الماتىدا جاڭا جىل مەرەكەسى قالاي تويلانادى
الماتىنىڭ ديزاين تۇجىرىمداماسىن ازىرلەۋ كەزىندە ەكى جىلعا سوزىلعان كارانتيندىك شەكتەۋلەردەن سوڭ، مەرەكەلىك جاڭاجىلدىق اتموسفەرا رۋحىن جانداندىرۋ ماقساتى قويىلدى. سوندىقتان نەگىزگى مەرەكەلىك بەزەندىرۋ ەلەمەنتتەرىندە جىلى تۇستەر باسىم بولادى.
قالانىڭ باستى شىرشاسى اباي الاڭىندا ورناتىلادى. الماتىلىقتار مەن قالا قوناقتارى ءۇشىن ونى جاعۋ ءراسىمى مەن مەرەكەلىك كونسەرت وتكىزىلەدى. سونداي-اق قالانىڭ ءار اۋدانىندا ءوز شىرشالارى ورناتىلادى.
قالا ديزاينىنداعى باستى نازار جارىق كومپوزيتسيالارىنىڭ ءبىرىڭعاي ستيلىنە اۋدارىلادى. ولاردى تاقىرىپتىق شاعىن ارحيتەكتۋرالىق فورمالارمەن بەزەندىرۋ كوزدەلگەن.
شاعىن ارحيتەكتۋرالىق فورمالار، يلليۋميناتسيا جانە فوتوايماقتار جاياۋ جۇرگىنشىلەرگە ارنالعان پانفيلوۆ جانە جىبەك جولى كوشەلەرى، اباي الاڭى جانە باسقا دا جەرلەرگە ورناتىلادى.
سونىمەن قاتار اباي الاڭىندا، تۇڭعىش پرەزيدەنت ساياباعىندا، ن. ساتس اتىنداعى تەاتر، ناۋرىزباي، جەتىسۋ اۋداندارى اكىمدىكتەرى الدىندا، ساۋرانبايەۆ كوشەسىندە 10 كۇن (20- جەلتوقسان – 5- قاڭتار ارالىعىندا) بويى قىسقى فەستيۆال وتەدى. فەستيۆال باعدارلاماسىندا جاڭاجىلدىق جارمەڭكە، گاستروفەستيۆال، سپەكتاكلدەر مەن شەبەرلىك ساباقتارى، بۇكىل وتباسىنا ارنالعان ويىن-ساۋىق بار. بۇدان بولەك، قالانىڭ بارلىق اۋدانىندا مۇز ايدىندارى اشىلادى.
«قازىرگى ۋاقىتتا مەملەكەتتىك ساتىپ الۋ پورتالىندا مەرەكەلىك ءىس-شارالاردى وتكىزۋگە، سونداي-اق قالانى تاقىرىپتىق جانە كوركەمدىك-ساندىك بەزەندىرۋگە اشىق كونكۋرستار جاريالاندى. بارلىق كونكۋرستار بويىنشا الەۋەتتى جەتكىزۋشىلەردىڭ قۇجاتتارىن قابىلداۋ جۇمىستارى جۇرگىزىلۋدە. جاڭا جىلدى مەرەكەلەۋگە جۇمسالاتىن قاراجاتتىڭ سوماسى كونكۋرستار اياقتالعان سوڭ، الەۋەتتى جەتكىزۋشىلەردىڭ ۇسىنعان باعاسىنا سايكەس بولادى. بارلىق كونكۋرستار بويىنشا اقپارات مەملەكەتتىك ساتىپ الۋ پورتالىندا اشىق تۇردە ورنالاستىرىلاتىن بولادى»، - دەپ حابارلادى اكىمدىكتەن.
ەسكە سالايىق، بۇعان دەيىن قازاقستاندىقتار جاڭا جىل مەكەرەسىندە قانشا كۇن دەمالاتىنىن حابارلاعان بولاتىنبىز.
سونداي-اق توتەنشە جاعدايلار مينيسترلىگى ءورت قاۋىپسىزدىگىن قامتاماسىز ەتۋ ءۇشىن «قاۋىپسىز جاڭا جىل» اكسياسىن وتكىزەتىنىن جازعان ەدىك.