قازاقستان ازاماتتىعىن الۋ ءۇشىن مەملەكەتتىك ءتىلدى، تاريح پەن كونستيتۋتسيانى ءبىلۋ مىندەتتى بولماق
بۇل تۋرالى ق ر ىشكى ىستەر ءمينيسترى مارات احمەتجانوۆ ايتتى، دەپ حابارلايدى قازاقپارات ءتىلشىسى.
«ءبىز تۇجىرىمداما جوسپارىنىڭ ءبىرقاتار ءىس-شاراسىن ورىنداۋشىمىز. ءبىرىنشى، IT، عىلىم، دەنساۋلىق جانە ءوندىرىس سالاسىنداعى كاسىبي شەبەر ماماندارعا تۇراقتى تۇرۋعا رۇقسات الۋدى جەڭىلدەتەمىز. ەكىنشى، سىرتقى ىستەر مينيسترلىگىمەن بىرگە ورتاق ءۇش بۇيرىق دايىندايمىز. ولار: عىلىم-ءبىلىم، ءوندىرىس، سپورت جانە باسقا سالالارعا ۇلەس قوساتىن شەتەلدىكتەرگە، ەلىمىزدىڭ ەكونوميكاسىنا 300 مىڭ ا ق ش دوللارىنان استام ينۆەستيا سالعاندارعا جانە سيفرلىق ماماندارعا ارناۋلى ۆيزا مەن ىقتيارحاتتى الۋدى جەڭىلدەتۋگە قاتىستى»، - دەدى مينيستر بۇگىن ۇكىمەت وتىرىسىندا.
ونىڭ اتاپ وتۋىنشە، تۇجىرىمدامانىڭ تاعى ءبىر باعىتى - ازاماتتىق زاڭناماسىن جەتىلدىرۋ.
«بىرىنشىدەن، قازاقستان ازاماتتىعىن الۋ ءۇشىن مەملەكەتتىك ءتىلدى، ءبىزدىڭ تاريحىمىز بەن كونستيتۋتسيامىزدى قاراپايىم دەڭگەيدە ءبىلۋ مىندەتتى بولماق. ەكىنشىدەن، قوس ازاماتتىق فاكتىلەرىنە جاۋاپكەرشىلىكتى قاتاڭداتۋ كوزدەلىپ وتىر. ەگەر قازاقستان ازاماتىنىڭ جەكە باسىن راستايتىن قۇجاتى بار قانداي دا ءبىر ادام باسقا ەلدىڭ ازاماتتىعىن راستايتىن قۇجاتتى پايدالانسا، كوشى-قون قىزمەتى ول ادامدى ءبىزدىڭ ازاماتتىقتان ايىرادى. سونىمەن بىرگە، ادام ازاماتتىقتى العاننان كەيىن التى اي ىشىندە بۇرىنعى ەلدىڭ ازاماتتىعىن توقتاتقانى تۋرالى انىقتاما ۇسىنباسا، ونداي ادامدار دا بۇدان بىلاي قازاقستان ازاماتى بولمايدى. قازىرگى زاڭنامادا مۇنداي شارالار قاراستىرىلماعان ەدى»، - دەدى مارات احمەتجانوۆ.
اۆتور
مارلان جيەمباي