باس اسكەري پروكۋراتۋرا: جانسەيىت تۇيمەبايەۆتىڭ ۇلىن ولتىرگەن كۇدىكتى - اسكەري قىزمەتشى
«7-قاڭتاردا ك. ەسىمدى ازاماتتىڭ قايتىس بولۋ فاكتىسى بويىنشا باس اسكەري پروكۋراتۋرانىڭ جەدەل توبى تەرگەۋ جۇرگىزدى. جوعارىداعى فاكت بويىنشا قورعانىس مينيسترلىگى اسكەري بولىمدەرىنىڭ ءبىرىنىڭ اسكەري قىزمەتشىسى قىلمىستىق كودەكستىڭ 451-بابىنىڭ 2-بولىگى 1-تارماعىمەن (اۋىر زارداپتارعا اكەپ سوققان بيلىكتى اسىرا پايدالانۋ) كۇدىكتى دەپ تانىلدى. ول قاماۋعا الىنعان»، - دەلىنگەن رەسمي حابارلامادا.
اقپاراتتا ايتىلعانداي، قازىر قىلمىستىق پروتسەسكە قاتىسۋشىلار اتالعان ىسپەن تانىسىپ جاتىر.
«كۇدىكتىنىڭ كىناسىن سوت انىقتايدى. تەرگەۋ مۇددەسى ءۇشىن وزگە اقپارات جاريالانبايدى»، - دەيدى ۆەدومستۆودان.
ايتا كەتسەك، كەشە ەلىمىزدىڭ باس پروكۋراتۋراسى قاڭتار وقيعاسى كەزىندە جانسەيىت تۇيمەبايەۆتىڭ ۇلىنىڭ ءولىمى بويىنشا كۇدىكتى ۇستالعانىن حابارلاعان ەدى.
ەسكە سالساق، جانسەيىت تۇيمەبايەۆتىڭ ۇلى بيىلعى قاڭتارداعى جاپپاي تارتىپسىزدىك كەزىندە بەلگىسىز بىرەۋلەر قولىنان قازا تاپقانى حابارلانعان ەدى.