قۇرساي اۋىلىنان موتورلى قايىقپەن بالىق اۋلاۋ ءۇشىن كاسپي تەڭىزىنە شىققان. ال، 40 جاستاعى ايەلدىڭ قۇرمانعازى اۋدانىنداعى ساسىقتاۋ ۋچاسكەسىنەن مال ىزدەۋگە شىققانى انىقتالعان.