ق ر سىرتقى ىستەر مينيسترلىگىنىڭ شەت ەلدەردەگى قۇرىلىمدارى قازاقستان ازاماتتارىنىڭ قۇقىعىن قورعايتىن بولادى
بۇل تۋرالى بۇگىن ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى قازاقپارات ءتىلشىسى.
تامارا دۇيسەنوۆانىڭ اتاپ وتۋىنشە، «اشىق قازاقستان 500+» اتتى كوشى- قون ساياساتىنىڭ جاڭا تۇجىرىمداماسىنىڭ بەسىنشى باعىتى بوسقىندارمەن جۇمىستى قامتيدى.
«بۇل - مينيسترلىكتىڭ قاراۋىنا بەرىلگەن جاڭا باعىت. مينيسترلىك ۋاكىلەتتى ورگاندارمەن بىرلەسىپ، ۇلتتىق زاڭناما نورمالارىن بىرىككەن ۇلتتار ۇيىمىنىڭ ستاندارتتارىنا ساي يمپلەمەنتاتسيالاۋ بويىنشا ۇسىنىستار ازىرلەيتىن بولادى»، - دەدى ول
ونىڭ اتاپ وتۋىنشە، التىنشى باعىت قازاقستان ازاماتتارىنىڭ ەڭبەك ميگرانتى رەتىندە شەتەلگە شىعۋىنا قاتىستى.
«بۇل - جاھاندىق ترەند. سوندىقتان، ءبىز وعان شەكتەۋ قويا المايمىز. ءبىزدىڭ مىندەتىمىز - ولاردىڭ قۇقىقتارىن قورعاۋدى قامتاماسىز ەتۋ. وسى ماقساتتا قازاقستاندىق ەڭبەك ميگرانتتارى بارىنشا كوپ شوعىرلانعان ەلدەرمەن ولاردىڭ قۇقىقتارىنا كەپىلدىك بەرەتىن مەملەكەتارالىق كەلىسىمدەر پاكەتىن جاساۋدى ۇسىنامىز. وسى كەلىسىمدەرگە سايكەس، سىرتقى ىستەر مينيسترلىگىنىڭ شەت ەلدەردەگى قۇرىلىمدارى قازاقستان ازاماتتارىنىڭ قۇقىعىن قورعايتىن بولادى»، - دەدى مينيستر.
اۆتور
مارلان جيەمباي