اتىراۋدىڭ ىرگەسىندەگى ەلدى مەكەندە جابايى قاباندار ءجۇر

اتىراۋ. قازاقپارات - اتىراۋ قالاسىنىڭ ىرگەسىندەگى ەلدى مەكەندە جابايى قاباندار ءجۇر، دەپ حابارلايدى قازاقپارات ءتىلشىسى.

جابايى قاباندار اتىراۋ قالاسىنا تاياۋ ورنالاسقان ەركىنقالا-2 ەلدى مەكەنىنە كىرىپ كەتكەن. اۋىلدىڭ تۇرعىندارى Whatsapp مەسسەندجەرىندە كوشەدە جۇرگەن ءۇش قاباندى ۆيدەوعا تۇسىرگەن.

اتىراۋ وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باس مامانى نۇرلان يمانعاليەۆتىڭ ايتۋىنشا، جابايى قاباندار «اقجايىق» مەملەكەتتىك تابيعي رەزەرۆاتىنان كەلۋى مۇمكىن.

«ەركىنقالا اۋىل وكرۋگىنىڭ جانىندا «اقجايىق» مەملەكەتتىك تابيعي رەزەرۆاتى ورنالاسقان. جانۋارلار سول رەزەرۆاتتان جايىق وزەنى ارقىلى ءجۇزىپ شىققان بولۋى مۇمكىن دەپ ويلايمىز. وسى وقيعادان كەيىن جەرگىلىكتى وكرۋگ اكىمىمەن بىرگە اۋىلدى ارالاپ شىقتىق. جانۋارلار اۋىلعا كىرىپ، كەرى قاشىپ كەتكەن. اۋىلدا ەشقانداي توسىن وقيعا تىركەلمەدى. تۇرعىندار اراسىندا زارداپ شەككەندەر جوق. جالپى، قاباندار - ءقاۋىپتى جانۋارلار. ءبىراق، قاباندار ادامداردان قورقادى»، - دەيدى نۇرلان يمانعاليەۆ.

ونىڭ ايتۋىنا قاراعاندا، بۇل اۋىلدا 1980 -جىلدارى جابايى قاباننىڭ، نە وزگە دە اڭداردىڭ كىرگەنى ءجيى بايقالعان. الايدا، ودان كەيىن مۇنداي وقيعا تىركەلمەگەن.

«اۋىلعا جابايى جانۋارلار، نە اڭدار كىرگەن كەزدە وتە ساق بولۋ قاجەت. سەبەبى، ادامدارعا، اسىرەسە، بالالارعا قاۋىپ ءتوندىرۋى مۇمكىن»، - دەيدى نۇرلان يمانعاليەۆ.

الەۋمەتتىك جەلىدە اۋىلعا كىرگەن قابانداردىڭ اتىلعانى تۋرالى سۋرەتتەر تارادى.

الايدا، بۇل دەرەكتى اۋماقتىق ينسپەكتسيانىڭ باس مامانى نۇرلان يمانعاليەۆ جوققا شىعاردى.