فرانسيالىق كومپانيا قازاقستاندا جەل ەلەكتر ستانتسياسىن سالماق

استانا. قازاقپارات - مەملەكەت باسشىسى «Total Energies» ديرەكتورلار كەڭەسىنىڭ ءتوراعاسى جانە باس اتقارۋشى ديرەكتورى پاتريك پۋياننەنى قابىلدادى، دەپ حابارلايدى قازاقپارات بورت №1 Telegram كانالىنا سىلتەمە جاساپ.

مەملەكەت باسشىسى ەممانيۋەل ماكرونمەن كەلىسسوز بارىسىندا Total كومپانياسىنا ايرىقشا ءمان بەرىلگەنىن اتاپ ءوتىپ، كومپانيا ەلىمىزدىڭ فرانتسيامەن ستراتەگيالىق سەرىكتەستىگىندە ماڭىزدى ءرول اتقاراتىنىن جەتكىزدى.

پاتريك پۋياننە «Total Energies» كومپانياسى ءبىزدىڭ ەلىمىزگە 12 ميلليارد دوللار ينۆەستيتسيا سالعانىن ايتىپ، الداعى ۋاقىتتا دا ەڭ ءىرى ينۆەستورلاردىڭ ءبىرى بولاتىنىنا سەنىم ءبىلدىردى.

ولار سونداي- اق قازاقستاننىڭ ەنەرگەتيكا سەكتورىنداعى ىنتىماقتاستىق ماسەلەلەرىن جان- جاقتى تالقىلادى. كومپانيا قۋاتى 1 گ ۆ ت بولاتىن جەل ەلەكتر ستانتسياسىن سالۋعا نيەتتى. نىسان 2026-2027 -جىلدارى قازاقستاننىڭ وڭتۇستىك- شىعىسىندا پايدالانۋعا بەرىلەدى. جوبانىڭ بولجامدى قۇنى - 1,9 ميلليارد دوللار.